ޙައްޖު ދުވަހަކީ ރަޙްމަތާއި ފުއްސެވުމުގެ ދުވަހެއް: ރައީސުލްޖުމްހޫރިއްޔާ

ޙައްޖު ދުވަހަކީ ރަޙްމަތާއި ބަރަކާތާއި ބާއްޖަވެރިކަމުގެ އިތުރުން މާތް ﷲގެ ރުއްސެވުމާއި ފުއްސެވުން ލިބިގެންދާ މަތިވެރި ދުވަހެއް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

1447 ވަނަ އަހަރުގެ ބަރަކާތްތެރި ޙައްޖު ދުވަހުގެ މުނާސަބަތުގައި، ރައީސުލްޖުމްހޫރިއްޔާ ވަނީ މިއަދު ދިވެހި ރައްޔިތުންނަށް ޚާއްޞަ މެސެޖެއް ފޮނުއްވާފައެވެ. ސޯޝަލް މީޑިއާ މެދުވެރިކުރައްވައި އެމަނިކުފާނު ހިއްސާކުރެއްވި މި މެސެޖު ފައްޓަވާފައިވަނީ ތަލްބިޔާގެ މާތް ބަސްތަކުންނެވެ. ރައީސުލްޖުމްހޫރިއްޔާގެ މެސެޖުގައި ދިވެހި ރައްޔިތުންނަށް ހެޔޮ ދަރުމައާއި ޘަވާބު ދެއްވުން އެދިވަޑައިގެން މާތް ﷲގެ ހަޟްރަތުގައި ދުޢާ ދަންނަވާފައިވެއެވެ.

لَبَّيْكَ اللَّهُمَّ لَبَّيْكَ، لَبَّيْكَ لاَ شَرِيكَ لَكَ لَبَّيْكَ، إِنَّ الْحَمْدَ، وَالنِّعْمَةَ، لَكَ وَالْمُلْكَ، لاَ شَرِيكَ لَكَ.
ރަޙްމަތާއި ބަރަކާތާއި ބާއްޖަވެރިކަމާއި ރުއްސެވުމާއި ފުއްސެވުމުގެ މި ބަރަކާތްތެރި ދުވަހުގެ ހެޔޮ ދަރުމައާއި ޘަވާބު ދިވެހި ކޮންމެ ލޮބުވެތި… pic.twitter.com/vRee23RhJI

— Dr Mohamed Muizzu (@MMuizzu) May 25, 2026

މި މުނާސަބަތުގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދުވެސް ވަނީ ދިވެހި ރައްޔިތުންނަށާއި މުޅި އިސްލާމީ އުންމަތަށް ދުވަހުގެ ތަހުނިޔާ ފޮނުއްވާފައެވެ. އެކަމަނާގެ މެސެޖުގައި، ޙައްޖުގެ މަތިވެރި އަޅުކަން އަދާކުރަމުންދާ ދިވެހި ޙައްޖާޖީންނަށް މަބްރޫރު ޙައްޖަކަށް އެދިވަޑައިގެންފައިވެއެވެ. އަދި މި ބަރަކާތްތެރި ދުވަހުގެ އަޖުރާއި ރަޙްމަތް ހުރިހާ މުސްލިމުންނަށް ދެއްވުން އެދި އެކަމަނާ ދުޢާކުރެއްވިއެވެ.

ސަރުކާރުން ހާމަކުރައްވާފައިވާ މަޢުލޫމާތަށް ބަލާއިރު، އެންމެ ހާޖީއެއް ފިޔަވައި ރާއްޖެއިން މި އަހަރު ޙައްޖަށް ދިޔަ ހުރިހާ ޙާޖީންވެސް މިވަގުތު ތިބީ ޙައްޖުގެ އެންމެ މުހިންމު ރުކުން އަދާކުރުމަށްޓަކައި ޢަރަފާތު ބިމުގައެވެ. ހުރިހާ ޙާޖީންގެ ހާލުވެސް ރަނގަޅު ކަމަށް ސަރުކާރުން މަޢުލޫމާތު ދެއްވައެވެ.

ޙައްޖު ދުވަހަކީ މާތް ﷲ އެކަލާނގެ އަޅުތަކުންނާ މެދު އެންމެ ބޮޑަށް ފަޚުރުވެރިވެވޮޑިގަންނަވާ، އަދި އެންމެ ގިނަ މީސްތަކުން ނަރަކައިން މުއްތިކުރައްވާ ދުވަހެވެ. މިއީ އިސްލާމްދީނުގެ ފަސްވަނަ ރުކުން ކަމުގައިވާ ޙައްޖުގެ އަޅުކަމުގެ އެންމެ މުހިންމު ދުވަހެވެ. ދުނިޔޭގެ އެކި ކަންކޮޅުތަކުން މިލިއަނުން މުސްލިމުން މިއަދު ޢަރަފާތު ބިމަށް ޖަމާވެފައިވާއިރު، މިއީ މުސްލިމުންގެ މެދުގައިވާ ހަމަހަމަކަން ދައްކުވައިދޭ އެންމެ ބޮޑު ނަމޫނާއެވެ.

ދިވެހި ޙައްޖާޖީންނަށް މަބްރޫރު ޙައްޖަކަށް އެދެން. ދިވެހި ކޮންމެ އަޚަކާއި އުޚްތަކަށް، އަދި މުޅި އިސްލާމީ އުންމަތަށް މި ބަރަކާތްތެރި ޙައްޖު ދުވަހުގެ އަޖުރާއި ރަޙްމަތް އެންމެ ހެޔޮގޮތުގައި ދެއްވާށި. އާމީން pic.twitter.com/OYBHmWUC5f

— First Lady Sajidha Mohamed (@sajidhaamohamed) May 25, 2026

ކުޅަދާނަވެގެންވާ ކޮންމެ މުސްލިމަކަށް އުމުރުން އެއްފަހަރު ފަރުޟުކުރައްވާފައިވާ ޙައްޖުގެ އަޅުކަމަކީ، މާތް ﷲ އަށް ކުއްތަންވުމަށްޓަކައި އަދާކުރެވޭ އެންމެ މަތިވެރި އެއް އަޅުކަމެވެ.