ކުރިއަށް އޮތް ރޯދަމަހު ކޮންމެ ގެއަކަށް ސަރުކާރުން މަސްދަޅުކޭހެއް ދެނީ

އަންނަ އަހަރުގެ ރޯދަމަހު ކޮންމެ ގެއަކަށް ސަރުކާރުން މަސްދަޅު ކޭހެއް ދޭނެ ކަމަށް ރައީސް ޑރ. މުޙައްމަދު މުޢިއްޒު  ވިދާޅުވެއްޖެ އެވެ. މި ސަރުކާރަށް އެއް އަހަރު ފުރުމާ ގުޅިގެން ރޭގަ ސޯޝަލް ސެންޓަރުގައި ބޭއްވުނު ޖަލްސާގައި ވާހަކަފުޅު ދައްކަވަމުން ރައީސް މި ވާހަކަ ހާމަކުރެއްވިއެވެ.

ކުރިއަށް އޮތް ރަމަޟާން މަހަށް އަޅުގަނޑުމެން ގަސްދުކުރަނީ، އެސްޓީއޯގެ އެމްޑީ އަށް އަޅުގަނޑު ދަންނަވައިފިން ކާޑުގެ ބަދަލުގައި ކޮންމެ ގެއަކަށް މަސްދަޅު ކޭހެއް ހިލޭ ދޭން

ރައީސް ވިދާޅުވިއެވެ.

މީގެ އިތުރުން، މި އަހަރުގެ ރޯދަމަހު ސަރުކާރުން ދެއްވި އެހީތެރިކަމުގެ ވާހަކަ ވެސް ރައީސް ފާހަގަކުރެއްވިއެވެ. އޭގެ ތެރޭގައި ކަރަންޓާއި ފެން ބިލުން 142 މިލިއަން ރުފިޔާގެ ޑިސްކައުންޓެއް ދެއްވި ކަމަށާއި، 82,000 ގޭބީސީއަކަށް 1.6 މިލިއަން ކިލޯގެ ކާޑުގެ ބާވަތްތައް ހިލޭ ދެއްވި ކަމަށް ވިދާޅުވިއެވެ.

އަދި ހަމަ އެހެންމެ، ގެދޮރުގެ އަގުތައް ކުޑަކުރުމާއި، ހިޔާ ފްލެޓްތަކުގެ ފިނިޝިންގ މަސައްކަތްތަކަށް ކުރި ހަރަދު ފްލެޓްގެ އަގުން އުނިކޮށްދިން ކަމަށް ވެސް ރައީސް ފާހަގަކުރެއްވިއެވެ. މީގެ އިތުރުން، އިޖުތިމާއީ ބޯހިޔާވަހިކަމަށް ދޫކޮށްފައިވާ ތަންތަނަށް އަރާފައިވާ 77 މިލިއަން ރުފިޔާގެ ޖޫރިމަނާ ވެސް މާފުކޮށްދިން ކަމަށް ރައީސް ވިދާޅުވިއެވެ.

މި ނިންމުންތަކަކީ ރައްޔިތުންނަށް ލުއިފަސޭހަކަން ހޯދައިދިނުމަށް ސަރުކާރުން އަޅުއްވާ ފިޔަވަޅުތަކުގެ ތެރެއިން ބައެއް ކަމަށް ރައީސް ފާހަގަކުރެއްވިއެވެ.