ޕީއެންސީގެ ކޮންގްރެސް އަންނަ އޮކްޓޫބަރަށް ތާވަލުކޮށްފި

ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ކޮންގްރެސް އަންނަ އޮކްޓޫބަރުމަހު ބޭއްވުމަށް ތާވަލުކޮށްފައިވާކަމަށް، ޕާޓީގެ ރައީސް އަދި ރާއްޖޭގެ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެ މަނިކުފާނު މިކަން ހާމަކުރެއްވީ ޕީއެންސީއިން ރޭ އާރޓިފިޝަލް ބީޗްގައި ބޭއްވި ޚާއްޞަ ހަރަކާތުގައި ވާހަކަފުޅު ދައްކަވަމުންނެވެ. 

މި މަޢުޟޫގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ޕީއެންސީއަކީ ޕާޓީ ނިޒާމަށް ފުރިހަމައަށް ތަބާވާ، އެ ނިޒާމު ކުރިއެރުވުމަށާއި ޑިމޮކްރަސީއަށް ލޯބިކުރާ ޕާޓީއެއްކަމަށެވެ. އަދި އެ ޕާޓީއިން މަސައްކަތްކުރާނީ ރައްޔިތުންގެ މަސްލަޙަތު އިސްކޮށް، އެއް ޓީމެއްގެ ގޮތުގައިކަމަށެވެ. 

އަދި މި ކޮންގްރެސްއަކީ ޕީއެންސީގެ ތެރެއިން ސިޔާސީގޮތުން ކުރިއަށްދިއުމަށްޓަކާ ބޭނުންވާ ފަރާތްތަކަށް ލިބޭ ވަރަށް މުހިއްމު ފުރުޞަތެއްކަން ފާހަގަކުރެއްވިއެވެ.

މި ކޮންގްރެސްއަކީ ވަރަށް އިންސާފުވެރިކަމާއެކީ އަޅުގަނޑުމެން ބާއްވާނެ ވަރަށް ދެފުށްފެންނަ ވަރަށް ފުރިހަމަ ކޮންގްރެސްއަކަށް އިރާދަކުރެއްވިއްޔާ ވާނެ. މި ޕާޓީން ކަންކަން ކުރާނީ އަބަދުވެސް އަޅުގަނޑުމެން ކުރާގޮތަށް ވަރަށް އޯގަނައިޒްޑްކޮށް، ވަރަށް ތަރުތީބުން ދެފުށްފެންނަ ގޮތަށް.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސް ވިދާޅުވީ، ޕީއެންސީގެ މަސައްކަތްތައް 2023 ވަނަ އަހަރުގެ ނޮވެމްބަރުގައި 3,000 މެންބަރުންނާއެކު ފެށުނު ނަމަވެސް، މިހާރު އެ އަދަދު 75،000 އަރާފައިވާކަމަށެވެ. އަދި އެ ޕާޓީގެ އަމާޒުހުރީ މެންބަރުންގެ އަދަދު އެއްލައްކައަށްވުރެ އިތުރުކުރުންކަމަށް އެމަނިކުފާނު ވިދާޅުވިއެވެ.