ބޭރުފައިސާގެ ޤަވާއިދަށް ގެނައި އިސްލާހު ބަދަލު ނުކުރައްވާނެ ކަމަށް ރައީސް މުޢިއްޒު ވިދާޅުވެއްޖެ

ބޭރުފައިސާގެ ޤަވާއިދަށް ގެނައި އިސްލާހު ބަދަލު ނުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ސަރުކާރަށް އެއް އަހަރު ފުރުމާއި ގުޅިގެން ޒުވާނުންގެ މަރުކަޒުގައި އިއްޔެ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ބޭރުފައިސާގެ ޤަވާއިދަށް ބަދަލު ގެނައުމަށް ސަރުކާރުން ނިންމެވި ސަބަބުތަކުގެ މައްޗަށް އަލިއަޅުއްވަމުން ރައީސުލްޖުމްހޫރިއްޔާ ވިދާޅުވީ ތެލަށް ކުރާ ޚަރަދާއި ކާބޯތަކެތި ގަތުމަށް ކުރާ ޚަރަދުތައް އިންތިހާއަށް ބޮޑުކަމަށެވެ. ރައީސް ވިދާޅުވީ، ދައުލަތަށް ލިބޭ އާމްދަނީން އެކަންކަން ދެކޮޅުނުޖެއްސޭ ކަމަށެވެ.

ރައީސް ހިއްސާކުރެއްވި ތަފާސްހިސާބުތަކުން ދައްކާގޮތުގައި، ރާއްޖެއަށް މިދިޔަ އަހަރު އާމްދަނީ ގޮތުގައި 950 މިލިޔަން ޑޮލަރު ލިބިފައިވާއިރު، އޭގެ ތެރެއިން 750 މިލިޔަން ޑޮލަރު ހަމައެކަނި ތެލަށް ހޭދަވާ ކަމަށެވެ. މީގެ އިތުރުން ކާބޯތަކެއްޗަށް 675 މިލިޔަން ޑޮލަރު ހޭދަވާކަން ފާހަގަކުރައްވާ އެމަނިކުފާނު ވިދާޅުވީ، ސަރުކާރުން ދަރަނި ދެއްކުމަށް އެކަނިވެސް 507 މިލިޔަން ޑޮލަރު ހޭދަކުރާ ކަމަށެވެ.

އާންމުންގެ ބޭންކު ކާޑުތަކަށް 200 މިލިޔަން ޑޮލަރު ބޭނުންވާއިރު، ބޭރުގައި ކިޔަވާ ދަރިވަރުންނަށް 37 މިލިޔަން ޑޮލަރު ބޭނުންވާކަމަށްވެސް ރައީސް ވިދާޅުވިއެވެ. މި ހުރިހާ ކަމަކަށް ބޭނުންވާ ޑޮލަރު ސަރުކާރު ހިއްސާވާ ކުންފުނިތަކުންވެސް ގަންނަން ޖެހެނީ ބޭރު ފައިސާގެ ކަޅު ބާޒާރުން އަގުބޮޑުކޮށް ކަމަށް ރައީސް ފާހަގަކުރެއްވިއެވެ.

ބޭރުފައިސާގެ އައު ޤަވާއިދުގެ ސަބަބުން ޤައުމަށް ބޮޑެތި ފައިދާތަކެއް ލިބިގެންދާނެ ކަމަށް ރައީސް ވިދާޅުވިއެވެ. މިއަންނަ ޖެނުއަރީ މަހުން ފެށިގެން ބޭރުފައިސާގެ ޤަވާއިދު ތަންފީޒުވާން ފެށުމުން، ޤަވާއިދާއި އެއްގޮތަށް ކަން ހިނގާނަމަ ލިބޭނެ ބައެއް ފައިދާތައް އެމަނިކުފާނު ހިއްސާކުރެއްވިއެވެ.

ބައެއް ރިސޯޓުތަކުން ޤަވާއިދަށް ޢަމަލު ނުކުރާނެ ކަމަށް ބުނަމުންދާއިރު، ރައީސުލްޖުމްހޫރިއްޔާ ވަނީ ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކަށް ރައްޔިތުންގެ ފަޅިއަށް އައުމަށް ދަޢުވަތު ދެއްވާފައެވެ. އަދި ޤަވާއިދު ތަންފީޒު ކުރައްވާނެ ކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.

