ފާގަތި ކުރިމަގެއް ހޯދައިދެވޭނީ އުނގެނުމާއި އުނގަންނައިދިނުމުގައި އިޚްލާޞްތެރިވެގެން: ރައީސުލްޖުމްހޫރިއްޔާ

ދިވެހީން އެދޭފަދަ ފާގަތި ކުރިމަގެއް މި ޤައުމަށް ހޯދައިދެވޭނީ، އުނގެނުމާއި އަދި އުނގަންނައިދިނުމުގައި އިޚްލާޞްތެރިވެގެން ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެ މަނިކުފާނު މިފަދައިން ވިދާޅުވީ، ތަޢުލީމީ އާ އަހަރާއި ގުޅިގެން މީސް މީޑިއާގައި ޚިއްޞާކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާ ވިދާޅުވީ ތަޢުލީމު އުނގެނުމާއި އުނގަންނައިދިނުމަކީވެސް ވަރަށް ބޮޑު ދީނީ އަދި ޤައުމީ ޒިންމާއެއް ކަމަށާއި، ދިވެހީން އެދޭފަދަ ފާގަތި ކުރިމަގެއް މި ޤައުމަށް ހޯދައިދެވޭނީ މި ޒިންމާއަށް ފަރުވާތެރިވެ އެންމެން އެއްބާރުލައި އިޚްލާޞްތެރިވީ މިންވަރަކުން ކަމުގައެވެ.

ތަޢުލީމު އުނގެނުމާއި އުނގަންނައިދިނުމަކީވެސް ވަރަށް ބޮޑު ދީނީ އަދި ޤައުމީ ޒިންމާއެއް. ދިވެހީން އެދޭ ފާގަތި ކުރިމަގު މި ޤައުމަށް ހޯދައިދެވޭނީ މި ޒިންމާ އަދާކުރުމުގައި އަޅުގަނޑުމެން އެންމެން އެއްބާރުލައި އިޚްލާޞްތެރިވީ މިންވަރަކުން.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވިއެވެ.

އެ މަނިކުފާނުގެ މެސެޖުގައި، ޤައުމީ ތަރައްޤީގައި ތަޢުލީމުގެ މުހިންމުކަމަށް ވެސް އަލިއަޅުވާލާފައިވެއެވެ. އެގޮތުން އެ މަނިކުފާނު ވިދާޅުވީ، ޤައުމީ ތަރައްޤީ އާއި ކުރިއެރުމުގައި ވެސް އެންމެ މުހިންމު ދައުރެއް އަދާކުރާ އެއް ކަމަކީ ތަޢުލީމު ކަމުގައެވެ.

އިސްލާމްދީނަށާއި ދިވެހި ޤައުމަށް ލޯބިކުރާ، އުޅުމާއި ސުލޫކު ރަނގަޅު، ހަރުދަނާ އަދި ހީވާގި ދަރީންތަކެއް މި ޤައުމުގައި ބިނާކުރެވޭނީ، ތަޢުލީމާއި ތަރުބިއްޔަތަށް އަހައްމިއްޔަތުކަން ދީގެން.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވިއެވެ.

ރައީސުލްޖުމްހޫރިއްޔާގެ މެސެޖު ނިންމަވާލެއްވީ، ތަޢުލީމީ ނިޒާމު ހަރުދަނާކޮށް ކުރިއެރުވުމަށާއި، ހެޔޮލަފާ، ތޫނުފިލި، އުޅުން ރީތި ދަރީންތަކެއް ދިވެހި ތަޢުލީމީ ހިޔާވަހިތަކުގައި ބޮޑެތި ކުރުމުގެ ހެޔޮ ތައުފީޤު ދެއްވުމަށް އެދި ދުޢާ ދަންނަވަމުންނެވެ.

ދިވެހިރާއްޖޭގެ ހުރިހާ ސްކޫލެއްގައި ކިޔެވުން މިއަދު ފަށާއިރު، މި އަހަރު ދަރިވަރުންނަށް ބޮޑު ޗުއްޓީ ލިބޭނީ ކުރިން އޮތްގޮތަށް ޑިސެމްބަރު މަހުއެވެ. އެގޮތުން ދަރިވަރުންގެ ބޮޑު ޗުއްޓީ ފެށޭނީ ޑިސެމްބަރު މަހުގެ 17 ވަނަ ދުވަހުގައެވެ. އަދި 2027 ވަނަ އަހަރުގެ ކިޔެވުން ފެށޭނީ ޖެނުއަރީ މަހުގެ 17 ވަނަ ދުވަހުއެވެ.