ރައީސުލްޖުމްހޫރިއްޔާ "މޯލްޑިވްސް ފައިނޭންޝަލް އެކްސްޕޯ 2026" ހުޅުއްވައިދެއްވައިފި

ރާއްޖޭގެ މާލީ ދާއިރާ ކުރިއެރުވުމަށާއި އާންމުން މާލީ ކަންކަމަށް ހޭލުންތެރިކުރުވުމަށް ބާއްވާ އެންމެ ބޮޑު މައުރަޒު، "މޯލްޑިވްސް ފައިނޭންޝަލް އެކްސްޕޯ 2026" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހުޅުއްވައިދެއްވައިފިއެވެ.

ހުޅުމާލެ ސެންޓްރަލް ޕާކުގައި ބޭއްވި މި ޚާއްޞަ ރަސްމިއްޔާތުގައި ރައީސުލްޖުމްހޫރިއްޔާގެ އަރިހުގައި ވަޒީރުންނާއި، ސަރުކާރުގެ އިސް ބޭފުޅުންނާއި، މާލީ އިދާރާތަކުގެ އިސްވެރިން ބައިވެރިވެލެއްވިއެވެ. މި އެކްސްޕޯ ހުޅުއްވައިދެއްވުމަށްފަހު، ރައީސުލްޖުމްހޫރިއްޔާ ވަނީ އެކްސްޕޯގައި ގާއިމުކޮށްފައިވާ އެކި ސްޓޯލްތަކަށް ވަކިވަކިން ޒިޔާރަތްކުރައްވައި، އެ ތަންތަނުން ފޯރުކޮށްދޭ ޚިދުމަތްތަކާއި މައުލޫމާތުތައް އޮޅުންފިލުއްވާފައެވެ.

ނުވަ އަހަރުގެ މެދުކެނޑުމަކަށްފަހު މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) އިން އިންތިޒާމުކޮށްގެން ބާއްވާ މި އެކްސްޕޯ ކުރިއަށްދާނީ ޖުލައި މަހުގެ 2 އިން 4 ގެ ނިޔަލަށެވެ. ކޮންމެ ދުވަހެއްގެ ހަވީރު 3:00 އިން ރޭގަނޑު 10:00 އަށް އާންމުންނަށް މި މައުރަޒު ހުޅުވާލެވިފައި ހުންނާނެއެވެ.

މި އެކްސްޕޯގެ މައިގަނޑު މަގުސަދަކީ ރާއްޖޭގައި ހަރަކާތްތެރިވާ ބޭންކުތަކާއި، އިންޝުއަރެންސް ކުންފުނިތަކާއި، މާލީ އިދާރާތަކުގެ ޚިދުމަތްތައް އެއް ފުރާޅެއްގެ ދަށުން އާންމުންނާ ހަމައަށް ފޯރުކޮށްދިނުމެވެ. މީގެ ތެރޭގައި ގެދޮރުވެރިކަމުގެ ލޯނުތަކާއި، އިސްލާމިކް ފައިނޭންސް އަދި ޑިޖިޓަލް ބޭންކިންގް ފަދަ މުހިންމު ޚިދުމަތްތަކުގެ މައުލޫމާތު ހިމެނެއެވެ.

ޚާއްޞަކޮށް ކުދި އަދި މެދުފަންތީގެ ވިޔަފާރިތަކަށް ބޭނުންވާ މާލީ އެހީތެރިކަން ހޯދުމަށް މަގުފަހިކޮށްދިނުމަށް މި އެކްސްޕޯގައި ބޮޑު އިސްކަމެއް ދީފައިވެއެވެ. މީގެ އިތުރުން، އާއިލާތަކަށް އަމާޒުކޮށްގެން ބާއްވާ "ކުޑަކުދިންގެ ހަވީރު" އާއި، އަގުހުރި އިނާމުތައް ލިބޭ ގުރުއަތުލުންތައް ވެސް މި މައުރަޒުގެ ތެރޭގައި ކުރިއަށްދާނެއެވެ.

މި އަހަރުގެ އެކްސްޕޯގައި މާލީ ދާއިރާއިން ފާހަގަކޮށްލެވޭ ޚިދުމަތްތެރިންނަށް ދޭ "މޯލްޑިވްސް ފައިނޭންޝަލް ސެކްޓަރ އެވޯޑްސް" ވެސް ތައާރަފުކުރުމަށް ވަނީ ހަމަޖެހިފައެވެ. މިއީ ރާއްޖޭގެ އިގްތިސާދީ ކުރިއެރުމަށާއި މާލީ ނިޒާމު ހަރުދަނާކުރުމަށް ސަރުކާރުން ކުރައްވަމުންދާ މަސައްކަތުގެ ތެރެއިން އެޅުނު މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ.

President Dr @MMuizzu launches the Maldives Financial Expo 2026, organised by @MMA_Maldives, at Hulhumalé Central Park.

Held for the first time in nine years, the expo brings the country's financial sector together under one roof, aimed at improving literacy, inclusion and… pic.twitter.com/BNnXIPro25

— The President's Office (@presidencymv) July 2, 2026