ކުދި ވިޔަފާރިތަކަށް ދޭންޖެހޭ ފައިސާގެ ތެރެއިން އަންނަ ހަފްތާ 200 މިލިއަން ރުފިޔާ ދޫކުރާނެ: ރައީސް

ކުދި އަދި މެދުފަންތީގެ ވިޔަފާރިތަކަށް ދޭންޖެހޭ ފައިސާގެ ތެރެއިން އަންނަ ހަފްތާގައި އެކަނި ވެސް 200 މިލިއަން ރުފިޔާ ދޫކުރުމަށް ނިންމާފައިވާކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެ މަނިކުފާނު މިފަދައިން ވިދާޅުވީ، ނޫސްވެރިންނާ ބައްދަލުކުރެއްވުމަށް މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި ބައްދަލުކުރެއްވުމުގައި ދިވެހިރާއްޖޭގެ އިޤްތިޞާދީ ހާލަތަށް އަލިއަޅުވާލައްވައި ވާހަކަފުޅުދައްކަވަމުންނެވެ.

އެގޮތުން ރައީސް ވިދާޅުވީ، ކުދި އަދި މެދުފަންތީގެ ވިޔަފާރިތަކަށް ދޭންޖެހޭ ފައިސާގެ ތެރެއިން އަންނަ ހަފްތާ ދޫކުރާނީ، ސަރުކާރުން ފައިސާ ދޭންޖެހޭ އަމިއްލަ ކުދި ވިޔަފާރި ކުންފުނިތަކުގެ ތެރެއިން 1 މިލިޔަން ރުފިޔާއަށްވުރެ މަދުން ފައިސާ ދޭންހުރި ކުންފުނިތައް ކަމަށެވެ. އަދި އެ ފައިސާ ދޫކުރަމުން ރާއްޖެއިން ބޭރަށް ދައްކަން ހުރި ދަރަނި ދެއްކޭ މިންވަރަށް ފައިސާ އެއްކޮށްފައިވާކަމަށް ވެސް ވަނީ ވިދާޅުވެފައެވެ. 

މި ބައްދަލުކުރެއްވުމުގައި ރައީސް ވިދާޅުވެފައި ވަނީ ކުދި ވިޔަފާރިތަކަށް ސަރުކާރުން ދޭންހުރި ފައިސާގެ ކޮންމެވެސް މިންވަރެއް ކޮންމެ ހަފުތާއެއްގައި ދެމުންދާ ކަމަށާއި، އަދި ސަރުކާރުން އިސްކަން ދެނީ ކުދި އަދަދުތަކުން ފައިސާ ދޭންހުރި ބިލުތައް ނިންމުމަށްކަމަށެވެ.

"ކުރިއަށްއޮތް ހަފުތާއަކީވެސް މިގޮތުން ކުދި ވިޔަފާރިތަކަށް ރާއްޖޭގައި މަސައްކަތްކުރާ ކުދި ވިޔަފާރިތަކުން ނުވަތަ ކުންފުނިތަކުން ސަރުކާރުން ކޮށްފައި ހުރި މަސައްކަތްތަކަށް ދޭންހުރި ފައިސާގެ މަދުވެގެން 200 މިލިޔަން ރުފިޔާ ދޭނެ ހަފުތާއެއް. ކޮންމެ ހަފްތާއަކުވެސް ކޮންމެވެސް އަދަދެއް އެބަދެން. އަޅުގަނޑުމެން އިސްކަން މިދެނީ ކުދި އެމައުންޓްސްތަކުން ޕޭކުރަންހުރި ވެންޑާސްތަކަށް. މިއަންނަ ހަފުތާގައި އަޅުގަނޑުމެން ދޭނީ 1 މިލިޔަން ރުފިޔާއަށްވުރެ މަދުން ފައިސާ ދޭންހުރި ބިލްތަކަށް." ރައީސް ވިދާޅުވިއެވެ. 

ކުދި އަދި މެދު ފަންތީގެ ވިޔަފާރިތައް މާލީ ގޮތުން ކުރިއެރުވުމަށް މިދިޔަ އަހަރުގެ ތެރޭގައިވެސް އެ ފަރާތްތަކަށް ފައިސާ ދޫކުރުމަށް ގިނަގުނަ މަސައްކަތްތަކެއް ސަރުކާރުން ވަނީ ކޮށްފައެވެ. އެގޮތުން ސަރުކާރުން ރާއްޖޭގެ ވިޔަފާރިތަކުގެ ބިލުތަކަށް މިދިޔަ އަހަރު 6.3 ބިލިޔަނަށްވުރެ ގިނަ ރުފިޔާ ދައްކާފައިވެއެވެ.

ސަރުކާރުން ކުރައްވަމުން ގެންދަވާ މަސައްކަތާއިއެކު ކުދި އަދި މެދު ފަންތީގެ ވިޔަފާރިތައް މާލީ ގޮތުން ބާރުވެރިކުރެވިގެންދާނެކަމަށް ސަރުކާރުން ވިދާޅުވެއެވެ. އަދި މީގެ ސަބަބުން މިއަހަރަކީ ކުދި އަދި މެދު ފަންތީގެ ވިޔަފާރިތަކުގެ އަހަރަށް ވެގެންދާނެ ކަމަށްވެސް ސަރުކާރުން ވަނީ ވިދާޅުވެފައެވެ.