ޤައުމުގެ އަމާންކަމާއި ހަމަޖެހުން ދެމެހެއްޓުމަށް ސަރުކާރުން ގިނަ މަސައްކަތްތަކެއް ކުރަމުންދޭ: ރައީސް މުޢިއްޒު

ދިވެހިރާއްޖޭގެ ޖުމްހޫރީ ދުވަހުގެ މުނާސަބަތުގައި ދަރުބާރުގޭގައި  ބޭއްވުނު ރަސްމީ އިޙްތިފާލުގައި ވާހަކަފުޅު ދައްކަވަމުން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެފައިވަނީ ޤަވާއިދާ ޚިލާފަށް އުޅޭ ބިދޭސީންގެ މައްސަލައަށް ދާއިމީ ޙައްލެއް ނުހޯދިއްޖެނަމަ، މިނިވަންކަމަށް އަރައިގަނެވޭ ބުރުލަކަށް އެކަން ވެދާނެ ކަމަށެވެ.

ރައީސް މުޢިއްޒު ވިދާޅުވި ގޮތުގައި މިއީ އެތައް އަހަރެއް ވަންދެން އެއްވެސް ސަރުކާރަކަށް ޙައްލު ނުކުރެވި އޮތް މައްސަލައެކެވެ. ނަމަވެސް، އެމަނިކުފާނުގެ ސަރުކާރުން މިހާތަނަށް 4700 އަށްވުރެ ގިނަ ބިދޭސީން ޑީޕޯޓްކޮށްފައިވާ ކަމަށް ވިދާޅުވިއެވެ. މިއީ އަހަރެއްގެ ތެރޭގައި ކުރެވުނު ރެކޯޑް އަދަދެއް ކަމަށްވެސް ރައީސް ފާހަގަކުރެއްވިއެވެ.

މީގެ އިތުރުން، މަސްތުވާތަކެތީގެ މައްސަލައަށް އަލިއަޅުވާލައްވަމުން ރައީސް ވިދާޅުވީ މިދިޔަ އަހަރާ އަޅާބަލާއިރު މަސްތުވާތަކެތި އަތުލައިގަނެވިފައިވާ މިންވަރު 60 އިންސައްތަ އިތުރުވެފައިވާ ކަމަށެވެ. އަދި ކުރިއަށް އޮތް އަހަރު މި މަސައްކަތް އިތުރަށް ހަރުދަނާ ކުރައްވާނެ ކަމަށް ވިދާޅުވިއެވެ.

މަގުމަތީގެ ސަލާމަތާއި ރައްކާތެރިކަމަށް އެޅުއްވި ފިޔަވަޅުތަކުގެ ސަބަބުން، ފުރާނައަށް ނުރައްކާވާ ފަދަ އެކްސިޑެންޓްތައް 33 އިންސައްތަ މަދުވެފައިވާ ކަމަށް ރައީސް ފާހަގަކުރެއްވިއެވެ.

ރައީސް މުޢިއްޒު އިތުރަށް ވިދާޅުވީ 2025 ވަނަ އަހަރު ނިމޭއިރު ރާއްޖޭގެ ހުރިހާ އަތޮޅަކުން އައިޑީކާޑާއި ޕާސްޕޯޓްގެ ޚިދުމަތް ލިބޭނެ ކަމަށެވެ. އަދި "ކޮންމެ ކުއްޖަކަށް ޢާއިލާއެއް" މަޝްރޫޢުގެ ދަށުން 34 ކުއްޖަކަށް ދިރިއުޅުން ހޯދައިދެވިފައިވާ ކަމަށާއި، "ޙާލު ކިހިނެއް؟" ޕްރޮގްރާމްގެ ކާމިޔާބީއާއި، އިސްރަށްވެހިންނަށާއި ނުކުޅެދުންތެރިކަން ހުންނަ ފަރާތްތަކަށް އެހީތެރިވުމަށް ކުރެވުނު މަސައްކަތްތައް ފާހަގަކުރެއްވިއެވެ.

ރައީސް މުޢިއްޒު ނިންމަވާލެއްވީ އަންހެނުން ބާރުވެރިކުރުވުމަށް ފަށާފައިވާ މަދަދު ޕްރޮގްރާމްގެ ދަށުން މިހާރުވެސް ލޯނުތައް ދޫކުރަމުންދާ ކަމަށް ވިދާޅުވެފައެވެ.