ބޮޑުވަޒީރު މޯދީއަށް ރައީސް މުޢިއްޒު މަރުޙަބާ ވިދާޅުވެއްޖެ

މެދުނުކެނޑި އެންމެ ގިނަ ދުވަހު އިންޑިއާގެ ބޮޑުވަޒީރުކަން ކުރެއްވި އިންތިޚާބީ ލީޑަރުގެ ޝަރަފު، ބޮޑުވަޒީރު ނަރެންދުރަ މޯދީ ހޯއްދެވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެމަނިކުފާނަށް ތަހުނިޔާ ފޮނުއްވައިފިއެވެ.

ރައީސުލްޖުމްހޫރިއްޔާ މިއަދު ސޯޝަލް މީޑިއާ މެދުވެރިކުރައްވައި ފޮނުއްވި މެސެޖެއްގައި، ބޮޑުވަޒީރު ނަރެންދުރަ މޯދީ ހޯއްދެވި މި ތާރީޚީ ކާމިޔާބީއަށްޓަކައި ވަނީ ވަރަށް ހޫނު މަރުޙަބާއެއް ދަންނަވާފައެވެ. ރައީސްގެ މެސެޖުގައި ފާހަގަކުރެއްވި ގޮތުގައި، މޯދީއަކީ އިންޑިއާގެ ތާރީޚުގައި ވެސް ޖެހިޖެހިގެން އެންމެ ގިނަ ދުވަހު ބޮޑުވަޒީރުކަމުގެ މަގާމު ފުރުއްވި އިންތިޚާބީ ލީޑަރެވެ.

ދެ ގައުމުގެ ގުޅުމާ ގުޅޭގޮތުން ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ދިވެހިރާއްޖެއާއި އިންޑިއާއާ ދެމެދު އޮތް ގުޅުން އިތުރަށް ބަދަހިކުރުމަށް ރާއްޖެއިން ތައްޔާރަށް އޮތް ކަމަށެވެ. އަދި މި ގުޅުން ކުރިއަށްދާނީ ދެ ގައުމުގެ މެދުގައި އޮންނަ އިހުތިރާމާއި، ގައުމީ ސިޔާދަތީ ހަމަހަމަކަމާއި، ދެ ގައުމުގެ މަސްލަހަތު ހިމެނޭ ކަންކަމުގެ މައްޗަށް ބިނާވެގެން ކަމަށްވެސް ރައީސް ވިދާޅުވިއެވެ.

އިންޑިއާއަކީ ރާއްޖޭގެ ތަރައްގީގެ މުހިންމު ބައިވެރިއަކަށް ވެފައި، ދެ ގައުމުގެ ދެމެދުގައި އޮންނަ ގާތް ގުޅުން އައު އުސްމިންތަކަކަށް ގެންދިއުމަށް ދިވެހި ސަރުކާރުން އިސްކަންދެއެވެ.

Warm congratulations to His Excellency Prime Minister @narendramodi on becoming India’s longest-serving elected Prime Minister by consecutive days in office.

The Maldives looks forward to further strengthening cooperation with India, guided by mutual respect, sovereign equality,…

— Dr Mohamed Muizzu (@MMuizzu) June 10, 2026