ރައްޔިތުންނަށް އިޚްލާޞްތެރިކަމާއެކު ޚިދުމަތްކުރުމަށް ރައީސް މުޢިއްޒު އަޒުމް ކަނޑައަޅުއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ އެމަނިކުފާނުގެ ވެރިކަމުގެ ފަސް އަހަރުގެ ތެރޭގައި ރައްޔިތުންނަށް އިޚްލާޞްތެރިކަމާއެކު ޚިދުމަތް ކުރެއްވުމަށް އަޒުމް ކަނޑައަޅުއްވާފައެވެ. މި ވާހަކަ އެމަނިކުފާނު ވިދާޅުވީ ޖުމްހޫރީ ދުވަހުގެ މުނާސަބަތުގައި  ދަރުބާރުގޭގައި ބޭއްވުނު ރަސްމީ ޖަލްސާގައި ދެއްކެވި  ވާހަކަފުޅުގައެވެ.

ރައީސް މުޢިއްޒުގެ ވާހަކަފުޅުގައި، ވެރިކަމަށް އަންނަ ފަރާތްތަކުން އަމިއްލަ ވެރިކަން ދިފާޢުކުރުމަށް މަސައްކަތް ކުރުމުގެ ބަދަލުގައި ރައްޔިތުންނަށް ޚިދުމަތް ކުރުމުގެ މުހިންމުކަން ފާހަގަކުރެއްވިއެވެ. އަދި ކުރިއަށް އޮތް 20 އަހަރަށް ޤައުމީ ތަރައްޤީގެ މާސްޓަރ ޕްލޭނެއް އެކުލަވާލުމަށް ނިންމަވާފައިވާކަމަށާއި، މި ޕްލޭން އެކުލަވާލުމުގައި ރައްޔިތުންގެ ޚިޔާލާއި މަޝްވަރާ ހޯއްދަވާނެކަމަށް ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވީ، ރާއްޖޭގެ ތަރައްޤީގެ ޕްލޭން ޤާނޫނީ ބާރު ލިބިގެންވާ އެއްޗަކަށް ހެދުމަށް މަސައްކަތް ކުރައްވާނެ ކަުރައްވާނެ ކަމަށެވެ. މިގޮތުން، ރާއްޖޭގެ އުތުރާއި ދެކުނުގައި އިންޓަގްރޭޓެޑް ޑިވެލޮޕްމަންޓް ޒޯންގެ ދެ ޒޯނެއް ތަރައްޤީކުރުމަށާއި، ރާއްޖޭގެ 7 ސަރަޙައްދެއްގައި އަރބަން ސެންޓަރުތަކެއް ގާއިމުކުރުމަށް ރޭވިފައިވާ ކަމަށް އެމަނިކުފާނު ހާމަކުރެއްވިއެވެ.

މި ޖަލްސާގައި ރައީސް މުޢިއްޒު ދެއްކެވި ވާހަކަފުޅުން، ރައްޔިތުންގެ ބައިވެރިވުމާއެކު ދެމެހެއްޓެނިވި ތަރައްޤީއެއް ހާސިލުކުރުމަށް އެމަނިކުފާނުގެ ސަރުކާރުން އިސްކަންދޭކަން ފާހަގަކުރެވެއެވެ.