އަޅުގަނޑުމެން ނެތީން މި ޤަވާއިދު ބަދަލު ކުރަން. ވަރަށް ސާފުކޮށް މި ދެންނެވީ ޤަވާއިދު ބަދަލެއް ނުކުރާނަމޭ. 500 ޑޮލަރު މާރުކުރައްވަން ޖެހިވަޑައިގަންނަވާނެއޭ. ޤަވާއިދަށް ތަބާވުމަކީ އެންމެންގެ މައްޗަށް ލާޒިމް ކަމެކޭ ރައީސް

މުޢިއްޒު ވިދާޅުވިއެވެ.

އިތުރަށް ވާހަކަފުޅު ދައްކަވަމުން ރައީސް ވިދާޅުވީ،

މިއީ ޤާނޫނު އަސާސީއާއި އެއްގޮތަށް ކުރާކަމެއް. ޤާނޫނުތަކާއި އެއްގޮތަށް ކުރާކަމެއް. މިކަން އިތުރަށް ތަންފީޒުކުރުމަށް ފަހިކޮށްދިނުމަށް އެކަމަށް ހާއްސަ ފޮރެކްސް ޤާނޫނެއް މަޖިލިސް ތެރެއިން ފާސްކޮށްދޭނަން

މިފަދައިންނެވެ.

ބޭރު ފައިސާއާބެހޭ ޤަވާއިދުގެ ދަށުން އޭ ކެޓަގަރީޭ ކެޓަގަރީގައި ހިމެނެނީ ރިސޯޓުތަކާއި، ބޮޑެތި ހޮޓާތަކާއި ޓުއަރިސްޓް އުޅަނދުތަކެވެ. މި ތަންތަނުން ކޮންމެ ފަތުރުވެރިޔަކަށް 500 ޑޮލަރުގެ ރޭޓުން ބޭންކަށް ރުފިޔާ މާރުކުރަން ލާޒިމް ކުރެއެވެ. ބީ ކެޓަގަރީގައި ހިމެނެނީ ގެސްޓް ހައުސްތަކާއި މީހުން ދިރިއުޅޭ ރަށްރަށުގައި ހިންގާ ހޮޓާތަކެވެ. މިތަންތަނުން ޚިދުމަތް ހޯދާ ކޮންމެ ފަތުރުވެރިއަކަށް މާރުކުރަންޖެހޭ ރޭޓަކީ 25 ޑޮލަރެވެ.

އެމްއެމްއޭއިން ވަނީ ޤަވާއިދުގައި ބަޔާންކޮށްފައިވާ އަދަދަށް މާރުކުރުމުގެ ދަތިކަން ހުރި ފަރާތްތަކަށް އެއަށް ވުރެ މަދުން މާރުކުރުމުގެ ހުއްދައަށް އެދެވޭނެކަން ފާހަގަކޮށްފައެވެ.

ރައީސް މުޢިއްޒު ވިދާޅުވި ގޮތުގައި، މި ޖެނުއަރީ މަހުން ފެށިގެން ބޭރުފައިސާގެ ޤަވާއިދު ތަންފީޒުވާން ފެށުމުން، ޤަވާއިދާއި އެއްގޮތަށް ކަން ހިނގާނަމަ ލިބޭނެ ބައެއް ފައިދާތަކުގެ ތެރޭގައި:

• 2025ގެ ޖުލައި މަހުން ފެށިގެން އެސްއޯއީތަކަށް ބޭންކު ރޭޓުގައި ޑޮލަރު ލިބެން ފެށުން
  
• 2026ގެ ފުރަތަމަ ކުއާޓަރުގެ ތެރޭގައި ފުރާ ކޮންމެ މީހަކަށްދޭ 500 ޑޮލަރު 1000 ޑޮލަރަށް ބަދަލު ކުރެވުން
  
• ކްރެޑިޓް ކާޑް ލިމިޓް 1400 ޑޮލަރާއި ހަމައަށް އިތުރުކުރެވުން
  
• ވިޔަފާރިވެރިންނަށް ޓީޓީ ކުރަން ޑޮލަރު ލިބޭ ނިސްބަތް ޖުލައި 2025އިން ފެށިގެން އިތުރުކުރެވުން

މި ކަންކަން ހިމެނެއެވެ. ރައީސުލްޖުމްހޫރިއްޔާ ވަނީ ޤަވާއިދާއި އެއްގޮތަށް ޑޮލަރު މާރުކުރަން ފެށިއްޖެ ކަމަށް ވާނަމަ، އެކަންކަން ތަންފީޒުވާނެ ކަމުގެ ޔަޤީންކަން ދެއްވާފައެވެ.