ދުޅަހެޔޮ އަދި ދެމެހެއްޓެނިވި ދުނިޔެއެއް ބިނާކުރުމުގައި ސާފު ހަކަތަ އަދާކުރާ ދައުރު މުހިންމު: ރައީސް މުޢިއްޒު

ދުޅަހެޔޮ އަދި ދެމެހެއްޓެނިވި ދުނިޔެއެއް ބިނާކުރުމުގައި ސާފު ހަކަތަ އަދާކުރާ ދައުރު ވަރަށް މުހިންމު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ބައިނަލްއަޤްވާމީ ސާފު ހަކަތައިގެ ދުވަހުގެ މުނާސަބަތުގައި މީސްމީޑިއާ މެދުވެރިކުރައްވައި ފޮނުއްވި މެސެޖެއްގައެވެ.

ރައީސުލްޖުމްހޫރިއްޔާގެ މެސެޖުގައި ވިދާޅުވީ، ސާފު ހަކަތައަކީ ހަމައެކަނި މޫސުމީ ބަދަލުތަކާ ދެކޮޅަށް ކުރެވޭ މަސައްކަތެއް ނޫން ކަމަށާއި، އެއީ ތަޢުލީމީ ދާއިރާއާއި، ޞިއްޙީ ދާއިރާގެ އިތުރުން އިޤްތިޞާދީ ފުރުޞަތުތައް ފަހިކޮށްދޭ މުހިންމު ވަސީލަތެއް ކަމަށެވެ. އަދި ހަކަތައިގެ ރައްކާތެރިކަމަކީ ޤައުމުގެ ތަރައްޤީއަށް ކޮންމެހެން ބޭނުންތެރި ކަމެއްކަން އެމަނިކުފާނު ފާހަގަކުރެއްވިއެވެ.

މި ސަރުކާރުގެ އަމާޒަކީ 2028 ވަނަ އަހަރުގެ ނިޔަލަށް ރާއްޖޭގެ ހަކަތައިގެ ބޭނުންތަކުގެ 33 އިންސައްތަ އިއާދަކުރަނިވި ހަކަތައިން ފުއްދުން ކަމަށް ރައީސް ވިދާޅުވިއެވެ. މި އަމާޒަށް ވާޞިލުވުމަށްޓަކައި، ރާއްޖޭގެ ތިމާވެއްޓާ ގުޅޭގޮތަށް ހަކަތައިގެ އިސްރާފު ކުޑަކުރުމަށާއި، އިއާދަކުރަނިވި ހަކަތަ އުފައްދާ މިންވަރު އިތުރުކުރުމަށް އަމަލީ ގޮތުން ގިނަ މަސައްކަތްތަކެއް ކުރަމުންދާކަން އެމަނިކުފާނު ހާމަކުރެއްވިއެވެ.

On this International Day of Clean Energy, we are reminded of the vital role clean energy plays in our lives and in building a healthier, more sustainable planet.

Energy security is essential to our development. Clean energy not only drives climate action, but also strengthens… pic.twitter.com/hW2DghzEC3

— Dr Mohamed Muizzu (@MMuizzu) January 26, 2026

ރައީސް މުޢިއްޒުގެ މެސެޖު ނިންމަވާލެއްވީ، ސާފު ހަކަތައަށް ބަދަލުވުމުގެ މަސައްކަތް އަވަސްކުރުމަށާއި، ދުނިޔެ ރައްކާތެރިކުރުމަށްޓަކައި ހަރުދަނާ ފިޔަވަޅުތަކެއް އެޅުމުގައި އެންމެހާ ފަރާތްތަކުން ބައިވެރިވުމަށް ގޮވާލައްވަމުންނެވެ.