ޚަބަރު
ކެބިނެޓަށް ބަދަލު ގެންނަވަން ނިންމަވާފައި ނުވާކަމަށް ރައީސް އޮފީހުން ބުނެފި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކެބިނެޓް ހުވާކުރުން ފޮޓޯ: މޯލްޑިވްސް ފައިނޭންޝަލް ރިވުއު
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކެބިނެޓަށް ބަދަލުތަކެއް ގެންނަވަން ނިންމަވާފައިވާކަމަށް ބުނެ ފެތުރެމުންދާ ޚަބަރުތަކަކީ ދޮގު މަޢުލޫމާތު ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.
އެކްސް ގައި ކުރެއްވި ޕޯސްޓެއްގައި ހީނާ ވިދާޅުވީ، ވަޒީރުންގެ މަޖިލީހަށް ބޮޑެތި ބަދަލުތަކެއް ގެންނަވަން ރައީސުލްޖުމްހޫރިއްޔާ ނިންމަވާފައިވާކަމަށް ބުނެ ސޯޝަލް މީޑިއާގައި ދެކެވެމުންދާ ވާހަކަތަކަކީ ޙަޤީޤަތާ ޚިލާފު ވާހަކަތަކެއް ކަމަށެވެ. އަދި ކެބިނެޓަށް އެއްވެސް ބަދަލެއް ގެންނަވަން ރައީސުލްޖުމްހޫރިއްޔާ ނިންމަވާފައިނުވާ ކަމަށްވެސް އޭނާ ވިދާޅުވިއެވެ.
ރައީސުލްޖުމްހޫރިއްޔާ އެންމެފަހުން ވަޒީރުންގެ މަޖިލީހަށް ގެންނެވި ބަދަލަކީ މާލީ ވަޒީރުކަމަށް މޫސާ ޒަމީރު، ސިއްޙަތާބެހޭ ވަޒީރުކަމަށް ޢަބްދުﷲ ނާޡިމް އަދި ޚަރިޖީ ވަޒީރަކަށް އަބްދުﷲ ޚަލީލް އައްޔަން ކުރެއްވުން ކަމަށް ހީނާ ފާހަގަކުރެއްވިއެވެ.
އެހެންނަމަވެސް، ދަނޑުވެރިކަމާއި ދިރޭތަކެއްޗާބެހޭ ވަޒީރު ޑރ. އާއިޝަތު ރަމީލާ ވަނީ އެކަމަނާގެ ސިއްޙީ ހާލަތާ ގުޅިގެން ވަޒީރުކަމުން އިސްތިއުފާ ދެއްވާފައިވާ ކަމަށާއި، އެ އިސްތިއުފާ ރައީސުލްޖުމްހޫރިއްޔާ ގަބޫލުފުޅުކުރައްވާފައިވާ ކަމަށް ހީނާ ވިދާޅުވިއެވެ. މިވަގުތު އެ މަޤާމު އޮތީ ހުސްކޮށެވެ.
މި ބަޔާނުން އެނގެނީ، ރައީސުލްޖުމްހޫރިއްޔާގެ ކެބިނެޓަށް ބަދަލުތަކެއް ގެންނަވަން ނިންމަވާފައިވާކަމަށް ބުނެ ފެތުރެމުންދާ ޚަބަރުތަކަކީ އަސްލެއްނެތް ވާހަކަތަކެއްކަމާއި، މިވަގުތު ކެބިނެޓަށް އިތުރު ބަދަލެއް ގެންނަވަން ނިންމަވާފައިނުވާކަމެވެ.
ކެބިނެޓަށް އެއްވެސް ބަދަލެއް ގެންނަވަން ރައީސުލްޖުމްހޫރިއްޔާ ނިންމަވާފައިނުވާ ވާހަކަ ދަންނަވަން.
— Heena Waleed (@MvSpokesperson) December 1, 2024
