ފުނަދޫގައި ޤާއިމްކުރި އައިސްޕްލާންޓު ހުޅުވައިފި

ށ. އަތޮޅު ފުނަދޫގައި ޤާއިމްކުރި 30 ޓަނުގެ އައިސް ޕްލާންޓު މިރޭ ހުޅުވައިފިއެވެ.

މި އައިސްޕްލާންޓު ހުޅުވާފައި ވަނީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިލަދުންމަޑުލު އުތުރުބުރީގެ މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ފުނަދޫއަށް މިއަދު ކުރެއްވި ޒިޔާރަތުގެ ތެރެއިންނެވެ.

ފުނަދޫގައި އޮތް ޚާއްޞަ ރަސްމިއްޔާތެއްގައި އައިސްޕްލާންޓު ހުޅުވާދެއްވީ ރައީސުލްޖުމްހޫރިއްޔާއެވެ.

ފުނަދޫގައި ޤާއިމްކޮށްފައިވާ އައިސްޕްލާންޓަކީ ދުވާލެއްގެ މައްޗަށް 30 ޓަނުގެ އައިސް އުފެއްދާ އަދި 50 ޓަނުގެ އައިސް ރައްކާކުރެވޭ އައިސް ޕްލާންޓެކެވެ.

ފުނަދޫ ރައްޔިތުންނާ ބައްދަލުކުރެއްވުމަށް މިރޭ އެ ރަށުގައި ބޭއްވި ޖަލްސާގައި ރައީސް ވިދާޅުވީ، މި އައިސްޕްލާންޓަކީ އެ ސަރަޙައްދުގެ މަސްވެރިންނަށް ލިބިގެންދާނެ ވަރަށް ބޮޑު ފަސޭހައެއް ކަމަށެވެ.

މި އައިސްޕްލާންޓުގެ މަސައްކަތް މާދަމާއިން ފެށިގެން ދިނުމަށް ވަނީ ހަމަޖެހިފައެވެ.

ރައީސުލްޖުމްހޫރިއްޔާ ފުނަދޫއަށް ކުރެއްވެވި ދަތުރުފުޅުގައި، އެ ރަށުގެ ތަރައްޤީއާ ގުޅުންހުރި 7 މަޝްރޫޢެއްގައި ސޮއިކޮށް، އިތުރު މަޝްރޫޢެއް ވަނީ ފަށާފައެވެ.