އިސްލާމްދީނާއި ޤައުމިއްޔަތު ކުރިއެރުވުމަށް ވޭތުވެދިޔަ އެއް އަހަރުގެ ތެރޭގައި ސަރުކާރުން އިސްކަންދިން

ވޭތުވެދިޔަ އެއް އަހަރުގެ ތެރޭގައި އިސްލާމީ ކަންކަމަށާއި ދިވެހި ޤައުމިއްޔަތު ތަރައްޤީކުރުމަށް އިސްކަންދެއްވާފައިވާ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.  ރައީސުލްޖުމްހޫރިއްޔާ މިފަދައިން ވިދާޅުވެފައިވަނީ ރޭގަ ދަރުބާރުގޭގައި ބޭއްވުނު ޖުމްހޫރީ ދުވަހުގެ ރަސްމީ ޖަލްސާގައި ޤައުމާ މުޚާޠަބުކުރައްވަމުންނެވެ.

ރައީސް މުޢިއްޒުގެ ވާހަކަފުޅުގައި، ފާއިތުވި 51 ހަފުތާގެ ތެރޭގައި މިސްކިތްތައް އިމާރާތްކުރުމާއި މަރާމާތުކުރުމަށް ކަނޑައެޅިފައިވާ ބަޖެޓު އިތުރުކުރެވިފައިވާކަން ފާހަގަކުރެއްވިއެވެ. އަދި މީގެ ނަތީޖާ މިހާރު ފެންނަމުންދާކަމަށްވެސް ވިދާޅުވިއެވެ. މީގެއިތުރުން، ޤައުމީ ފެންވަރުގައި ޒުވާން އިމާމުންނާއި ޚަޠީބުން ތަމްރީނުކޮށް، ޤައުމީ ޚިދުމަތަށް ނެރެމުންދާކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ.

ދީނުގެ ރުކުންތަކުގެ ތެރެއިން ޒަކާތާއި ޙައްޖާއި ރޯދައިގެ އަޅުކަންތައް ފުރިހަމަކުރުމަށް ރައްޔިތުންނަށް ދައުލަތުގެ ފަރާތުން އެހީތެރިކަން ފޯރުކޮށްދެވިފައިވާކަމަށް ރައީސް މުޢިއްޒު ވިދާޅުވިއެވެ. އަދި ޢީދު ފާހަގަކުރުމުގައި ރައްޔިތުންގެ ބައިވެރިވުން އިތުރުކުރެވިފައިވާކަންވެސް ފާހަގަކުރެއްވިއެވެ.

ދިވެހި ޤައުމިއްޔަތާއި ދިވެހި ބަހުގެ ޚިދުމަތުގައި ކުރެވިފައިވާ މަސައްކަތްތަކަށް އަލިއަޅުއްވާލައްވަމުން، ރައީސުލްޖުމްހޫރިއްޔާ ވިދާޅުވީ ދިވެހި ބަހަށް، ދިވެހިންނާއި ދިވެހި ޒުވާނުން އަހުލުވެރިކުރުމަށްޓަކައި ދިވެހި ބަހާއި ޤައުމިއްޔަތަށް ޚާއްޞަ ވުޒާރާއެއް އުފައްދަވާފައިވާ ކަމަށެވެ. އަދި ޤައުމިއްޔަތުގެ އިސްވާރުތައް ކަނޑައެޅިފައިވާކަމަށްވެސް ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވީ، ތަޢުލީމީ މަންހަޖުގައި ދިވެހި ބަސް ވަކި މާއްދާއެއްގެ ގޮތުގައި ހިމަނައި، އައު ޖީލަކަށް ދިވެހި ބަހުގެ ރިވެތިކަން ގެނެސްދިނުމުގެ މަސައްކަތް ފެށިފައިވާ ކަމަށެވެ.