ބަޖެޓުގައި ދެވަނައަށް އެންމެ އިސްކަން ދޭނީ ތަޢުލީމާއި ސިއްޙަތަށް: ރައީސް މުޢިއްޒު

ރާއްޖޭގެ އަންނަ އަހަރުގެ ބަޖެޓުގައި ދެވަނައަށް އެންމެ ބޮޑު އިސްކަމެއް ދޭނީ ތަޢުލީމާއި ސިއްޙަތަށް ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު  ދަރުބާރުގޭގައި ބޭއްވުނު ޖުމްހޫރީ ދުވަހުގެ ރަސްމީ ޖަލްސާގައި ޤައުމާ މުޚާޠަބުކުރައްވަމުން ވިދާޅުވެއްޖެއެވެ.

ވޭތުވެދިޔަ އަހަރު ތަޢުލީމީ ދާއިރާއިން ކުރެވުނު މަސައްކަތްތައް ފާހަގަކުރައްވަމުން ރައީސް ވިދާޅުވީ، ގިނަ އަދަދެއްގެ ތަމްރީނު ޕްރޮގްރާމްތަކާއި ސްކިލްސް ޑިވެލޮޕްމަންޓް މަޝްރޫޢުތައް ހިންގައި، ސްކޮލަރޝިޕްތަކާއި ލޯނުތައް ދޫކުރެވިފައިވާ ކަމަށެވެ.

މީގެ އިތުރުން، މަތީ ޘާނަވީ ތަޢުލީމު ފުޅާކުރުމުގެ ގޮތުން 23 ސްކޫލެއްގައި މަތީ ޘާނަވީ ކިޔަވައިދޭން ފަށާފައިވާ ކަމަށާއި، މާލޭގައި ސީ.އެޗް.އެސް.އީ-މާލެ އަލުން ހުޅުވާފައިވާ ކަމަށް ރައީސް ވިދާޅުވިއެވެ. އަދި ޢަރަބިއްޔާ ސްކޫލަށް ބޮޑު ބިމެއް ކަނޑައަޅައި، އަވަހަށް އިމާރާތްކުރުމުގެ މަސައްކަތް ފެށޭނެ ކަމަށްވެސް އެމަނިކުފާނު ވިދާޅުވިއެވެ.

ދިވެހި މުދައްރިސުން އުފެއްދުމުގެ މުހިންމުކަން ފާހަގަކުރައްވަމުން ރައީސް ވިދާޅުވީ، ދިވެހި ތުއްތު ކުދިންނަށް ކިޔަވައިދިނުން ދިވެހިންގެ އަތްމައްޗަށް ގެނައުމަކީ ސަރުކާރުގެ އިސްކަންދޭ ކަމެއް ކަމަށެވެ. އަދި މި އަހަރަކީ ރާއްޖޭގައި އެންމެ ގިނަ އަދަދަކަށް މުދައްރިސުން ތަމްރީނުކުރެވޭ އަހަރު ކަމުގައިވެސް އެމަނިކުފާނު ފާހަގަކުރެއްވިއެވެ.