ރާއްޖެއާއި ޗައިނާގެ ގުޅުން ބަދަހިކުރެއްވުމަށް ކުރެއްވި މަސައްކަތްޕުޅަށް ރައީސް މުޢިއްޒު ޗައިނާ ސަފީރަށް ޝުކުރު އަދާކުރައްވައިފި

ރާއްޖެއާއި ޗައިނާގެ ގުޅުން ބަދަހިކުރެއްވުމަށް ކުރެއްވި މަސައްކަތްޕުޅަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވާންގ ލިޒިންއަށް ޝުކުރުއަދާކުރައްވައި ތަޢުރީފު ކުރައްވައިފިއެވެ. މިއަދު ރައީސް އޮފީހުގައި ބޭއްވުނު ބައްދަލުވުމެއްގައި ސަފީރު ވާންގ ލިޒިން ރައީސް މުޢިއްޒުގެ އަރިހަށް  ވަދާޢީ ޒިޔާރަތެއް ކުރެއްވެވިއެވެ.

މި ބައްދަލުވުމުގައި ރައީސް މުޢިއްޒު ވިދާޅުވީ ދެޤައުމުގެ ގުޅުން އިތުރަށް ބަދަހިކުރެއްވުމަށް ސަފީރު ކުރައްވަމުން ގެންދަވާ މަސައްކަތްޕުޅުތަކަށް ތަޢުރީފުކުރައްވާ ކަމަށެވެ. އަދި ސަފީރުގެ ހައިސިއްޔަތުން އެކަމަނާގެ އިސްނެންގެވުމާއެކު ކޮށްދެއްވާފައިވާ އަގުހުރި ޚިދުމަތްތަކަށް ޝުކުރު އަދާކުރެއްވިއެވެ. މީގެއިތުރުން ޗައިނާ ސަރުކާރުން ރާއްޖެއަށް ދެއްވަމުން ގެންދަވާ އެއްބާރުލެއްވުމާއި އެހީތެރިކަމަށްވެސް ރައީސް މުޢިއްޒު ޝުކުރު އަދާކުރެއްވިއެވެ.

ޗައިނާ ސަފީރު ވަންގ ލިޒިން ވެސް މި ފުރުޞަތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާއާއި، އަދުގެ ސަރުކާރުން ދެއްވަމުން ގެންދަވާ އެއްބާރުލެއްވުމާއި އިރުޝާދު ފާހަގަކުރައްވައި ޝުކުރު އަދާކުރެއްވިއެވެ. އަދި މިސަރުކާރުގެ ވޭތުވެދިޔަ އެއް އަހަރުދުވަހުގެ ތެރޭގައި ހޯއްދަވާފައިވާ ވިލުންތެރި ކާމިޔާބީތަކާއި، ކުރިއެރުންތައް ފާހަގަކުރައްވައި، އެކަންކަމަ، އެކަންކަމަށް ތަޢުރީފް ކުރެއްވިއެވެ.

މި ބައްދަލުވުމުގައި ދެ ބޭފުޅުން ޗައިނާގެ އެހީގައި މިހާރު ކުރިއަށްދާ މަޝްރޫއުތަކަށް އަލިއަޅުއްވާލެއްވިއެވެ. އަދި ދެ ޤައުމު ގުޅިގެން މަސައްކަތްކުރެވޭނެ އިތުރު ދާއިރާތަކާގުޅޭގޮތުންވެސް މަޝްވަރާ ކުރެއްވިއެވެ. ބައްދަލުވުން ނިންމަވާލައްވަމުން، ކުރިއަށް އޮތް ދުވަސްތަކުގައި ދިވެހިރާއްޖެއާއި ޗައިނާގެ ގުޅުން އަދިވެސް އިތުރަށް ބަދަހިވެގެންދާނެކަމަށް ދެ ބޭފުޅުން ޔަޤީންކުރައްވާ ކަމުގައި ވިދާޅުވިއެވެ.