ހުޅުމާލެ ދެވަނަ ފިޔަވަހީގައި ޒަމާނީ ފެންވަރަށް ތަރައްޤީކޮށްފައިވާ "ޝަހީދު ޢަލީ" ސްކޫލު ހުޅުވައިފި

ހުޅުމާލެ ދެވަނަ ފިޔަވަހީގައި ޒަމާނީ ފެންވަރަށް ތަރައްޤީކޮށްފައިވާ "ޝަހީދު ޢަލީ" ސްކޫލު ރަސްމީކޮށް ހުޅުވައި، ކިޔެވުން ފަށައިފިއެވެ.

މި ސަރުކާރުން އަލަށް ތަރައްޤީކޮށްފައިވާ މި ސްކޫލު ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

މިއަދު ފެށުނު ދިރާސީ އައު އަހަރާއި ގުޅިގެން މި ސްކޫލު ރަސްމީކޮށް ހުޅުވުމަށްޓަކައި އެ ސްކޫލުގައި މިއަދު ހެނދުނު ވަނީ ޚާއްޞަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި، ތަޢުލީމީ ވަޒީރު ޑރ. އިސްމާޢީލް ޝަފީޢު އާއި، ދައުލަތުގެ އެކި ވުޒާރާތަކުގެ ވަޒީރުން ވަނީ ބައިވެރިވެވަޑައިގެންފައެވެ. މި ރަސްމިއްޔާތުގައި، ސްކޫލު ހުޅުވުމަށްފަހު ރައީސުލްޖުމްހޫރިއްޔާއަށް ވަނީ ހަނދާނީ ހަދިޔާއެއް އަރުވާފައެވެ. ހަމަ އެހެންމެ، މިއަދު ވަނީ ސްކޫލްގެ ރަސްމީ ލޯގޯ އިފްތިތާޙްކޮށްފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން، ރަޝީދު ކާޕެންޓްރީ ކޮންސްޓްރަކްޝަން (އާރުސީސީ) އާ ހަވާލުކޮށްގެން މި ސްކޫލު ތަރައްޤީކުރުމުގެ މަސައްކަތް ފަށާފައިވަނީ 2023 ވަނަ އަހަރުގެ ޑިސެމްބަރު މަހުގެ ތެރޭގައެވެ. އަދި ޖުމްލަ 2 އަހަރު ދުވަހުގެ ތެރޭގައި ސްކޫލު ޒަމާނީ ފެންވަރަށް ތަރައްޤީކުރުމަށްފަހު މިއަދު ހުޅުވާފައިވާއިރު، މި ސްކޫލުގައި 32 ކުދިންގެ ޖާގައިގެ 54 ކްލާސްރޫމު ހިމެނެއެވެ. 

pic.twitter.com/bKZxfczUcO

— The President's Office (@presidencymv) January 27, 2026

މީގެ އިތުރުން، މި ސްކޫލުގައި މަލްޓިޕާޕަސް ހޯލަކާއި، ޒަމާނީ ވަޞީލަތްތަކުގެ އިތުރުން ޓާފްދަނޑަކާއި އިންޑޯ ކުޅިވަރުތައް ކުޅޭވޭނެ އިންތިޒާމްތައް ވަނީ ހަމަޖައްސަވާފައެވެ. ހަމަ އެއާއެކު، 400 ކުދިންގެ ޖާގައިގެ އޮޑިޓޯރިއަމަކާއި، ލައިބްރަރީ އާއި، ކޮމްޕިއުޓަރު ލެބާއި، 3 ސައިންސް ލެބާއި، އިންޑޯ ހޯލަކާއި، ބޭރުގައިވެސް ކުޅިވަރު ކުޅޭވޭނެ އިންތިޒާމްތައް މި ސްކޫލުގައި ވަނީ ހަމަޖައްސަވާފައެވެ.

މިއީ ހުޅުމާލެ ދެވަނަ ފިޔަވަހީގައި ތަރައްޤީކުރި ދާއިމީ 2 ވަނަ ސުކޫލަށްވީއިރު، މި ސްކޫލަކީ 1،500 ކުދިންގެ ޖާގައިގެ ސްކޫލެއްކަމަށް ތަޢުލީމީ ވުޒާރާއިން ވިދާޅުވެއެވެ.