Ads by Exprox

ޚަބަރު

ފަލަސްތީނުގައި ހިންގާ ގަތުލްއާންމު ހުއްޓުވުމަށް ބައިނަލްއަޤްވާމީ މުޖުތަމަޢު އެއްބައިވުމަށް ރައީސް މުޢިއްޒު ގޮވާލައްވައިފި

ފަލަސްތީނުގައި ހިންގާ ގަތުލްއާންމު ހުއްޓުވުމަށް ބައިނަލްއަޤްވާމީ މުޖުތަމަޢު އެއްބައިވުމަށް ރައީސް މުޢިއްޒު ގޮވާލައްވައިފި

ރައީސް ޑރ.މުޙައްމަދު މުޢިއްޒު އަދި ފަލަސްތީނުގެ ރައީސް މުޙައްމަދު އައްބާސް- ފޮޓޯ: ރައީސް އޮފީސް

އާމިނަތު ޔުމްނާ

އާމިނަތު ޔުމްނާ

29 ނޮވެމްބަރު 2024، 06:33

29 ނޮވެމްބަރު 2024، 06:33

ފަލަސްތީނުގައި ހިންގާ ގަތުލްއާންމު ހުއްޓުވައި، އެކަމުގައި ޒިންމާވާންޖެހޭ ފަރާތްތައް ޖަވާބުދާރީ ކުރުވުމަށް ބައިނަލްއަޤްވާމީ މުޖުތަމަޢު އެއްބައިވެ، އެޤައުމެއްގެ ސިޔާސީ ވިސްނުމާއި އިޤްތިޞާދީ ބާރުގެ ބޭނުންހިފުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.

ރައީސުލްޖުމްހޫރިއްޔާ މިގޮތަށް ގޮވާލެއްވީ މިއަދު ފާހަގަކުރާ ފަލަސްޠީނުގެ ރައްޔިތުންނާއެކު އެއްބައިވަންތަކަން ހާމަކުރުމުގެ ބައިނަލްއަޤްވާމީ ދުވަހާ ގުޅިގެން ދެއްވި ޚާއްޞަ މެސެޖެއްގައެވެ. މި މެސެޖުގައި، ފަލަސްޠީނުގެ ޙައްޤުގައި ރާއްޖެއިން ދޭ އެއްބާރުލުމަކީ ރާއްޖޭގެ އެންމެހާ ރައްޔިތުން ހިއްސާކުރާ ކަމެއްކަން ރައީސް ފާހަގަކުރެއްވިއެވެ.

ރައީސުލްޖުމްހޫރިއްޔާގެ މެސެޖުގައި، އިސްރާއީލަށް ހަތިޔާރު ވިއްކުން ވަގުތުން ހުއްޓާލުމަށާއި، ހަނގުރާމައިގެ ޖަރީމާތަކުގައި ޒިންމާވާންޖެހޭ ފަރާތްތައް ޖަވާބުދާރީ ކުރުވުމަށް ބައިނަލްއަޤްވާމީ މުޖުތަމަޢުގެ އެހީތެރިކަން ހޯދުމަށް ގޮވާލައްވާފައިވެއެވެ. އަދި ފަލަސްޠީނުގެ ރެފިއުޖީންގެ ޙައްޤުގައި އދ.ގެ ރިލީފް އެންޑް ވޯކްސް އެޖެންސީން ކުރަމުންދާ މަސައްކަތަށް ހުރިހާ ޤައުމުތަކުން އެއްބާރުލުން ދިނުމަށްވެސް އެދިވަޑައިގެންފައިވެއެވެ.

ރައީސުލްޖުމްހޫރިއްޔާ އިތުރަށް ވިދާޅުވީ، ފަލަސްޠީނުގެ ރައްޔިތުންގެ މިނިވަންކަމަށް ކުރެވޭ މަސައްކަތަށްވުރެ މުހިންމު އެއްވެސް ކަމެއް ނޯންނާނެ ކަމަށް ރާއްޖެއިން ގަބޫލުކުރާ ކަމަށެވެ. އަދި ފަލަސްޠީނު ރައްޔިތުން ކުރަމުންދާ ޖިހާދަކީ ދިވެހިންގެ އަމިއްލަ ކަމެއްގެ ގޮތުގައި ބަލައިގަންނަ ކަމަށާއި، އެ ރައްޔިތުންނަށް ޢަދުލުއިންޞާފާއި މިނިވަންކަން ހޯދައިދިނުމަށް ކުރާ މަސައްކަތުގައި ދިވެހިން ދެމިތިބޭނެކަމުގެ ޔަޤީންކަން ދެއްވިއެވެ.

މި މެސެޖު ނިންމަވާލައްވާފައިވަނީ، މި މައްސަލައަށް ދެމެހެއްޓެނިވި ޙައްލެއް ގެނެވޭނީ 1967 ވަނަ އަހަރުގެ ކުރިން އޮތް ބޯޑަރުތަކުގެ މައްޗަށް ބިނާކޮށް، ފަލަސްޠީނުގެ މިނިވަން އަދި އިސްތިޤްލާލީ ދަޢުލަތެއް ޤާއިމުކޮށް، އިރުމަތީ ޤުދުސްއަކީ ފަލަސްޠީނުގެ ވެރިރަށް ކަމުގައި ކަނޑައެޅުމުން ކަމަށް ފާހަގަކުރައްވަމުންނެވެ.



މި ލިޔުން ކިޔާލުމުން

Ads by MSS