Ads by Exprox

ޚަބަރު

ޞިއްޙީ ޙާލަތާ ގުޅިގެން ޑރ. ޢާއިޝަތު ރަމީލާ އެގްރިކަލްޗަރ މިނިސްޓަރުކަމުން އިސްތިޢުފާ ދެއްވައިފި

ޞިއްޙީ ޙާލަތާ ގުޅިގެން ޑރ. ޢާއިޝަތު ރަމީލާ އެގްރިކަލްޗަރ މިނިސްޓަރުކަމުން އިސްތިޢުފާ ދެއްވައިފި

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އަދި އެގްރިކަލްޗަރ މިނިސްޓަރު ޑރ. ޢާއިޝަތު ރަމީލާ - ފޮޓޯ: ރައީސް އޮފީސް

އާމިނަތު ޔުމްނާ

އާމިނަތު ޔުމްނާ

01 ޑިސެމްބަރު 2024، 12:59

01 ޑިސެމްބަރު 2024، 12:59

އާލާސްކަންފުޅާ އުޅުއްވާތީ، މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރގެ މަޤާމުން ޑރ. ޢާއިޝަތު ރަމީލާ އިސްތިޢުފާ ދެއްވައިފިއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިއަދު ޑރ. ރަމީލާގެ އިސްތިޢުފާ ޤަބޫލުކުރައްވާފައެވެ.

ރައީސް އޮފީހުން ނެރުއްވި ބަޔާނެއްގައި ވިދާޅުވެފައިވަނީ، ޑރ. ރަމީލާ އަލާސްކަންފުޅުގައި އުޅުއްވަމުންވެސް، މިނިސްޓަރުގެ ހައިސިއްޔަތުން ދިވެހިރާއްޖޭގެ ޤާނޫނީ ވެރިކަން ކުރިއަރުވައި، ރައްޔިތުންނަށް ލާބައާއި މަންފާ ހޯދައިދިނުމަށް މަސައްކަތް ކުރައްވާފައިވާ ކަމަށެވެ. އަދި ސަރުކާރަށް ކޮށްދެއްވާފައިވާ އަގުހުރި ޚިދުމަތްތަކަށް ރައީސުލްޖުމްހޫރިއްޔާ ވަރަށް އިޚްލާޞްތެރިކަމާއެކު ޝުކުރު އަދާކުރައްވާފައިވެއެވެ.

ރައީސް ޑރ.މުޢިއްޒު ވިދާޅުވެފައިވަނީ، ޑރ. ރަމީލާ ފަދަ ހީވާގި، އަމާނާތްތެރި އަދި ޤާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ އެމަނިކުފާނަށް ލިބުނު ވަރަށް ބޮޑު އުފަލެއް ކަމަށެވެ. އަދި ކުރިއަށް އޮތްތަނުގައިވެސް ޑރ. ރަމީލާގެ ޚިދުމަތް ދިވެހި ޤައުމަށް ލިބޭނެކަން ޔަޤީންކުރައްވާ ކަމަށްވެސް ވިދާޅުވެފައިވެއެވެ.

މީގެއިތުރުން، ރައީސުލްޖުމްހޫރިއްޔާ ވަނީ ޑރ. ރަމީލާއަށް އަވަސް އަދި ދާއިމީ ޝިފާއެއް މިންވަރުކުރެއްވުމަށް އެދި ދުޢާ ކުރައްވާފައެވެ. އަދި އެކަމަނާގެ ސާބިތުކަމާއި ކެތްތެރިކަން އިތުރުކޮށްދެއްވައި، އުފާވެރި އަދި ފާގަތި މުސްތަޤުބަލެއް މިންވަރު ކުރެއްވުމަށްވެސް އެދިވަޑައިގެންފައިވެއެވެ.
                    

މި ލިޔުން ކިޔާލުމުން

Ads by MSS