ރާއްޖޭގެ ތަރައްޤީގެ މާސްޓަރޕްލޭން: 3 ޒޯނާއި 7 އަރބަން ސެންޓަރު އުފައްދަނީ

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެކްސް ޕޯސްޓެއްގައި ވަނީ ރާއްޖޭގެ ކުރިއަށް އޮތް 20 އަހަރުގެ ތަރައްޤީގެ މާސްޓަރޕްލޭނާ ގުޅޭ މުހިންމު މަޢުލޫމާތުތަކެއް ހާމަކުރައްވާފައެވެ. މި ޕޯސްޓުގައި ރައީސް ވަނީ ސަރުކާރުގެ ދެމެހެއްޓެނިވި ސަރަޙައްދީ ތަރައްޤީގެ ސިޔާސަތުގެ ދަށުން ކުރިއަށް ގެންދިއުމަށް ރޭވިފައިވާ މުހިންމު މަޝްރޫޢުތަކެއްގެ ތަފްސީލު ހިއްސާކުރައްވާފައެވެ.

ރައީސް މުޢިއްޒުގެ ޕޯސްޓުގައި ފާހަގަކުރައްވާފައިވާ ގޮތުގައި، މި ސިޔާސަތުގެ ދަށުން މާލެ އަރބަން ރީޖަންގެ އިތުރުން، އުތުރުގެ 3 އަތޮޅު ހިމެނޭ ނޮރދަން އިންޓަގްރޭޓަޑް ޑިވެލޮޕްމަންޓް ޒޯނަކާއި، ދެކުނުގެ 4 އަތޮޅު ހިމެނޭ ސަދަން އިންޓަގްރޭޓަޑް ޑިވެލޮޕްމަންޓް ޒޯނެއް ތަރައްޤީކުރުމަށް ވަނީ ރޭވިފައެވެ. މީގެ އިތުރުން، މާލެއިން އުތުރުގައި 3 އަދި ދެކުނުގައި 4 އަރބަން ސެންޓަރު ތަރައްޤީކުރުމަށްވެސް ވަނީ ހަމަޖެހިފައެވެ.

މެނިފެސްޓޯގައި (ޗެޕްޓަރ 4، ނަންބަރު 12، 13 އަދި 14 ގައި) ވަރަށް ސާފުކޮށް ބަޔާންކޮށް އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމަޔަށް އެތައް ޖަލްސާއެއްގައި އަޅުގަނޑު ބަޔާންކޮށްފައިވާ ފަދައިން، ދެމެހެއްޓެނިވި ސަރަޙައްދީ ތަރައްޤީގެ ސިޔާސަތުގެ ދަށުން މާލެ އަރބަން ރީޖަން…

— Dr Mohamed Muizzu (@MMuizzu) November 9, 2024

ރައީސް މުޢިއްޒު އިތުރަށް ވިދާޅުވެފައިވަނީ މި މަޝްރޫޢުތަކަކީ ސަރުކާރުގެ މެނިފެސްޓޯގައި (ޗެޕްޓަރ 4، ނަންބަރު 12، 13 އަދި 14 ގައި) ވަރަށް ސާފުކޮށް ބަޔާންކޮށްފައިވާ ކަންކަން ކަމަށާއި، މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމައަށް އެތައް ޖަލްސާއެއްގައި މިކަން ފާހަގަކުރައްވާފައިވާ ކަމަށެވެ.

އަދި މި މާސްޓަރޕްލޭން އެކުލަވާލުމުގައި ރާއްޖޭގެ ހުރިހާ ރަށެއްގެ ރައްޔިތުންގެ ޚިޔާލާއި، ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުން ހޯދުމަށް ވަނީ ރޭވިފައެވެ.

ރައީސް މުޢިއްޒު ވަނީ ބައެއް ސިޔާސީ ފަރާތްތަކުން މި މަޝްރޫޢުތަކާ ގުޅޭގޮތުން ދައްކަމުންދާ ވާހަކަތަކާ ދޭތެރޭ ކަންބޮޑުވުން  ފާޅުކުރައްވާފައެވެ. އެގޮތުން، ކަންކަމުގެ ހަޤީޤަތް ނުބަލައި ނުވަތަ ހަޤީޤަތް އެނގިހުރެ ސިޔާސީ ފައިދާ ހޯދުމުގެ ނިޔަތުގައި ބައެއް ފަރާތްތަކުން ކުރާ ކަންކަމަށް ޒިންމާވާނީ އެކަންކަން ކުރާ ފަރާތްތައް ކަމަށް ރައީސް ވަނީ ވިދާޅުވެފައެވެ.