ޖަޕާނުގެ ފުރަތަމަ އަންހެން ބޮޑުވަޒީރަށް ރައީސް މަރުޙަބާ ވިދާޅުވެއްޖެ

ޖަޕާނުގެ ފުރަތަމަ އަންހެން ބޮޑުވަޒީރު ކަމުގައިވާ ސަނައެ ތަކައިޗީ އިންތިޚާބުވުމާ ގުޅިގެން، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ކަމަނާއަށް ތަހާނީ ވިދާޅުވެއްޖެއެވެ.

މީސްމީޑިޔާގައި ޙިއްޞާކުރެއްވި ޕޯސްޓުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ސަނައެ ތަކައިޗީގެ ތަޖުރިބާއާ އެކު ޖަޕާނަށް އިތުރު ކުރިއެރުންތަކެއް ލިބިގެންދާނެ ކަމަށް އެ މަނިކުފާނު ޔަޤީން ކުރައްވާ ކަމަށެވެ.

މީގެ އިތުރުން، ދިވެހިރާއްޖެއާއި ޖަޕާނާ ދެމެދުގައި އޮތް ގާތް ރަޙްމަތްތެރި ގުޅުމުގެ މައްޗަށް އަލި އަޅުއްވައިލައްވައި، މި ގުޅުން އިތުރަށް ބަދަހިކުރެއްވުމަށް، ރައީސުލްޖުމްހޫރިއްޔާ ވަނީ ޝައުޤުވެރިކަން ފައުޅުކުރައްވާފައެވެ.

ޖަޕާނުގެ ބޮޑުވަޒީރުގެ ގޮތުގައި އިހަށް ހުންނެވި ޝިގެރު އިޝިބާ އިސްތިޢުފާ ދެއްވުމާ ގުޅިގެން، ޢުމުރުފުޅުން 64 އަހަރުގެ ތަކައިޗީ، ޕާޓީގެ އައު ލީޑަރުކަމަށް ވަނީ ހޮވާފައެވެ. އެއާ އެކު، ބޮޑުވަޒީރުކަމަށް އެ ކަމަނާ ޢައްޔަނުކުރީ ޖަޕާނުގެ ޤާނޫނު ހަދާ މަޖިލިހުގައި ނެގި ވޯޓަކުންނެވެ.

އިޝިބާ އިސްތިޢުފާ ދެއްވާފައިވަނީ ޖަޕާނުގައި ދިރިއުޅުމުގެ އަގުތައް އުފުލުމާ ގުޅިގެން އެ ޤައުމުގެ ޢާންމުން ސަރުކާރާ މެދު ވަރަށް ބޮޑަށް ނުރުހުން ވެފައި ވަނިކޮށެވެ. މިއާ އެކު، އައު ބޮޑުވަޒީރު ތަކައިޗީގެ ސިޔާސަތަކީ، ޤައުމުގެ އިޤްތިޞާދީ ޙާލަތު ރަނގަޅު ކުރުމަށް ސަރުކާރުން އިތުރު ޚަރަދުތައް ކުރުމެވެ.

Congratulations Your Excellency @takaichi_sanae, on your election as the first female Prime Minister of Japan.

I am fully confident that with your wealth of experience in public service Japan will attain new heights of progress, and I look forward to working with Your…

— Dr Mohamed Muizzu (@MMuizzu) October 21, 2025