ދުނިޔޭގެ ކުރިމަގަށްޓަކައި ދުޅަހެޔޮ ކަނޑުތަކެއް އޮތުމަކީ ކޮންމެހެން ބޭނުންތެރި ކަމެއް: ރަޢީސުލްޖުމްހޫރިއްޔާ

ކަނޑުތަކަށް ކުރިމަތިވެފައިވާ ނުރައްކާތަކާ ދެކޮޅަށް ހަރުދަނާ އަދި އަވަސް ފިޔަވަޅުތަކެއް އެޅުމަށް ބައިނަލްއަޤުވާމީ އެއްބާރުލުން މިހާރަށްވުރެ ބޮޑަށް ބޭނުންވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ދުނިޔޭގެ ކަނޑުތަކުގެ ދުވަހާ ގުޅިގެން މިއަދު ސޯޝަލް މީޑިއާގައި ހިއްސާކުރެއްވި މެސެޖެއްގައެވެ.

ރައީސުލްޖުމްހޫރިއްޔާގެ މެސެޖުގައި ވިދާޅުވީ، ދުނިޔޭގެ ކަނޑުތަކުގެ ދުވަސް ފާހަގަކުރަމުންދާއިރު، ދުނިޔޭގެ ކުރިމަގަށްޓަކައި ދުޅަހެޔޮ ކަނޑުތަކެއް އޮތުމަކީ ކޮންމެހެން ބޭނުންތެރި ކަމެއް ކަމަށެވެ. އަދި ދިވެހީންނާއި ކަނޑުތަކާ ދެމެދު އޮތީ ވަރަށް ފުން، އަމިއްލަ ގުޅުމެއްކަން ފާހަގަކުރައްވައި، ކަނޑުތަކުގެ ދުޅަހެޔޮކަމަކީ ރާއްޖޭގެ އިޤްތިޞާދަށާއި، ކާބޯތަކެތީގެ ރައްކާތެރިކަމަށާއި، ދެމެހެއްޓެނިވި ތިމާވެއްޓަށް ސީދާ އަސަރުކުރާ ކަމެއްކަމަށް އެމަނިކުފާނު ވިދާޅުވިއެވެ.

ކަނޑުތަކުގެ ރައްކާތެރިކަމަށްޓަކައި ރާއްޖެއިން ކުރަމުންދާ މަސައްކަތްތަކަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވިދާޅުވީ، ދެމެހެއްޓެނިވި މަސްވެރިކަމާއި، ކަނޑުގެ ދިރާސާތައް ވަރުގަދަކުރުމާއި، ފަރުތަކުގެ ޙާލަތު ބެލެހެއްޓުމުގެ އިތުރުން މުރަކަ އާލާކުރުމަށް ރާއްޖެއިން އިސްކަންދޭ ކަމަށެވެ. އަދި މޫސުމީ ބަދަލުތަކުން އަރައިގަތުމަށްޓަކައި ސައިންޓިފިކް ހެކިތަކުގެ މައްޗަށް ބިނާކޮށް ހަރުދަނާ ފިޔަވަޅުތަކެއް އަޅަމުންދާކަންވެސް އެމަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ އިތުރަށް ވިދާޅުވީ، ކަނޑުތައް ހޫނުވުމާއި، މުރަކަ ހުދުވުމާއި، ރަށްގިރުމުގެ ޙާދިސާތައް ކަންބޮޑުވާ މިންވަރަކަށް އިތުރުވަމުންދާއިރު، ބައިނަލްއަޤުވާމީ މުޖުތަމަޢުން މިހާރަށްވުރެ އަވަސް އަދި ހަރުދަނާ ފިޔަވަޅުތަކެއް އަޅަން ޖެހިފައިވާ ކަމަށެވެ. އެހެންކަމުން، އެންމެންގެ ކުރިމަގަށްޓަކައި ގުޅިގެން މަސައްކަތްކުރުމުގެ އަޒުމް އައުކުރުމަށް އެމަނިކުފާނު ގޮވާލެއްވިއެވެ.

ކޮންމެ އަހަރެއްގެ ޖޫން މަހުގެ 8 ވަނަ ދުވަހަކީ ދުނިޔޭގެ ކަނޑުތަކުގެ ދުވަހުގެ ގޮތުގައި ފާހަގަކުރާ ދުވަހެވެ. މިއަހަރުގެ ޝިއާރަކީ "އައު ތަސައްވުރެއް: އަޅުގަނޑުމެން ދަންނަ ދުނިޔޭގެ އިންތަކުން ބޭރުވެ، ކަނޑުތަކާއެކު އައު ގުޅުމެއް ޤާއިމުކުރަމާ" މިއެވެ. ރާއްޖޭގެ ބޮޑު ސަރަޙައްދަކީ ކަނޑު ކަމަށްވުމާއެކު، ސަރުކާރުން އަންނަނީ ކަނޑުތައް ބެލެހެއްޓުމުގެ ޤާބިލުކަން އިތުރުކޮށް، ކަނޑުގެ ވަސީލަތްތަކުން ލިބޭ ނަފާ އިތުރުކުރުމަށް ގިނަ މަސައްކަތްތަކެއް ކުރަމުންނެވެ.

#WorldOceanDay signals that healthy oceans are essential to life and the future of our planet. This connection is deeply personal for our people, and it directly impacts our economy, food security, and environmental sustainability.

We are advancing a forward-looking approach to… pic.twitter.com/BQcoOd2FpS

— Dr Mohamed Muizzu (@MMuizzu) June 8, 2026

&nb; &spnbsp;