ހުޅުމާލެ ފޭސް ތިނެއްގެ 38 އިންސައްތަ ހިއްކާ ނިމިއްޖެ

ހުޅުމާލެ ފޭސް 3 ހިއްކުމުގެ މަޝްރޫޢުގެ 38 އިންސައްތަ މަސައްކަތް ނިމިފައިވާކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. 

އެމަނިކްފާން ވިދާޅުވީ މި ސަރުކާރު ހަވާލުވިއިރު އެސަރަޙައްދުގެ 17 އިންސައްތަ ހިއްކާފައިވާއިރު، މިހާރު 38 އިންސައްތަ ހިއްކާ ނިމިފައިވާކަމަށެވެ. އަދި ކުރިއަށް އޮތް 6 މަސްދުވަހުގެ ތެރޭގައި އެތަން ހިއްކާ ނިންމާލެވޭނެކަމަށްވެސް ރައީސް ވިދާޅުވިއެވެ.

ގުޅިފަޅު ހިއްކަން ފަށާފައި އޮތީ 44 ޕަސެންޓް މަސައްކަތް ނިންމާފަ. އަޅުގަނޑުމެން ވާނީ މިހާރު އެބައި އެއްކޮށް ހިއްކާ ނިންމާފައި. މުޅި ޕްރޮޖެކްޓްގައި އަޅުގަނޑުމެން އިތުރަށް ހިއްކަން ބުނި ބައި، އެއީ އެންމެ ފުން ސަރަޙައްދު، އެތަންވެސް އިރާދަކުރެއްވިއްޔާ ވަރަށް އަވަހަށް ހިއްކަން ބަޔަކާ ހަވާލުކުރާނަން. އެތަން ނުލާ ބަލައިފިއްޔާ އެއްކޮށް ހިއްކާ ނިމިއްޖެ، އެތަން ލައިގެން ގާތްގަނޑަކަށް 70 ޕަސެންޓް އެއޮތީ ހިއްކިފަ. މިއަންނަ އަހަރުތެރޭގަ އިރާދަކުރެއްވިއްޔާ މުޅި ގުޅީފަޅު ހިއްކާ ނިންމަދޭނަން. ރައީސް މުޢިއްޒު

ގިރާވަރު ފަޅުގެ ހިއްކުމުގެ މަސައްކަތްވެސް ކުރިއަށްދާކަމަށް ރައީސް ވިދާޅުވިއެވެ. މި ސަރުކާރު ހަވާލުވިއިރު 19 އިންސައްތަ ހިއްކާފައިވާއިރު، މިހާރު 33 އިންސައްތަ ހިއްކިފައިވާކަމަށް އެމަނިކުފާނު ވިދާޅުވިއެވެ.

ރައީސް  ވިދާޅުވިގޮތުގައި، ކުރީގެ ސަރުކާރުން ގުޅީފަޅު ހިއްކުމުގެ މަޝްރޫޢު ހަވާލުކޮށްފައިވަނީ ބޭރުގެ ފަރާތަކަށް ގިނަ ބިންތަކެއް ލިބޭގޮތަށް، ޤަވާޢިދާ ޚިލާފަށް ހަދާފައިވާ އެއްބަސްވުމެއްގެ ދަށުންނެވެ. ނަމަވެސް، މިހާރުގެ ސަރުކާރުން އެ އެއްބަސްވުމުން ނިކުމެ، ރައްޔިތުންނަށް އެންމެ ފައިދާހުރި ގޮތަށް، އެންމެ ކުޑަ ޚަރަދަކުން އެތަން ހިއްކުމުގެ މަސައްކަތް ކުރިއަށް ގެންދަވާކަމަށް ރައީސް ވިދާޅުވިއެވެ.