ސްޕެޝަލް އިކޮނޮމިކް ޒޯންތަކުގައި ހިންގޭނެ މަސައްކަތްތަކާއި އިންވެސްޓްމަންޓުގެ އެންމެ ކުޑަ މިންގަނޑު ރައީސް ކަނޑައަޅުއްވައިފި

ދިވެހިރާއްޖޭގައި ޤާއިމުކުރާ ސްޕެޝަލް އިކޮނޮމިކް ޒޯން (އެސް.އީ.ޒެޑް) ތަކުގައި ހިންގިދާނެ އިޤްތިޞާދީ މަސައްކަތްތަކާއި، އެފަދަ ޒޯނެއްގައި ހިމެނޭނެ ޖުމުލަ އިންވެސްޓްމަންޓުގެ އެންމެ ކުޑަ މިންގަނޑު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އަލުން ކަނޑައަޅުއްވައިފިއެވެ.

 މިކަން އިޢުލާނުކުރައްވާފައިވަނީ މިއަދު ސަރުކާރުގެ ގެޒެޓުގައި ޝާއިޢުކުރެއްވި ނަންބަރު 1/2026 ޤަރާރުންނެވެ.

ސްޕެޝަލް އިކޮނޮމިކް ޒޯނުގެ ޤާނޫނުގެ 22 ވަނަ މާއްދާގެ ދަށުން، ބޯޑް އޮފް އިންވެސްޓްމަންޓްސްގެ މަޝްވަރާގެ މަތީން ރައީސުލްޖުމްހޫރިއްޔާ ކޮންމެ އަހަރަކު އެއްފަހަރު މި ކަންކަން މުރާޖަޢާކޮށް އިޢުލާނުކުރައްވަން ޖެހެއެވެ. އެގޮތުން މިއަދު ނެރުއްވި ޤަރާރަކީ މިދިޔަ އަހަރުގެ ޖަނަވަރީ މަހު ނެރުއްވި ޤަރާރު މުރާޖަޢާ ކުރެއްވުމަށްފަހު ނެރުއްވި އައު ކަނޑައެޅުންތަކެކެވެ.

އިންވެސްޓްމަންޓުގެ އެންމެ ކުޑަ މިންގަނޑު
ރައީސުލްޖުމްހޫރިއްޔާ ކަނޑައެޅުއްވި އައު މިންގަނޑުތަކަށް ބަލާއިރު، އެސްއީޒެޑްގައި ހިންގިދާނޭ އިޤްތިޞާދީ މަސައްކަތްތަކުގެ ތެރޭގައި ހިމެނެނީ ޖުމުލަ 100 މިލިޔަން އެމެރިކާ ޑޮލަރަށްވުރެ ކުޑަނޫން އިންވެސްޓްމަންޓްތަކެވެ. މީގެ އިތުރުން ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫޢުތަކެއް ނަމަ، އެ މަޝްރޫޢެއްގައި 500 މިލިޔަން އެމެރިކާ ޑޮލަރަށްވުރެ ކުޑަނޫން އިންވެސްޓްމަންޓެއް ހިމެނެންވާނެއެވެ.

މި ޤަރާރުގައި ޚާއްޞަގޮތެއްގައި ފާހަގަކުރައްވާފައިވަނީ، ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫޢުތަކުގައި މިނިމަމް އިންވެސްޓްމަންޓުގެ ގޮތުގައި ކަނޑައަޅާފައިވާ 500 މިލިޔަން އެމެރިކާ ޑޮލަރު ޚާއްޞަ ކުރަންވާނީ ސީދާ އެ ޓައުންޝިޕް ޑިވެލޮޕްމަންޓުގެ ކޮމްޕޯނަންޓްތަކަށް ކަމަށެވެ.

ޒޯންތަކުގައި ހިންގޭނެ މައިގަނޑު މަސައްކަތްތައް
ސްޓްރެޓީޖިކް އިންވެސްޓްމަންޓުތަކުގެ ގޮތުގައި 100 މިލިޔަން ޑޮލަރަށްވުރެ މަތީގެ އިންވެސްޓްމަންޓްތައް ހިމެނޭ 9 ދާއިރާއެއް ރައީސް ވަނީ ފާހަގަކުރައްވާފައެވެ. އޭގެ ތެރޭގައި ހިމެނެނީ:

• އެކްސްޕޯޓަށް އިސްކަންދީގެން ހިންގާ މެނުފެކްޗަރިންގ މަސައްކަތްތައް. 
• ޓްރާންސްޝިޕްމަންޓް ޕޯޓް، ލޮޖިސްޓިކްސް، އެއަރޕޯޓް އަދި ބަންކަރިންގ ފަދަ ޚިދުމަތްތައް. 
• ޔުނިވަރސިޓީ، ޓާޝަރީ ހޮސްޕިޓަލް އަދި ދުނިޔޭގެ ފެންވަރުގެ ރިސަރޗް ފެސިލިޓީތައް.
  
• އައި.ސީ.ޓީ ޕާކުތަކާއި އެއާ ގުޅޭ ވަސީލަތްތައް.
• އިންޓަރނޭޝަނަލް ފައިނޭންޝަލް ސަރވިސަސް އާއި ޓްރޭޑް ސެންޓަރުތައް. 
• އިޢާދަކުރަނިވި ހަކަތައިގެ ދާއިރާ. 
• ރާއްޖެއަށް އައު ޓެކްނޮލޮޖީ ތަޢާރަފުކުރުމުގެ މަސައްކަތްތައް.
• ފުޑް ސެކިއުރިޓީގެ ދާއިރާ.

ތެލާއި، ގޭހާއި، މިނަރަލް އެކްސްޕްލޮރޭޝަންގެ މަސައްކަތްތައް.
މި ނިންމެވުމާއެކު، ރާއްޖޭގެ އިޤްތިޞާދު ސިންދަފާތުކޮށް، ބޮޑެތި އިންވެސްޓްމަންޓްތައް ރާއްޖެއަށް ޝައުޤުވެރިކުރުވުމަށް މަގުފަހިވެގެންދާނެ ކަމަށް ބެލެވެއެވެ. މި ޤަރާރަށް މިއަދުން ފެށިގެން އަމަލުކުރަން ފަށާނެއެވެ.