އިޖުތިމާޢީ ޢަދުލުވެރިކަން ޤާއިމުކޮށް، ރައްޔިތުންނަށް ހަމަހަމަ ފުރުޞަތުތަކެއް ހޯދައިދިނުމުގައި ސަރުކާރު ދެމިއޮންނާނެ: ރައީސް

ދުނިޔޭގެ އިޖުތިމާޢީ ޢަދުލުވެރިކަމުގެ ދުވަހުގެ މުނާސަބަތުގައި، ރާއްޖޭގެ ހުރިހާ ސަރަޙައްދެއްގައި ދިރިއުޅޭ ރައްޔިތުންނަށް ހަމަހަމަ ފުރުޞަތުތަކާއި، އިންސާނީ ކަރާމާތާއި ރައްކާތެރިކަން ކަށަވަރުކޮށްދިނުމަކީ ސަރުކާރުގެ މުހިންމު އަމާޒެއް ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

މި ދުވަހާ ގުޅޭގޮތުން ރައީސުލްޖުމްހޫރިއްޔާ ހިއްސާކުރެއްވި މެސެޖުގައި، ބައިނަލްއަޤްވާމީ މުޖުތަމަޢާއެކު ރާއްޖެއިން ސާބިތުކަމާއެކު އޮތްކަން ހާމަކުރައްވައި، ރާއްޖޭގެ ޖަޒީރާވަންތަ ރަށްތަކަށް ބޭނުންވާ އިޖުތިމާޢީ ޢަދުލުވެރިކަމުގެ މައްޗަށް އަލިއަޅުއްވާލެއްވިއެވެ. އެމަނިކުފާނު ވިދާޅުވީ، އިޖުތިމާޢީ ރައްކާތެރިކަމުގެ ނިޒާމުތައް ވަރުގަދަކުރުމާއި، ފެންވަރު ރަނގަޅު ޞިއްޙީ ޚިދުމަތާއި، އިތުބާރު ހުރި ދަތުރުފަތުރުގެ ނިޒާމެއްގެ އިތުރުން، އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމަށް ސަރުކާރުން ވަރަށް ބޮޑަށް އިސްކަންދޭނެ ކަމަށެވެ.

މީގެ އިތުރުން، މިންތީގެ ހަމަހަމަކަން ކުރިއެރުވުމަށާއި، އެކަށީގެންވާ ވަޒީފާގެ ފުރުޞަތުތަކާއެކު އިންސާފުވެރި އިޤްތިޞާދީ ފުރުޞަތުތައް ރައްޔިތުންނަށް ފަހިކޮށްދިނުމުގައި ސަރުކާރުން ދެމިއޮންނާނެ ކަމަށް ރައީސް ވިދާޅުވިއެވެ. އަދި ކޮންމެ ދިވެއްސަކަށްވެސް އުންމީދީ އަދި ރައްކާތެރި މުސްތަޤްބަލެއް ބިނާކުރުމުގެ ފުރުޞަތު ހޯދައިދިނުމަށްޓަކައި، ތަޢުލީމީ ދާއިރާއިންނާއި ހުނަރު ތަރައްޤީކުރުމުގެ ދާއިރާއިން އިންވެސްޓްމަންޓްތައް އިތުރުކުރަމުންދާކަން އެމަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ އިތުރަށް ވިދާޅުވީ، އިޖުތިމާޢީ ގޮތުންނާއި އިޤްތިޞާދީ ގޮތުން ތަފާތުތަކާއި ގޮންޖެހުންތައް ހުރި ނަމަވެސް، އެކަންކަން ޙައްލުކުރުމުގައި ސަރުކާރުގެ އަޒުމަށް ބަދަލެއް ނާންނާނެ ކަމަށެވެ. އަދި އޯގާތެރިކަމާއި އެކަކު އަނެކަކަށް އަޅާލުމުގެ ރޫޙެއްގައި، އެންމެން ގުޅިގެން ދެމެހެއްޓެނިވި މުސްތަޤްބަލެއް ބިނާކުރުމަށް މަސައްކަތް ކުރައްވާނެ ކަމުގެ ޔަޤީންކަން ރައީސުލްޖުމްހޫރިއްޔާ ދެއްވިއެވެ.

On this World Day of Social Justice, we stand in solidarity with the global community and reflect on what this day truly means for us in the Maldives. It is about ensuring that people across our geographically dispersed islands have equitable access to opportunity, dignity, and… pic.twitter.com/A8NvCwNdtI

— Dr Mohamed Muizzu (@MMuizzu) February 20, 2026