ފަތިސް ނަމާދަށް ގަޑިއަށް ހޭލައި، ދަރިވަރުން ފަތިސް ނަމާދުކޮށްގެން ދުވަސް ފެށުމަށް އަޒުމު ކަނޑައެޅުމަށް ރައީސް އިލްތިމާސްކުރައްވައިފި

ފަތިސް ނަމާދަށް ގަޑިއަށް ހޭލައި، ދަރިވަރުން ފަތިސް ނަމާދުކޮށްގެން ދުވަސް ފެށުމަށް އަޒުމު ކަނޑައެޅުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިލްތިމާސްކުރައްވައިފި އެވެ.

ރައީސުލްޖުމްހޫރިއްޔާ މިފަދައިން ރާއްޖޭގެ ހުރިހާ ސްކޫލެއްގެ ދަރިވަރުންނަށް އިލްތިމާސްކުރައްވާފައިވަނީ، ހުޅުމާލޭ ދެވަނަ ފިޔަވަހީގައި މި ސަރުކާރުން އިމާރާތް ކުރި ޝަހީދު އަލީ ސްކޫލް ހުޅުވުމަށް ބޭއްވި ރަސްމިއްޔާތުގައިި ވާހަކަފުޅު ދައްކަވަމުންނެވެ.

މި ރަސްމިއްޔާތު ޝަރަފްވެރިކޮށްދެއްވާ ވާހަކަފުޅު ދައްކަވަމުން ރައީސް ވިދާޅުވީ، އެ ސްކޫލަކީ ވަރަށް ވެސް ފަޚުރުވެރިވާ އަބްޠޯލަކަށް ނިސްބަތްވާ ސްކޫލެއް ކަމަށެވެ. އެގޮތުން، ދިވެހިރާއްޖެ މިނިވަންކުރުމަށް އަލިރަސްގެފާނު ކުރެއްވި ޖިހާދަށް ނިސްބަތްކޮށް ސްކޫލަށް ނަންދީފައިވަނީ މި ޤައުމުގެ މުސްތަޤްބަލް ބިނާކުރުމުގައި ސަރުކާރުން ގެންގުޅޭ ސިޔާސަތު ކުރިއަށް ގެންދިއުމަށްކަން ރައީސް ފާހަގަކުރެއްވިއެވެ. ހަމަ އެހެންމެ، މިއީ ތުއްތު ކުދިންނާއި ޒުވާނުންގެ ޚިދުމަތުގައި ޤައުމީ ލޯބި އަށަގަންނަވާ ބިންވަޅު ނެގުމަށްޓަކައި ކުރެވޭ މަސައްކަތުގެ ތެރެއިން ބައެއް ކަމަށް ރައީސް ވިދާޅުވިއެވެ.

މި ސްކޫލް ނިސްބަތްވެގެންވާ އަލިރަސްގެފާނުގެ ޖިހާދާއި އަލިރަސްގެފާނު އެ ދުވަހު އެ ކަންތައް ކުރެއްވި ގޮތާއި މި ކަންކަމުން ޢިބްރަތް ޙާޞިލްކޮށް ޤައުމީ ލޯބި ކޮންމެ ކުއްޖެއްގެ ހިތުގައި ބިންވަޅު ނަގައި ޤައުމަށްޓަކައި ތިމަންނައަށް ކޮށްދެވޭނީ ކޮންކަމެއްތޯ އަބަދުވެސް ވިސްނާ އެގޮތުގައި ހިތްވަރާއެކު ކުރިއަށް ދިއުމަށް ހުރިހާ ކުދިން މަސައްކަތް ކުރަންވާނެ.

ރައީސުލްޖުމްހޫރިއްޔާ ވިދާޅުވިއެވެ.

މީގެ އިތުރުން، ތަޢުލީމް ޙާޞިލްކުރަނީ ސިނކުޑިތައް ތަރައްޤީކުރުމަށް ކަމަށާއި، ޤައުމެއް ތަރައްޤީވުމުގައި އިމާރާތްތައް އެޅުމާއިއެކު، ސިކުނޑި އާއި ވިސްނުން ތަރައްޤީވާންޖެހޭނެ ކަމަށް ރައީސް ވަނީ ވިދާޅުވެފައެވެ. ހަމަ އެހެންމެ، ދަރިވަރުންގެ ކިބައިގައި ރަނގަޅު ތަރުބިއްޔަތެއް އަށަގަންނުވުމަކީ މައިންބަފައިންގެ ޒިންމާއެއް ކަމަށާއި، ތަޢުލީމީ ހަޔާތަކީ އެންމެ ބޭނުންތެރި ގޮތުގައި ދަރިވަރުންނާއި މައިންބަފައިންނާއި މުޖްތަމަޢަށް އަދި ޤައުމަށް ފައިދާވާނެގޮތަށް ބޭނުން ހިފާ ދުވަސްކޮޅަކަށް ހަދަންވާނެ ކަމަށް ރައީސް ވިދާޅުވިއެވެ.

ހަމަ އެއާއެކު، އަހަރެމެން މުސްލިމުންނަކީ މާތްވެގެންވާ އިސްލާމް ދީނުގައި ފައިތިލަ ސާބިތުކޮށްގެން ތިބި ބައެއްކަން އަބަދުވެސް ހަނދާނުގައި ބަހައްޓައި،  އިސްލާމް ދީނުގައި ކަނޑައަޅާފައި އޮންނަ ގޮތަށް ކަންކަން ތަރުތީބުކޮށް ހަޔާތުގެ ކޮންމެ ވަގުތުކޮޅެއް ހޭދަކުރުމަށް އެމަނިކުފާނު ވަނީ އެދިވަޑައިގެންފައެެވެ.

ފަރުޟު ފަސް ނަމާދު އަދާކުރުމަށް ހުރިހާ ދަރިވަރުންނަށް ވަރަށް ބޮޑަށް އިލްތިމާސްކުރަން. ވަގުތުން ވަގުތަށް ނަމާދުކުރުމަށް. ފަތިސް ނަމާދަށް ގަޑިއަށް ހޭލައި ފަތިސް ނަމާދުކޮށްގެން ދުވަސް ފެށުމަށް. މިކަމަށް އަޒުމު ކަނޑައެޅުމަށް ހުރިހާ ކުދިންނަށް އިލްތިމާސްކުރަން. މައިންބަފައިން ކިބައިން ވެސް އެދެން ހުރިހާ ކިޔަވާ ކުދިން ފަތިސް ނަމާދު ގަޑީގަިއ ތެދުވެ ނަމާދުކުރުވުން އެއީ މައިންބަފައިންގެ ޒިންމާއެއްގެ ގޮތުގައި ކަނޑައަޅައި އެކަން ކަށަވަރުކުރުމަށް.

ރައީސުލްޖުމްހޫރިއްޔާ ވިދާޅުވިއެވެ.

ރައީސް އިތުރަށް ވިދާޅުވީ، ދީނުގައި ކަންކަން ބަޔާންކޮށްފައި އޮންނަނީ ވަރަށް މާތް މަޤޞަދެއްގައި ކަމަށާއި، އެއީ ހަމައެކަނި ފޮތެއްގައި ލިޔެވިފައި އޮންނަންޖެހޭ ކަންކަމެއް ނޫން ކަމަށާއި ޢަމަލުން އެކަންތައްތައް ދައްކަންޖެހޭ ކަމަށެވެ.