އަމާޒަކީ މި ޤައުމު އަމާން ތަނެއްގެ ގޮތުގައި ކަށަވަރުކޮށްދޭނެ ޤާބިލް ބައެއްގެ ގޮތުގައި ފުލުހުން ދެމިތިބުން: ރައީސް

ސަރުކާރުގެ އެންމެ ބޮޑު އަމާޒަކީ އަމާޒަކީ މި ޤައުމު އަމާން ތަނެއްގެ ގޮތުގައި ކަށަވަރުކޮށްދޭނެ ޤާބިލް ބައެއްގެ ގޮތުގައި ފުލުހުން ދެމިތިބުން ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ދިވެހި ފުލުހުންގެ ޚިދުމަތުގެ އަހަރީ ދުވަހުގެ މުނާސަބަތުގައި ރައީސުލްޖުމްހޫރިއްޔާ ސޯޝަލް މީޑިއާގައި ޚިއްސާކުރެއްވި މި މެސެޖުގައި ވަނީ އެ ޚިދުމަތް އުފެދުނީއްސުރެ މިއަދާ ހަމަޔަށް އެކި ދުވަސްވަރު މަޤާމުގެ ވާޖިބު އަދާކުރެއްވި ކޮންމެ ފުލުހަކަށާއި ޢާއިލާއަށް ދުވަހުގެ ތަހުނިޔާއާއި ޝުކުރު ދަންނަވާފައެވެ.

އެ މަނިކުފާނު އިތުރަށް ވިދާޅުވީ، ފުލުހުންނަކީ ރެޔާއި ދުވާލު ޚިދުމަތްކުރުމުގައި ދެމިތިބޭ ބައެއް ކަމަށާއި، އެހެންކަމުން ފުލުހުންގެ މުޢައްސަސާއަކީ ހަރުދަނާ ދަރީންތަކެއް ތިބި، ޤައުމަށް ބޭނުންތެރި ޚިދުމަތްތެރީންތަކެއް އުފައްދާ ތަނަކަށް ހެދުމަކީ ސަރުކާރުގެ އަމާޒެއް ކަމަށް ވިދާޅުވިއެވެ.

މިއަދަކީ މި ޤައުމަށްޓަކައި ރެޔާއިދުވާލު ހިންމަތާއެކު ޚިދުމަތްކުރަމުންދާ ނޫ ލަޝްކަރުގެ ދުވަސް. ދިވެހި ފުލުހުންގެ ދުވަސް.

މި ޚިދުމަތް އުފެދުނީއްސުރެ މިއަދާ ހަމަޔަށް އެކި ދުވަސްވަރު މަޤާމުގެ ވާޖިބު އަދާކުރެއްވި ކޮންމެ ފުލުހަކަށާއި ޢާއިލާއަށް ނުހަނު ލޯތްބާއެކު ތަހުނިޔާއާއި ޝުކުރު… pic.twitter.com/XCzVdpdMK2

— Dr Mohamed Muizzu (@MMuizzu) March 28, 2026

މިއާއެކު މި ޤައުމުގެ ރީތިކަމާއި ހިތްފަސޭހަކަން ދެކޭ ކޮންމެ ދޭސީއަކާއި ބިދޭސީއަކަށްވެސް އަމާންކަމާއި އިތުބާރު ދިވެހިރާއްޖެއިން ކަށަވަރުކޮށްދިނުމުގައި ފުލުހުންނަކީ ޒިންމާ އަދާކުރާ، ޤާބިލް ބަޔެއްގެ ގޮތުގައި ދެމިތިބުމަކީ ސަރުކާރުގެ އަމާޒު ކަމުގައި ވިދާޅުވިއެވެ.

ދިވެހި ފުލުހުންގެ ޚިދުމަތް ފެށިގެން އައީ 1932 ދިވެހި ރާއްޖޭގެ ފުރަތަމަ ޤާނޫނު އާސާސީގެ ތެރެއިން އެކުލަވާލެވުނު "ފުލުހު މީހުން" ޤާނޫނާއެކުއެވެ. ފުލުހުންގެ ޚިދުމަތުގައި އެންމެ ބޮޑު ބަދަލެއް އައީ ފުލުހުންގެ ޚިދުމަތުގެ ޤާނޫނާ އެކުއެވެ. މި ޤާނޫނާއެކު އެ މުއައްސަސާ ހިންގުމުގެ ފުރިހަމަ މިނިވަންކަން ފުލުހުންނަށް ކަށަވެރުވިއެވެ.