އޭޕީއާރްއެފްއެޗްއީ ގެ މެންބަރު ޤައުމެއްގެ ގޮތުގައި ދިވެހިރާއްޖެއިން ބައިވެރިވުމަށް ކެބިނެޓުން ނިންމައިފި

އޭޝިޔާ ޕެސިފިކް ރީޖަނަލް ފޯރަމް އޮން ހެލްތު އެންޑް ދަ އެންވަޔަރަންމަންޓް ގެ މެމްބަރު ޤައުމެއްގެ ގޮތުގައި ދިވެހިރާއްޖެއިން ބައިވެރިވުމަށް ވަޒީރުންގެ މަޖިލީހުން ނިންމައިފިއެވެ. 

އޭޕީއާރްއެފްއެޗްއީގެ މެމްބަރު ޤައުމެއްގެ ގޮތުގައި ރާއްޖެ އިން ބައިވެރިވުމަށް ވަޒީރުންގެ މަޖިލީހުން ނިންމައިފައިވަނީ ޑިސެމްބަރު 1 ވަނަ ދުވަހު ބޭއްވި ވަޒީރުންގެ މަޖިލީހުގެ ޖަލްސާގައެވެ. މިގޮތަށް ވަޒީރުންގެ މަޖިލީހުން ނިންމަވާފައިވަނީ، ޞިއްޙި ވުޒާރާއިން ހުށައެޅި ހުށައެޅުމަކާ ގުޅިގެންނެވެ.

އޭޕީއާރްއެފްއެޗްއީގެ މެންބަރަކަށް ވުމުން ދިވެހިރާއްޖެއަށް ކުރާނެ ފައިދާތަކުގެ ތެރޭގައި، ފޯރަމްގެ މެމްބަރު ޤައުމުތަކާ ގުޅުން ބަދަހިވެ، ސިއްޙަތާއި ތިމާވެއްޓާ ގުޅުންހުރި ސިޔާސަތުތަކާއި ޤައުމީ ޕްލޭންތައް އެކުލަވާލުމާއި ތަންފީޒުކުރުމަށް ސަރަޙައްދީ އެއްބާރުލުން ލިބުން ހިމެނޭކަމަށް ރައީސްއޮފީހުން ބުނެފައިވެއެވެ.

މީގެއިތުރުން ދިވެހިރާއްޖޭގެ ތިމާވެއްޓާއި ސިއްޙަތަށް ކުރާ ނޭދެވޭ އަސަރުތައް ކުޑަކުރުމަށް ވަކާލާތު ކުރުމާއި، ސަރަޙައްދީގޮތުން އެކުގައި މަސައްކަތް ކުރުމުގެ ފުރުޞަތުލިބުން ހިމެނޭ ކަމަށް ރައީސް އޮފީހުން ބުނެފައިވެއެވެ. 

 ހަމަމިއާއިއެކު، ސިއްޙީ އަދި ތިމާވެށީގެ ދާއިރާއިން ޚިދުމަތްދިނުމުގައި ޑިޖިޓަލް ހެލްތު ބޭނުންކުރުމުގެ ލުއިފަސޭހަކަން ލިބި ފަންނީ އެހީތެރިކަން ހޯދުމަށް މަގުފަހިވެގެންދާނެ ކަމަށް ރައީސް އޮފީހުން ބުނެއެވެ.

 ފޯރަމްގެ ނޮލެޖު ނެޓްވަރކްގެ ޒަރިއްޔާއިން ދިރާސީ މަސައްކަތްތަކަށް އެހީތެރިކަން ލިބި، ތިމާވެއްޓަށް ބޭރުކުރާ ވިހަ މާއްދާތަކުގެ ސަބަބުން ތިމާވެށި ތަޣައްޔަރުވުމާއި މޫސުމަށް އަންނަ ބަދަލުތަކުގެ ސަބަބުން ޢާންމު ސިއްޙަތަށް ހުރި ނުރައްކާތައް ވަޒަންކޮށް މިންކުރުމާއެކު މި ދެ ދާއިރާއިން އެއް މަންސައެއްގައި، ވަށާޖެހޭގޮތަކަށް ލަނޑުދަނޑި ޙާޞިލުކުރުމަށް މަސައްކަތްކުރެވޭނެއެވެ.

