ވޭމަންޑޫގައި 23 ދުވަހުން 27 ހެކްޓަރުގެ ބިން ހިއްކާ ނިންމާލައިފި

ތ. ވޭމަންޑޫ ބިން ހިއްކުމަށް ފެށި މަޝްރޫޢު 23 ދުވަހުން ނިންމާލައިފިއެވެ. 

މިކަމާ ގުޅިގެން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، 12 މާރިޗު 2026ގައި ވޭމަންޑޫ ބިން ހިއްކުމަށް ފެށި މަޝްރޫޢު، 04 އެޕްރީލް 2026ގައި ނިންމާލާފައިވާ ކަމަށެވެ. އަދި މި މަސައްކަތުގެ ތެރެއިން 27 ހެކްޓަރުގެ ބިން ހިއްކާފައިވާ ކަމަށެވެ.

މި މަޝްރޫޢު ކުރިޔަށް ގެންދިޔައީ މޯލްޑިވްސް ޓްރާންސްޕޯޓު އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ހަވާލުކޮށްގެންނެވެ. އަދި މި މަޝްރޫޢުގެ މަސައްކަތް އެމްޓީސީސީއާ ހަވާލުކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތ. އަތޮޅުގެ ރަށްތަކަށް މިދިޔަ އަހަރުގެ ސެޕްޓެމްބަރުމަހު ކުރެއްވި ދަތުރުފުޅުގެ ތެރެއިން ވޭމަންޑޫއަށް ވަޑައިގެން އެރަށުގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައެވެ.

Th. Veymandoo reclamation completed.

Commencement Date: 12th March 2026
Reclamation Completed: 04th April 2026
Total duration: 23 Days
Total Hectares: 27Ha
Total Volume: 882,693.00 cbm pic.twitter.com/AsR59Ru1J3

— Dr Mohamed Muizzu (@MMuizzu) April 7, 2026

މި މަޝްރޫޢުގެ މަސައްކަތް ނިމުމާއެކު، ވޭމަންޑޫއަށް ދިމާވެފައިވާ ބިމުގެ ދަތިކަމަށް ހައްލެއްލިބި، ރަށުން ގޯތި ދޫ ކުރުމަށާއި، ސިނާޢީ މަސައްކަތް ކުރުމަށް އިތުރު ޖާގަ ތަނަވަސް ވެގެން ދާނެ ކަމަށް ސަރުކާރުން ވިދާޅުވެއެވެ.

ވޭމަންޑޫ ބިން ހިއްކުމުގެ މަޝްރޫޢަކީ ރައީސުލްޖުމްހޫރިއްޔާގެ ރިޔާސީ ވަޢުދެކެވެ. 

ވޭމަންޑޫ ބިން ހިއްކުމުގެ އިތުރުން އެ ރަށު ބަނދަރު ޒަމާނީ ފެންވަރަށް ތަރައްޤީކުރުމުގެ މަޝްރޫޢުވެސް ސަރުކާރުން ޙަވާލުކޮށްފައިވަނީ އެމްޓީސީސީއާއެވެ.