ފްލެޓް އަތެއް ނުލާނަން އެކަމަކު ދޮގު މަޢުލޫމާތު ދީފައިވާ ފަރާތްތައް ކެންސަލްވާނެ: ރައީސް މުޢިއްޒު

ސަރުކާރަށް އެއް އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައި ރައީސް މުޙައްމަދު މުޢިއްޒު މުޙައްމަދު ދީދީ ވިދާޅުވެފައިވަނީ، ކުރީގެ ސަރުކާރުން ގެޒެޓް ކޮށްފައިވާ ފްލެޓު ލިސްޓު އަތުލުމަކީ މި ސަރުކާރުން ކުރާނެ ކަމެއް ނޫން ކަމަށެވެ. ނަމަވެސް، ދޮގު މަޢުލޫމާތު ދީގެން ނުވަތަ މަކަރު ހަދައިގެން ފްލެޓު ހޯދާފައިވާ ފަރާތްތައް ލިސްޓުން ކެންސަލްވާނެ ކަމަށް އެމަނިކުފާނު ވިދާޅުވިއެވެ.

ރައީސް މުޢިއްޒު ވިދާޅުވި ގޮތުގައި، ރަނގަޅު އަދި ތެދު މަޢުލޫމާތު ހުށަހަޅާފައިވާ ފަރާތްތަކުގެ ގޯތި ނުވަތަ ފްލެޓު އަތުނުލާނެއެވެ. އަދި ހުޅުމާލެ ފޭސް 2 އިން ގޯތި ދޫކޮށްފައިވަނީ މި އުސޫލުންކަމަށް ވެސް އެމަނިކުފާނު ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވި ގޮތުގައި، ހުޅުމާލެ ފޭސް 3، ގުޅިފަޅު އަދި ގިރާވަރުފަޅު ހިއްކުމުގެ މަޝްރޫޢު ނިމުމުން އެ ސަރަޙައްދުތަކުން ވެސް ގޯތި ދޫކުރެވޭނެއެވެ.

ކުރީގެ ސަރުކާރުން ހުޅުމާލޭގައި އިމާރާތްކުރަން ފެށި 4،000 ފްލެޓު ލިބޭ ފަރާތްތަކުގެ ލިސްޓު ރިވިއުކޮށް، މިދިޔަ މަސް ނިމުމުގެ ކުރިން އާންމުކުރާނެ ކަމަށް ކުރިން އިޢުލާންކޮށްފައިވީ ނަމަވެސް، އަދިވެސް އެ ލިސްޓު އާންމުކުރެވިފައެއް ނުވެއެވެ. މިކަމާ ގުޅިގެން ހައުސިންގ މިނިސްޓްރީއަށް ބަޔަކު އެއްވެ ހިތްހަމަނުޖެހުން ފާޅުކޮށްފައިވެއެވެ.

ރައީސް މުޢިއްޒު ވިދާޅުވި ގޮތުގައި، ފްލެޓު ލިސްޓުގައި ބަލަންޖެހޭ ކަންތައްތައް ވަރަށް ގިނައެވެ. އޭގެ ތެރޭގައި، ކުރީގެ ސަރުކާރުން އުފެއްދި ފްލެޓު ކޮމިޓީގެ ސިޔާސީ މެންބަރުންނަށް އުސޫލާ ޚިލާފަށް ފްލެޓު ލިބޭ ގޮތަށް މާކްސް ބަދަލުކޮށްފައިވާ ކަމަށް އެމަނިކުފާނު ވިދާޅުވިއެވެ. މީގެ އިތުރުން، ކުރީގެ ސަރުކާރުގެ އިސްވެރިންގެ ޢާއިލާ މެންބަރުންނާއި ނުފޫޒު ގަދަ ޢާއިލާތަކުގެ ގިނަ ބަޔަކަށް ފްލެޓުތައް ބަހާލާފައިވާ ކަމަށް ވެސް ރައީސް މުޢިއްޒު ވިދާޅުވިއެވެ.

