މިއަދުގެ މަޝްވަރާތަކުން ނަތީޖާ ނެރެވޭނެ: ރައީސުލްޖުމްހޫރިއްޔާ

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިހާރު ސްރީލަންކާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ އެންމެ މުހިންމު ހަރަކާތެއްގެ ގޮތުން ދެ ޤައުމުގެ ދެމެދުގައި މިއަދު ބޭއްވުނު މަޝްވަރާތަކަކީ ނަތީޖާ ނެރެވޭނެފަދަ އުއްމީދީ މަޝްވަރާތަކެއްކަމަށް އެ މަނިކުފާނު ވިދާޅުވެއްޖެއެވެ.

ރައީސުލްޖުމްހޫރިއްޔާ މިފަދައިން ވިދާޅުވީ، އެ މަނިކުފާނު އިއްޔެ ފެއްޓެވި ފުރަމާނަ ދަތުރުފުޅާ ގުޅިގެން މިއަދު އެކްސްގައި ކުރެއްވި ޕޯސްޓެއްގައެވެ.

އެ މަނިކުފާނު ވިދާޅުވީ، މިއަދު ބޭއްވުނު ރަސްމީ މަޝްވަރާތަކަކީ ދެ ގައުމުގެ ދެމެދުގައި އޮތް ގާތް އަވަށްޓެރި ގުޅުން އިތުރަށް ބަދަހިވެގެންދިޔަ، ނަތީޖާ ނެރެވޭނެ ފަދަ އުއްމީދީ ބައްދަލުވުންތަކެއްކަމަށެވެ. އެގޮތުން  މި ބައްދަލުވުންތަކުގައި ވިޔަފާރި، އިންވެސްޓްމަންޓް، ތަޢުލީމް، ޒުވާނުން، ޞިއްޙަތު، މަސްވެރިކަން، ސަލާމަތީ ކަންކަން އަދި މޫސުމީ ބަދަލުތަކާ ގުޅޭ ދާއިރާތަކުން ގުޅުން ބަދަހިކޮށް، އެއްބާރުލުން އިތުރުކުރުމަށް އެއްބަސްވެފައިވާކަމަށް ވަނީ ވިދާޅުވެފައެވެ. އަދި މި ބައްދަލުވުންތަކާ ގުޅިގެން މިހާރުގެ އެންމެ ބޮޑު އަމާޒަކީ، މި މަސައްކަތްތަކުގެ ހަޤީޤީ ފައިދާއާއި މަންފާ ދެ ޤައުމުގެ ރައްޔިތުންނަށް އެންމެ ފުރިހަމަ ގޮތުގައި ފޯރުކޮށްދިނުންކަމަށް ވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.

I thank my friend H.E. President Anura Kumara Disanayaka (@AnuraDisanayake) for the warm welcome and generous hospitality accorded to me and my delegation, from the moment we touched down in Sri Lanka on my State Visit. We held highly productive official talks today, reaffirming… pic.twitter.com/fZtWBAYTQW

— Dr Mohamed Muizzu (@MMuizzu) May 4, 2026

ރައީސުލްޖުމްހޫރިއްޔާގެ މި ޕޯސްޓުގައި އެ މަނިކުފާނު ވަނީ، އެ މަނިކުފާނު އެ ޤައުމަށް ފައިބާވަޑައިގެންނެވި ވަގުތުން ފެށިގެން އެ މަނިކުފާނާއި ރާއްޖޭގެ ވަފުދަށް ސްރީލަންކާއިން ދެންނެވި ހޫނު މަރުޙަބާ އާއި ބެހެއްޓެވި ފުރިހަމަ މެހެމާންދާރީއަށްޓަކައި، ސްރީލަންކާގެ ރައީސް އަނޫރާ ކުމާރާ ޑިސަނާޔަކޭއަށް ޝުކުރު އަދާކުރައްވާފައެވެ.

ރައީސުލްޖުމްހޫރިއްޔާ ސްރީލަންކާއަށް މި ކުރައްވާ ފުރަމާނަ ދަތުރުފުޅުގެ ތެރެއިން މިއަދު ވަނީ އެކި ދާއިރާތަކުން 7 ފަހުމުނާމާއެއްގައި ވެސް ސޮއިކޮށްފައެވެ. އޭގެތެރޭގައި މަތީ ތަޢުލީމާއި ތަމްރީނު، އަރުޝީފީ މަސައްކަތްތަކުގައި އެއްބާރުލުން ދިނުން، ޞިއްޙީ ދާއިރާ، ދިފާޢީ ދާއިރާ، ޒުވާނުންނާއި ކުޅިވަރު ކުރިއެރުވުން އަދި ފަތުރުވެރިކަމުގެ ދާއިރާ ހިމެނެއެވެ.

މީގެއިތުރުން، ދެ ޤައުމުގެ ދެމެދުގަ އާއި ސަރަޙައްދީ އަދި ބައިނަލްއަޤުވާމީ ގިނަ ކަންތައްތަކަކާ ގުޅޭގޮތުން އެއްބަސްވުންތަކަކަށް އާދެވިފައިވާކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.