ވެރިކަމަކީ ލިބޭ މޮޅުކަމަކާއި މުދާގަނޑެއް ނޫން، ބުރަ މަސްއޫލިއްޔަތަކާއި ބޮޑު ޒިންމާއެއް: ރައީސުލްޖުމްހޫރިއްޔާ

ވެރިކަމަކީ ލިބޭ މޮޅުކަމަކާއި މުދާގަނޑެއް ނޫންކަމަށާއި އެއީ ބުރަ މަސްއޫލިއްޔަތަކާއި ބޮޑު ޒިންމާއެއްކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. ދަރުބާރުގޭގައި ބޭއްވުނު ޖުމްހޫރީ ދުވަހުގެ ރަސްމީ ޖަލްސާގައި ޤައުމާ މުޚާޠަބުކުރައްވަމުން ރައީސް މުޢިއްޒު މިފަދައިން ވިދާޅުވިއެވެ.

ޖުމްހޫރީ ދުވަހަކީ ރައްޔިތުންގެ ދުވަހެއްކަމާއި، ޖުމްހޫރީ ވެރިކަމަކީ ރައްޔިތުންގެ ވެރިކަމެއްކަން ފާހަގަކުރެއްވި ރައީސް މުޢިއްޒު، އެމަނިކުފާނުގެ ވެރިކަމުގެ މަގުދައްކާ އަލިމަގަކީ ކީރިތި ޤުރުއާނާއި ސުންނަތުގެ އިތުރުން އެމަނިކުފާނުގެ ބައްޕާފުޅު ލިޔުއްވާފައިވާ "ދައުލަތާއި ވެރިންނާއި މަސްއޫލިއްޔަތު އަދި ކިޔަމަންވުމުގެ މަފްހޫމު" ކަމުގައި ވިދާޅުވިއެވެ.

ރައީސުލްޖުމްހޫރިއްޔާއަކީ ވަކި މުއްދަތަކަށް ރައްޔިތުން ޙަވާލުކުރާ ހަވާލްދާރެއްކަމާއި، ވަކީލެއްކަމާއި، ޚާދިމެއްކަން ފާހަގަކުރެއްވި ރައީސް މުޢިއްޒު، ވެރިޔަކު ރައްޔިތުންގެ މައްޗަށް އަމިއްލަ ނަފްސު އުފުލައި، ހައިބަތާއި ޖާހު ދައްކައި، ރައްޔިތުން ނިކަމެތިކޮށް އަޅުދާސްކުރުމަކީ ކުރަން ހެޔޮވާވަރުގެ ކަމެއް ނޫންކަމަށް ވިދާޅުވިއެވެ.

މި ސަރުކާރުގެ ޢަމަލުތައް ބައްޓަންކުރެވިފައިވަނީ ރައްޔިތުންގެ އަޑުއައްސަވައިގެން، ރައްޔިތުންނަށްޓަކައިކަން ފާހަގަކުރެއްވި ރައީސް މުޢިއްޒު، މިހާރު ވަނީ ސިޔާސީ ވާދަވެރިން ދުރަށްލައި އެއްފަރާތްކުރި ޒަމާން ނިމިފައިކަމަށާއި، ކޮމިޝަންތައް ނުހައްދަވާނެކަމަށާއި، މައްސަލަތައް ބައްލަވާނީ ޤާއިމުކުރެވިފައިވާ ނިޒާމްތަކުގެ ތެރެއިންކަމަށް ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވީ، ވޭތުވެދިޔަ 51 ހަފުތާ އާއި ދެ ދުވަހު މަސައްކަތްޕުޅުކަތްޕުޅު ކުރައްވާފައިވަނީ ރައްޔިތުންގެ ފަޅީގައި ހުންނަވައިގެންކަމަށާއި، އެމަނިކުފާނު ކުރައްވަން މަސައްކަތްޕުޅު ކުރައްވަނީވެސް އަދި ބޭނުންފުޅުވަނީވެސް، ރައްޔިތުންގެ ފަޅީގައި ހުންނަވައިގެން ކުރައްވާ ހެޔޮވެރިކަމެއްކަމުގައެވެ.