ރައީސުލްޖުމްހޫރިއްޔާ، މާލޭ ރަށްވެހިންގެ ޖަމުޢިއްޔާގެ މެންބަރުންނާ ބައްދަލުކުރައްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މާލޭ ރަށްވެހިންގެ ޖަމުޢިއްޔާގެ މެންބަރުންނާ ހޯމަ ދުވަހު ބައްދަލުކުރައްވައިފިއެވެ.

ރައީސުލްޖުމްހޫރިއްޔާ ދިރިއުޅުއްވާ ގެކޮޅު، މުލީއާގޭގައި ބޭއްވި މި ބައްދަލު ކުރުމުގައި އެންމެ ބޮޑަށް މަޝްވަރާ ކުރެވުނު އެއް ކަމަކީ ހުޅުމާލެ އާއި ގުޅިފަޅާއި ގިރާވަރުފަޅު އަދި ރަސްމާލޭގެ ތަރައްޤީއާ ގުޅޭގޮތުން ކަމުގައި، މާލޭ ރަށްވެހިންގެ ޖަމުޢިއްޔާގެ ފަރާތުން ވަނީ ހާމަކޮށްފައެވެ. ނަމަވެސް މިކަމުގެ ތަފްސީލު ޚިއްޞާ ކުރައްވާފައެއް ނުވެއެވެ.

މި ބައްދަލުވުމަށްފަހު މާލޭ ރަށްވެހިންގެ ޖަމްޢިއްޔާއިން މީސް މީޑިއާގައި ޚިއްޞާކުރި ފޮޓޯތަކުން ފެންނަ ގޮތުގައި، އެ ބައްދަލުވުމުގައި މާލޭގެ ޑެޕިއުޓީ މޭޔަރު މުހައްމަދު އަރީޝް ބައިވެރިވެވަޑައިގެންނެވިއެވެ. މީގެ އިތުރުން، ކުރިއަށް އޮތް ލޯކަލް ކައުންސިލް އިންތިޚާބުގައި ޕީއެންސީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ މޫސާ ޢަލީ ޖަލީލް އާއި އެ ޕާޓީގެ ޕީޖީ ގުރޫޕްގެ ލީޑަރު، އިބްރާޙިމް ފަލާޙް ވެސް ބައިވެރިވެވަޑައިގެންނެވިއެވެ.

_{މާލޭ ރަށްވެހިންގެ ޖަމްޢިއްޔާއާއެކު ރައީސުލްޖުމްހޫރިއްޔާ ބޭއްވެވި ބައްދަލުކުރެއްވުމުގައި މިހާރުގެ ޑެޕިއުޓީ މޭޔަރާއި، ކުރިއަށް އޮތް އިންތިހާބުގައި މާލޭގެ މޭޔަރުކަމަށް ވާދަކުރައްވާ މޫސާ ޢަލީ ޖަލީލް ބައިވެރިވެވަޑައިގެންނެވުން / ފޮޓޯ: މާލޭ ރަށްވެހިންގެ ޖަމްޢިއްޔާ}

މާލޭ ރަށްވެހީންގެ އެންމެ ބޮޑު ކަންބޮޑުވުމަކީ ބޯހިޔާވަހިކަމެވެ. ރައީސުލްޖުމްހޫރިއްޔާގެ ރިޔާސީ ކެމްޕޭނުގައި ވަނީ މިކަން ޙައްލުކޮށްދެއްވާނެކަމަށް ވިދާޅުވެފައެވެ. އެގޮތުން ބޯހިޔާވަހިކަމުގެ މަޝްރޫޢު ކުރިއަށް ގެންދިޔުމަށް މާލެ ސަރަޙައްދުގައި އެކުއެކީގައި، ބިން ހިއްކުމާ ގުޅޭ ބިޔަ މަޝްރޫޢުތައް ދަނީ މިހާރު ކުރިއަށް ގެންދަމުންނެވެ. އޭގެތެރޭގައި ހުޅުމާލެއިން ހިއްކާ 63 ހެކްޓަރުގެ ބިމާއި، ރަސްމާލެއިން ހިއްކާ 1،009 ހެކްޓަރު އަދި ގުޅީފަޅާއި ގިރާވަރުފަޅުގެ މަޝްރޫޢުވެސް ހިމެނެއެވެ. މާލެ ސަރަޙައްދުގައި އަންނަނީ 1،600 ހެކްޓަރަށް ވުރެ ބޮޑު ސަރަޙައްދެއް ހިއްކަމުންނެވެ.