އުސޫލާ ޚިލާފަށް ބައެއް ފަރާތްތަކަށް ފްލެޓު ދިނުމަށްޓަކައި ޕޯޓަލްގެ ބެކްއެންޑުން މާކްސް ޝީޓު ބަދަލުކޮށްފައި އެބަހުރި. ދެން އެ ބޭފުޅުން ކިހާ ވަރަކަށް މިކަމާ އުޅޭނެ ނޫންތޯ؟   

ރައީސް މުޢިއްޒު

ރައީސް މުޢިއްޒު އިތުރަށް ވިދާޅުވި ގޮތުގައި، މި ހުރިހާ ކަމެއް ބަލައި، އިންސާފުވެރިކަމާއެކު މި މައްސަލަ ނިންމާނެކަމަށް އެމަނިކުފާނު ވިދާޅުވިއެވެ. އަދި ފްލެޓު ލިބޭ ފަރާތްތަކުގެ ލިސްޓު ނެރުމުގައި ލަސްވަމުންދާ ސަބަބަކީ މި ހުރިހާ ކަމެއް ބަލަމުންދާތީ ކަމަށްވެސް ރައީސް މުޢިއްޒު ވިދާޅުވިއެވެ.

ފްލެޓު ލިސްޓުގައި މި ވެގެން އުޅޭ ގޮތަކީ ހައުސިންގ މިނިސްޓްރީން ވަރަށް ގިނަ ވަގުތު ހޭދަކުރޭ އެކަމުގައި. އަދި އެކަމަށްޓަކައި ނަގާފައި އޮތް ކޮމެޓީތަކުން ވެސް އެކަން އޯވަސީ ކުރަމުން އެ ގެންދަނީ. އެކަން މި ކުރަނީ އެއްވެސް ފަރާތެއްގެ ނުފޫޒު އެއަށް ނުވަންނަ ގޮތަށް، އެއްވެސް ފަރާތެއްގެ ނުފޫޒެއް ނުފޯރުވޭނެ. އެކަމެއް ނުކުރެވޭނެ  

ރައީސް މުޢިއްޒު

އެމަނިކުފާނު އިތުރަށް ވިދާޅުވި ގޮތުގައި، ސަރުކާރުގެ މަޤްޞަދަކީ ނަޒާހަތްތެރިކަމާއި އިންސާފުވެރިކަމާއެކު، އިޢުލާންކޮށްފައިވާ ޝަރުޠުތަކާއި ޕޮއިންޓް ދިނުމުގެ ނިޒާމާ އެއްގޮތަށް 4،000 ފްލެޓު ދޫކުރުމެވެ.

އެ ތަރުތީބުން ލިބޭ 4،000 މީހުންނަށް އެ ފްލެޓުތައް ދެވޭނީ. ޑޮކިއުމަންޓް އޮޅުވާލައިގެން ނޫނީ އެހެން ގޮތަކުން ލާފައި އިން މީހެއް ވިއްޔާ އެއީ އަބަދު ވެސް ކެންސަލް ވާނެ ކަމެއް، އެކަން އަޅުގަނޑު ކުރިން ވެސް ދަންނަވާފައި އޮންނާނެ 

ރައީސް މުޢިއްޒު

މީގެ އިތުރުން، ބައެއް ފަރާތްތަކުން ހަމައެކަނި އައިޑީ ކާޑު ހުށަހަޅައިގެން ވެސް ފްލެޓު ލިބިފައިވާ ކަމަށް ރައީސް މުޢިއްޒު ވިދާޅުވިއެވެ. އަދި މި ހުރިހާ ކަމަކާ ގުޅޭ ތަފްޞީލުތައް އާންމުކުރާނެ ކަމަށްވެސް އެމަނިކުފާނު ވިދާޅުވިއެވެ.

ރައީސް މުޢިއްޒުގެ މި ބަސްފުޅުތަކުން އެނގިގެންދަނީ، ފްލެޓު ލިބޭ ފަރާތްތަކުގެ ލިސްޓު އެކުލަވާލުމުގައި ދިމާވެފައިވާ ގޮންޖެހުންތަކާއި، އެކަން ޙައްލުކުރުމަށް ސަރުކާރުން ކުރަމުންދާ މަސައްކަތްތަކެވެ. އަދި ކުރީގެ ސަރުކާރުން ފްލެޓު ދޫކުރުމުގައި ހިނގާފައިވާ ކަމަށް ބެލެވޭ އޮޅުވާލުންތަކާއި ކޮރަޕްޝަންގެ ޢަމަލުތަކުގެ މައްޗަށް ވެސް އަލިއަޅުވާލެވިގެން ދިޔައެވެ.