ޚަބަރު
ކުޅަދާނަ އެކްޓަރު އަދި ޑައިރެކްޓަރު އަޙްމަދު ނިމާލް ނިޔާވުމުގެ ހިތާމައިގައި ރައީސުލްޖުމްހޫރިއްޔާ ތަޢުޒިޔާ ފޮނުއްވައިފި
ނިމާލް--
ކުޅަދާނަ އެކްޓަރު އަދި ޑައިރެކްޓަރު އަޙްމަދު ނިމާލް ނިޔާވުމުގެ ހިތާމައިގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ފޮނުއްވައިފި އެވެ.
މަޢުލޫމާތު ލިބޭގޮތުގައި ނިމާލް ނިޔާވެފައި ވަނީ، މިދިޔަ ޑިސެމްބަރު މަހު ޖެހުނު ސްޓްރޯކް އަށް ވެންޓިލޭޓަރުގައި ފަރުވާދެމުންދަނިކޮށް މިއަދު ހެނދުނުގެ ވަޤުތެއްގައި އިންދިރާ ގާނދީ މެމޯރިއަލް ހޮސްޕިޓަލުގައެވެ.
މިކަމާއި ގުޅިގެން ރައީސުލްޖުމްހޫރިއްޔާ 'އެކްސް' ގައި ކުރެއްވި ޕޯސްޓެއްގައި ވިދާޅުވީ، ތަމްސީލުކުޅުމުގެ ރޮނގުން ހިތްވަރުދިނުމުގެ ޤައުމީ އިނާމު ޙާޞިލްކުރައްވާފައިވާ ކުޅަދާނަ އެކްޓަރު އަދި ޑައިރެކްޓަރު އަޙްމަދު ނިމާލް ނިޔާވުމުގެ ހިތާމައިގައި އެ ޢާއިލާއަށް ތަޢުޒިޔާ ދަންނަވާ ކަމަށެވެ. ހަމަ އެހެންމެ، މާތްﷲގެ ރުއްސެވުމާއި ފުއްސެވުމުގައި މަރްޙޫމް މުޙައްމަދު ނިމާލް ލަހައްޓަވައި، ސުވަރުގޭގެ ދާއިމީ ނިޢުމަތް ދެއްވުމަށް ރައީސް ވަނީ ދުޢާ ދަންނަވާފައެވެ.
ނިމާލްއަކީ ދިވެހި ފިލްމް އިންޑަސްޓްރީގައި 1984 ވަނަ އަހަރުން ފެށިގެން މަސައްކަތް ކުރަމުން އަންނަ ފަންނާނެކެވެ. އަދި މިހާރު އުމުރުން 62 އަހަރުވެފައިވާއިރު، ފިލްމު ޑައިރެކްޓުކުރުމުގެ އިތުރުން، ފާއިތުވި އަހަރު ނިކުތް ފިލްމުތަކުގައި ވެސް އޭނާ ވަނީ އެކްޓަރެއްގެ ގޮތުގައި ހަރަކާތްތެރިވެފައެވެ. ނިމާލްއަކީ ޑައިރެކްޓް ކުރުމާއި އެކްޓަރެއްގެ އިތުރުން، ބައެއް ވާހަކަތައް ލިޔެ ސްކްރީންޕްލޭ ވެސް ލިޔެފައިވާ ފަރާތެކެވެ.
ނިމާލްގެ ކަށުނަމާދު ކުރުމަށް ހަމަޖެހިފައިވަނީ މިއަދުގެ އަސުރު ނަމާދަށްފަހު މާލޭގައި ހުންނަ މަސްޖިދުއްތަޢާވުނި (އާސަހަރާ) މިސްކިތުގައެވެ.
Ads by MSS
