ޕާޓީ ބަދަލުކުރުމުން ގޮނޑިގެއްލޭ ގޮތަށް ހުށައެޅި އިސްލާޙް ރައީސް ތަސްދީޤްކުރައްވަފި

ސިޔާސީ ޕާޓީ ބަދަލުކުރުމުން މަޖިލީހުގެ މެމްބަރުކަން ގެއްލޭނެ ގޮތަށް ކަނޑައަޅައި ޤާނޫނުއަސާސީއަށް ހުށައެޅި އިސްލާޙް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ތަސްދީޤްކުރައްވައިފިއެވެ.

ރައީސް ޑރ މުޢިއްޒު މި ބިލް ތަސްދީޤްކުރެއްވުމާއި އެކު މި ޤާނޫނު މިހާރު ވަނީ ގެޒެޓް ކުރެވިފައެވެ. އަދި މިއަދުން ފެށިގެން މި އިސްލާޙަށް ޢަމަލުކުރެވެމުންދާނެއެވެ.

ސަރުކާރުގެ ފަރާތުން މި ބިލް ހުށަހެޅުއްވީ ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު މުޙައްމަދު ޝާހިދެވެ.އެ ބިލުގައި ވަނީ މައިގަނޑު ތިން ކަމެއް ޤާނޫނުއަސާސީގައި ހިމަނަން ހުށަހަޅައިފައެވެ.    

އެކަންތައްތަކަކީ:

•  މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭ ގޮތް ހެދުން
• ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުން
• ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ހެދުން

ޤާނޫނުއަސާސީއަށް އިޞްލާޙެއް ގެނެވޭނީ ރައްޔިތުންގެ  މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޤްލަބިއްޔަތުން ފާސްކުރާ ޤާނޫނަކުންނެވެ. އެއީ، 70 މެންބަރުންނެވެ. ސަރުކާރު ހިންގާ ޕީއެންސީގައި މި ވަގުތު އެ ޢަދަދަށް މެންބަރުން ތިއްބަވައެވެ. މިބިލް މުޅި މަޖިލީހުގެ ކޮމިޓީން މިއަދު ފާސްކޮށްފައިވަނީ  75 މެންބަރުންގެ ތާއީދާ އެކުގައެވެ.