 އަދި ފަންނީ ތަމްރީނުތައް ހޯދުމުގެ ފުރުޞަތު ބޮޑުވެ، މި ކަމަށް ބާރުއެޅިގެންދާނެ ކަމަށް ރައީސް އޮފީހުން ބުނެފައިވެއެވެ.

އޭޝިޔާ ޕެސިފިކް ރީޖަނަލް ފޯރަމް އޮން ހެލްތު އެންޑް ދަ އެންވަޔަރަންމަންޓަކީ، ތިމާވެއްޓަށް އަންނަ ބަދަލުތަކުގެ ސަބަބުން އިންސާނުންގެ ސިއްޙަތަށް ކުރިމަތިވެފައިވާ ނުރައްކާތައް ޙައްލުކުރުމުގެ ގޮތުން 2004 ވަނަ އަހަރު އެކުލަވާލި ފޯރަމެކެވެ. ޤައުމުތަކުން މި ފޯރަމުގައި ބައިވެރިވަނީ ވޮލަންޓަރީކޮށެވެ. 

މި ފޯރަމުގައި ބައިވެރިވުމުން، މި ފޯރަމްގެ ތެރެއިން އިންތިޒާމުކުރާ ތީމެޓިކް ވަރކިންގް ގްރޫޕްތަކުގައި އެކި ދާއިރާތަކުން މަސައްކަތްކުރުމުގެ ފުރުޞަތު ލިބޭނެއެވެ. އަދި ޤައުމުން ފޯރަމްގެ ޗެއަރމަންޝިޕް އަދާކުރުމުގެ ފުރުޞަތު ލިބިގެންދާނެއެވެ.

މި ފޯރަމްގެ މަޤްޞަދަކީ، ސަރަޙައްދީ އަދި ޤައުމީ ފެންވަރުގައި ސިއްޙީ ދާއިރާއާއި ތިމާވެށީގެ ދާއިރާތަކުގެ މެދުގައި އެއްބާރުލުން ދިނުމުގެ މަންސައެއް މެދުވެރިކޮށްދިނުމާއި، ތިމާވެއްޓަށް ބޭރުކުރާ ވިހަ މާއްދާތަކުގެ ސަބަބުން ތިމާވެށި ތަޣައްޔަރުވުމާއި، މޫސުމަށް އަންނަ ނޭދެވޭ ބަދަލުތަކުން ޢާންމު ސިއްޙަތަށް ހުރި ނުރައްކާތައް ކުޑަކުރުމަށް ޤައުމުތަކުން އަޅަންޖެހޭ ފިޔަވަޅުތަކާއި، ސިޔާސަތުތަކާއި ކުރަންޖެހޭ މަސައްކަތްތަކާ ގުޅޭގޮތުން ވަކާލާތުކުރުމާއި، ދެމެހެއްޓެނިވި ތަރައްޤީގެ ލަނޑުދަނޑިތައް، ޕެރިސް އެގްރީމަންޓް، ނެޝަނަލީ ޑިޓަރމައިންޑް ކޮންޓްރިބިއުޝަން، މިނަމާޓާ ކޮންވެންޝަންސް އަދި ގްލޯބަލް ބަޔޯޑައިވަރސިޓީ ފްރޭމްވަރކްގެ މައިގަނޑު އަސާސްތަކާ އެއްގޮތްވާގޮތުގެ މަތިން ތިމާވެށި ހިމާޔަތްކޮށް، ޢާންމު ސިއްޙަތު ރައްކާތެރިކުރުމަށްޓަކައި ދަތުރުފަތުރާއި، ތަޢުލީމާއި، ހަކަތަ އާއި، ވިޔަފާރީގެ ދާއިރާ ފަދަ އެހެނިގެން ދާއިރާތައް ކުރިއެރުވުން ކަމަށް ރައީސްއޮފީހުން ބުނެއެެވެ. 

މި ފޯރަމުގައި ބައިވެރިވުމުން ދައުލަތުން އަދި އާންމު ފަރުދުން އެއްވެސް އިލްތިޒާމެއް އުފުލާކަށް ނުޖެހޭނެ ކަމަށްވެސް ރައީސް އޮފީހުން ބުނެފައިވެއެވެ.