މުލިއާގޭ ގަރާޖު "ޒުވާނުންގެ ތަރޑް ސްޕޭސް" އަކަށް ބަދަލުކުރަން ނިންމައިފި

މާލޭގެ ލިލީމަގުގައި ހުންނަ މުލިއާގޭ ގަރާޖު، ޒުވާނުންނަށް ޚާއްޞަ "ތަރޑް ސްޕޭސް" އަކަށް ބަދަލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ. މި ނިންމެވުމަކީ އިއްޔެ ބޭއްވުނު ވަޒީރުންގެ މަޖިލީހުގެ ބައްދަލުވުމުގައި، މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ހުށަހެޅުއްވި ކަރުދާހަކާ ގުޅިގެން ނިންމެވި ނިންމެވުމެކެވެ.

މި މަޝްރޫޢުގެ މައިގަނޑު މަޤްޞަދަކީ ޒުވާނުން ބާރުވެރިކުރުވައި، ހުނަރުވެރިކުރުވައި، އަދި މުޖުތަމަޢުގެ އެކި ފަރާތްތަކާއެކު އިޖުތިމާޢީ ގުޅުން ބަދަހިކުރުމެވެ. މި ތަނުގައި ހިންގުމަށް ރޭވިފައިވާ ޙަރަކާތްތަކުގެ ތެރޭގައި ބޫޓް ކޭމްޕްތައް، ސްކިލް އެކްސްޗޭންޖް ޕްރޮގްރާމްތައް، ވަރޗުއަލް ރިއަލިޓީ ތަމްރީނުތައް، އަދި އެހެނިހެން އިޖުތިމާޢީ ޙަރަކާތްތައް ހިމެނެއެވެ.

މި ތަނަކީ ގިނަ ސްކޫލްތަކެއް ހުންނަ، ޓްރެފިކް ބޮޑު ސަރަޙައްދެއްކަމަށްވާތީ، ރަނގަޅު ޓްރެފިކް މެނޭޖްމަންޓް ޕްލޭނަކާއެކު މަޝްރޫޢު ކުރިއަށް ގެންދިއުމަށްވެސް ރައީސުލްޖުމްހޫރިއްޔާ ވަނީ އަންގަވާފައެވެ. އަދި މި ތަނުގައި ރާއްޖެއަށް ޚާއްޞަ ކާބޯތަކެތި ވިއްކުމަށާއި، ކުދި އަދި މެދު ފަންތީގެ ވިޔަފާރިތަކަށް ފުރުޞަތު ދިނުމަށްވެސް ވަނީ ރޭވިފައެވެ.

މި މަޝްރޫޢަކީ ޒުވާނުންގެ އީޖާދީ ވިސްނުން ތަރައްޤީކޮށް، އެމީހުންގެ ހުނަރުތައް އިތުރަށް ކުރިއެރުވުމަށް މަގުފަހިކޮށްދޭނެ ކަމެއްގެ ގޮތުގައި ސަރުކާރުން ދެކެއެވެ. މި ތަނުގެ ސަބަބުން ޒުވާނުންނަށް ދިމާވެފައިވާ ޖާގައިގެ ދަތިކަމަށް ޙައްލެއް ލިބި، އެމީހުންގެ އިޖުތިމާޢީ އަދި އިޤްތިޞާދީ ދުޅަހެޔޮކަން އިތުރުވެގެންދާނެ ކަމަށް އުންމީދު ކުރެވެއެވެ.