ޤައުމީ ތަރައްޤީގެ ޕްލޭނަށް ހުރިހާ ރަށެއްގެ ޚިޔާލު ބޭނުންވޭ: ރައީސް މުޢިއްޒު

 ދިވެހިރާއްޖޭގެ 20 އަހަރުގެ ޤައުމީ ތަރައްޤީގެ ޕްލޭނަށް ކޮންމެ ރަށަކުންވެސް ބަސް ބުނުން މުހިއްމުކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. މިހެން ވިދާޅުވީ މިއަދު ބޭއްވުނު ޤައުމީ ތަރައްޤީގެ ޕްލޭން އެކުލަވާލުމުގެ މަޝްވަރާތައް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

ރައީސް މުޢިއްޒު ވިދާޅުވީ، މި ޕްލޭނަކީ ޤާނޫނީ ބާރުވެރިކަން ލިބިގެން ކުރެވޭ މަސައްކަތަކަށް ހަދައި، ޤާނޫނު އަސާސީގެ ތެރެއިންވެސް ބަލައިގަންނަ މަސައްކަތަކަށް ހަދާނެ ކަމަށެވެ. އެމަނިކުފާނު އިތުރަށް ވިދާޅުވީ، ސިޔާސީ ވިސްނުން ދޫކޮށް، މިއީ ޤައުމީ މަސައްކަތެއްގެ ގޮތުގައި ބަލައިގަނެ، ކޮންމެ ރަށަކުންވެސް ޚިޔާލު ބޭނުންވާ ކަމަށެވެ.

އިރާދަކުރެއްވިއްޔާ މި ޕްލޭންގެ މަސައްކަތް ރާއްޖޭގެ ހުރިހާ ރަށެއްގައި ކުރިއަށް ގެންދާނަން. ކޮންމެ ރަށެއްގެ ރައްޔިތުންވެސް މި ޕްލޭނަށް އެއްޗެކޭ ވިދާޅުވާން ޖެހޭ. ކޮންމެ ރަށެއްގެ ރައްޔިތުން ބޭނުންވާ ކަންތައް މީގައި ރެޕްރެޒެންޓްވާންޖެހޭ

ރައީސް މުޢިއްޒު ވިދާޅުވިއެވެ.

ރައީސް އިތުރަށް ފާހަގަކުރެއްވީ، މި ޕްލޭން އެކުލަވާލާއިރު ދުނިޔެއަށް އަންނަ ބަދަލުތައްވެސް ބަލަންޖެހޭ ކަމަށާއި، އޭއައި ބޭނުންކޮށްގެން އެކުލަވާލެވޭ ޕްލޭނަކަށް ވާންޖެހޭ ކަމަށެވެ. އަދި ޤައުމުގެ ތަރައްޤީގައި ފަންނިއްޔާތު ހިމަނަންޖެހޭކަންވެސް އެމަނިކުފާނު ފާހަގަކުރެއްވިއެވެ.

ރައީސް މުޢިއްޒު ވަނީ މި މަސައްކަތް އެއް އަހަރު ދުވަހުގެ ތެރޭގައި ނިންމަވާނެ ކަމަށް ވިދާޅުވެފައެވެ. އަދި އަންނަ އަހަރުގެ ނޮވެމްބަރު މަހު މި ޕްލޭން ތަންފީޒުވެގެންދާނެ ކަމަށް އުންމީދުކުރައްވާ ކަމަށްވެސް ވިދާޅުވިއެވެ.

މި ޕްލޭނާއެކު ރާއްޖޭގައި ހުރި ބޮޑެތި މައްސަލަތަކަށް ރިޢާޔަތްކޮށް، ދުރު ރާސްތާގައި އެކަންކަން ހައްލުކުރުމަށް ގިނަ ފިޔަވަޅުތަކެއް އެޅޭނެ ކަމަށް ބެލެވެއެވެ.