ފިލިޕީންސްގައި ހިނގި ފެރީ ބޯޓުގެ ހާދިސާއާ ގުޅިގެން ރައީސުލްޖުމްހޫރިއްޔާ ތައުޒިޔާ ފޮނުއްވައިފި

ފިލިޕީންސްގެ ދެކުނުގެ ބާސިލަން ސަރަހައްދުގައި ފެރީއެއް ބަންޑުން ޖަހާލުމުގެ ސަބަބުން ހިނގި ހިތާމަވެރި ހާދިސާއާ ގުޅިގެން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ފިލިޕީންސްގެ ރައީސް ފަރޑިނަންޑް ރޮމުއަލްޑޭޒް މާކޯސް ޖޫނިއަރއަށް ތައުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާ ފޮނުއްވި މެސެޖުގައި، މި ހާދިސާގައި ގިނަ ބައެއްގެ ފުރާނަ ގެއްލި، އަދި ގިނަ ބަޔަކު ވީނުވީއެއް ނޭނގި ގެއްލިފައިވާތީ އެކަމުގެ ހިތާމައިގައި ބައިވެރިވެވަޑައިގަންނަވާކަން ހާމަކުރެއްވިއެވެ.

ދިވެހި ސަރުކާރާއި ރައްޔިތުންގެ ނަމުގައި ރައީސުލްޖުމްހޫރިއްޔާ ވަނީ ފިލިޕީންސްގެ ރައީސަށާއި، ސަރުކާރަށާއި، ރައްޔިތުންނަށް، އަދި މި ހާދިސާގައި މަރުވި މީހުންގެ އާއިލާތަކަށް އިޚްލާޞްތެރި ތައުޒިޔާ އާއި ހަމްދަރުދީ ފޮނުއްވާފައެވެ.

މީގެ އިތުރުން، މި ހާދިސާގައި އަނިޔާވި މީހުންނަށް އަވަސް ޝިފާއަކަށް އެދިވަޑައިގެން، ގެއްލުނު މީހުން ހޯދުމަށް ކުރިއަށްދާ ސާޗް އެންޑް ރެސްކިއު އޮޕަރޭޝަން ކާމިޔާބުކަމާއެކު ކުރިއަށް ދިއުމަށް އުންމީދު ކުރައްވާ ކަމަށްވެސް ރައީސުލްޖުމްހޫރިއްޔާގެ މެސެޖުގައި ވިދާޅުވެފައިވެއެވެ.