"މިދައުރުގައި ގެދޮރުވެރިކަމުގެ ރަންޒަމާނެއް ގެނެސްދޭނަން": ރައީސް މުޢިއްޒު

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މި ދައުރުގައި ގެދޮރުވެރިކަމުގެ ރަންޒަމާނެއް ގެނެސްދެއްވާނެ ކަމަށް ވަޢުދުވެވަޑައިގެންފިއެވެ. ދަރުބާރުގޭގައި ބޭއްވުނު ޖުމްހޫރީ ދުވަހުގެ ރަސްމީ ޖަލްސާގައި ޤައުމާ މުޚާޠަބުކުރައްވަމުން ރައީސް މުޢިއްޒު މި ވާހަކަ ވިދާޅުވިއެވެ.

ރައްޔިތުންގެ ބޯހިޔާވަހިކަމަށް އިސްކަންދެއްވާ ކަމަށް ވިދާޅުވެ، ރައީސް މުޢިއްޒު ފާހަގަކުރެއްވީ މި ސަރުކާރުގެ ފުރަތަމަ ބަޖެޓުގައިވެސް ގެދޮރުވެރިކަމާއި ބޯހިޔާވަހިކަމަށް ޚާއްޞަ އަހައްމިއްޔަތުކަމެއް ދެއްވާފައިވާ ކަމެވެ. މިގޮތުން، ރާއްޖޭގެ ތާރީޚުގައި ފުރަތަމަ ފަހަރަށް ބޯހިޔާވަހިކަމަށް މިހާ ބޮޑު އަދަދެއް ޚާއްޞަކުރެވުނު ކަމަށާއި، 1.5 މިލިޔަން ރުފިޔާ ގެދޮރު އެޅުމުގެ ޢަމަލީ މަސައްކަތަށް ކަނޑައަޅުއްވާފައިވާ ކަމަށް ވިދާޅުވިއެވެ.

އިތުރަށް ރައީސް މުޢިއްޒު ހާމަކުރެއްވި ގޮތުގައި، އަންނަ އަހަރުން ފެށިގެން ކޮންމެ އަހަރަކު ގެދޮރުވެރިކަމުގެ ލޯނުތަކަށް 1000 މިލިޔަން ރުފިޔާ ބަޖެޓުކުރައްވާނެއެވެ. ސަރުކާރުގެ އަމާޒަކީ މި ދައުރު ނިމޭއިރު ދިވެހި ހުރިހާ ރައްޔިތުންނަށް ހިޔާވަހިކަން ކަށަވަރުކޮށްދިނުން ކަމަށްވެސް އެމަނިކުފާނު ވިދާޅުވިއެވެ.

އުމްރާނީ ތަރައްޤީއާ ގުޅޭގޮތުން ވާހަކަފުޅު ދައްކަވަމުން، ރައީސް މުޢިއްޒު ފާހަގަކުރެއްވީ ސަރުކާރުގެ ޢިމާރާތްތަކާއި މިސްކިތްތަކުގެ މަރާމާތަށް އިސްކަންދެއްވާފައިވާ ކަމެވެ. އަދި ވެލާނާ އިންޓަނޭޝަނަލް އެއާޕޯޓާއި ތިލަމާލެ ބުރިޖު ފަދަ މަޝްރޫޢުތަކުގެ މަސައްކަތް އަވަސްކުރެވިފައިވާ ކަމަށްވެސް ވިދާޅުވިއެވެ. މީގެ އިތުރުން، މި އަހަރުގެ ބަޖެޓުގެ ތާށިކަމާ އެކުގައިވެސް، 38 ތަރައްޤީގެ މަޝްރޫޢު ނިންމާފައިވާ ކަމަށާއި، އިތުރު 26 މަޝްރޫޢު ކުރިއަށްދާ ކަމަށް ރައީސް މުޢިއްޒު ހާމަކުރެއްވިއެވެ.