Ads by Stelco

ޚަބަރު

ފަލަސްޠީނުގެ ރައްޔިތުންނަށް ހަމަޖެހުމާއި އިޤްތިޞާދީ ގޮތުން ކުރިއަރާނެ މުސްތަޤްބަލެއްގެ އުންމީދު ދަނީ ގެއްލެމުން: ރައީސް

ފަލަސްޠީނުގެ ރައްޔިތުންނަށް ހަމަޖެހުމާއި އިޤްތިޞާދީ ގޮތުން ކުރިއަރާނެ މުސްތަޤްބަލެއްގެ އުންމީދު ދަނީ ގެއްލެމުން: ރައީސް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު |ފޮޓޯ: ރައީސް އޮފީސް

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

29 ނޮވެމްބަރު 2025، 12:36

29 ނޮވެމްބަރު 2025، 12:36

ފަލަސްޠީނުގެ ރައްޔިތުންނަށް ހަމަޖެހުމާއި އިޤްތިޞާދީ ގޮތުން ކުރިއަރާނެ މުސްތަޤްބަލެއްގެ އުންމީދު ދަނީ ގެއްލިގެންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިފަދައިން ވިދާޅުވީ، މިއަދު ފާހަގަކުރާ ފަލަސްޠީނުގެ ރައްޔިތުންނާއެކު އެއްބައިވަންތަކަން ހާމަކުރުމުގެ ބައިނަލްއަޤްވާމީ ދުވަހާ ގުޅިގެން މީސްމީޑިއާގައި ހިއްސާ ކުރެއްވި ޕޯސްޓެއްގައެވެ.

ރައީސް ވިދާޅުވީ،  ފަލަސްޠީނުގެ ބިމުގައި ހާލަތު އޮތީ އަދިވެސް ވަރަށް ނާޒުކު ޙާލަތެއްގައި ކަމަށެވެ. އަދި ހަމަލާތައް ހުއްޓާލުމުގެ އެއްބަސްވުމެއް އޮތް ނަމަވެސް ޔަހޫދީން މެދުކެނޑުމެއް ނެތި ޣައްޒާއަށް ޙަމަލާތައް ދެމުންދާކަން އެމަނިކުފާނު ވަނީ ފާހަގަކުރައްވާފައެވެ. ހަމަ އެހެންމެ، ހުޅަނގު އައްސޭރީގެ އިތުރު ބިންތައް ހިފައި ޔަހޫދީން އާބާދު ކުރުވުމާއި، ފަލަސްޠީނުގެ ރައްޔިތުންގެ ޢާންމު ދިރިއުޅުމަށާއި ހަމަޖެހުން ޤާއިމްކޮށް އިޤްތިޞާދީ ގޮތުން ފާގަތިކަން ހޯދުމަށް ކުރާ މަސައްކަތް ހުއްޓުވުމަށް އެކި ގޮތްގޮތުން ހުރަސްތައް ކުރިމަތިކުރުވަމުންދާ ކަމަށް ރައީސް ވިދާޅުވިއެވެ.

ރައީސް ވަނީ، މިހާރަށް ވުރެ ވެސް ބޮޑަށް ފަލަސްޠީނުގެ ރައްޔިތުންގެ ޝަރުޢީ ޙައްޤުތަކާއި އުންމީދުތައް މުޅިން ހާޞިލުކުރުމަށްޓަކައި ބައިނަލްއަޤްވަމީ މުޖްތަމަޢުތަކުން ގުޅިގެން މަސައްކަތް ކުރެއްވުމަށް ގޮވާލައްވާފައެވެ.

އަދި ފަލަސްޠީނުގައި މިނިވަން މުސްތަޤިއްލު ދައުލަތެއް ޤާއިމްކޮށް 1967 ގެ ކުރީގެ ބޯޑަރުތަކަށް ރުޖޫޢަވެ، އިރުމަތީ ޤުދުސްއަކީ އެޤައުމުގެ ވެރިރަށް ގޮތުގައި ބަލައިގަތުމަށް ދިވެހިރާއްޖެއިން ގެންގުޅޭ ސިޔާސަތު އެމަނިކުފާނު ތަކުރާރު ކުރެއްވިއެވެ.

ފަލަސްޠީނުގެ ރައްޔިތުންނާއެކު އެއްބައިވަންތަކަން ހާމަކުރުމުގެ ބައިނަލްއަޤްވާމީ ދުވަހެއް ފާހަގަކުރަން ފަށާފައިވަނީ އދ. އާންމު މަޖިލީހުން 1977 ގައި މި ދުވަސް ފާހަގަކުރުމަށް ނިންމައިގެންނެވެ. އެގޮތުން މެންބަރު ޤައުމުތަކުން މިކަމުގައި ވީހާވެސް ބޮޑަށް ބައިވެ ފަލަސްޠީނުގެ ރައްޔިތުންގެ ހައްޤުތައް ކަށަވަރުކުރުމަށް މަސައްކަތް ކުރުމަކީ އދ. މި ދުވަސް ފާހަގަކުރުމަށް ނިންމުމުގެ މަޤްޞަދެކެވެ.

Ads by MSS

މި ލިޔުން ކިޔާލުމުން