މިއަދު ރާއްޖޭގެ ހުރިހާ ހިސާބަކަށްވެސް ނުރައްކާތެރި މިންވަރަށް ވައި ނުސާފު: މެޓް

މިއަދު ރާއްޖޭގެ ހުރިހާ ހިސާބަކަށްވެސް ނުރައްކާތެރި މިންވަރަށް ވައި ނުސާފުވާނެކަމަށް މޫސުމާ ބެހޭ ޤައުމީ އިދާރާ، މެޓް  އޮފީހުން ލަފާކޮށްފިއެވެ.

މެޓް އޮފީހުން މިއަދު ނެރުނު ބަޔާނެއްގައި ވިދާޅުވީ، ވޭތުވެދިޔަ 7 ދުވަހުގެ ތެރޭގައި ރާއްޖޭގެ ވައި އެންމެ ބޮޑަށް ނުސާފުވެފައި ވަނީ މިއަދު ކަމަށެވެ. އެގޮތުން، މިހާރު ރާއްޖެ ސަރަހައްދުގައި ވައި ނުސާފުވެފައިވުމުގެ ސަބަބުން، ދުރު ފެންނަ މިންވަރު 2 ކިލޯމީޓަރަށް ވުރެ ދަށްވެފައިވާ ކަމަށްވެސް މޫސުމާ ބެހޭ ޤައުމީ އިދާރާއިން ވިދާޅުވެއެއެވެ. އަދި ކުރިއަށް އޮތް ހަފްތާ ބަންދު ދެ ދުވަހުވެސް ވައި ނުސާފުވާނެކަމަށް އެ އިދާރާއިން ވަނީ ލަފާކޮށްފައެވެ.

މެޓުން އިތުރަށް ވިދާޅުވީ، ވައިގެ ނުސާފުކަން މިވަގުތު އެންމެ މަތީގައި އުޅެނީ ވިލިމާލެ ސަރަހައްދުގައި ކަމަށެވެ. އެގޮތުން، އެ ސަރަހައްދުގައި ހުންނަ އެއާ ކޮލިޓީ މޮނީޓަރިން ސިސްޓަމުން ދައްކާ ގޮތުގައި ވައިގެ ފެންވަރު ހުރީ 166 ގައެވެ. މިއީ  ޞިއްޙަތަށްވެސް ނުރައްކާވާ ފަދަ ދަރަޖައަކަށްވާއިރު، "އައިކިއު އެއާ" ގެ ތަފާސްހިސާބުތަކުން ދައްކާ ގޮތުގައި، ވިލިމާލޭގެ ވައިގައި ހިރަފުސް ކުނޑި ނުވަތަ ޕީއެމް 2.5 ހުރީ ދުނިޔޭގެ ޞިއްޙަތު ޖަމިއްޔާއިން ކަނޑައަޅާފައިވާ މިންގަނޑަށް ވުރެ 15.4 ގުނަ އިތުރަށެވެ.

Haze conditions have worsened across the Maldives, with visibility dropping below 2km. These conditions are expected to persist over the next 2 days across the country. pic.twitter.com/jhVP1EqrR8

— Maldives Meteorology (@MetMaldives) January 29, 2026

ވައި ނުސާފުވުމުގެ ސަބަބުން ނާޒުކު ހާލަތްތަކުގައިވާ ފަރާތްތަކުގެ ޞިއްޙަތަށް އިތުރު ނުރައްކާ ކުރިމަތިވެއެވެ. ނާޒުކު ހާލަތްތަކުގައިވާ ފަރާތްތަކުގެ ތެރޭގައި ތުއްތު ކުދިންނާއި ކުޑަކުދިން، އުމުރުން ދުވަސްވީ މީހުން، މާބަނޑު މީހުން، ނޭވާލާ ނިޒާމާއި ހިތުގެ ބައްޔަށް ފަރުވާ ކުރާ މީހުންނާއި އެލާޖީގެ މައްސަލަތައް ހުންނަ މީހުން ހިމެނެއެވެ. އެހެންކަމުން، މި ހާލަތުގައި ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ހަރަކާތްތައް މަޑު ޖައްސާލުމަށާއި، ބޭރަށް ނިކުންނަން ޖެހިއްޖެ ހާލަތްތަކުގައި N95 ނުވަތަ އެފަދަ މާސްކު އެޅުމަށް ވެސް އެޗްޕީއޭ އިން ވަނީ އިލްތިމާސްކޮށްފައެވެ.

މި އަންނަ ހުކުރު އަދި ހޮނިހިރު ދުވަހު ވައި ނުސާފުވުމުގެ މައްސަލަ ކޮންމެވެސް ވަރަކަށް ހައްލުވާނެކަމަށާއި، ނަމަވެސް ކުރިއަށް އޮތް ދެހަފްތާގައި ވެސް އެއްކޮށް ވައި ސާފުވާނެކަމަށް ނުދައްކާކަމަށް މެޓް އޮފީހުން ވިދާޅުވިއެވެ.