ސިންގަޕޫރުގެ ގައުމީ ދުވަހުގެ މުނާސަބަތުގައި ރައީސުލްޖުމްހޫރިއްޔާ ތަހުނިޔާ ފޮނުއްވައިފި

ސިންގަޕޫރުގެ ގައުމީ ދުވަހުގެ އުފާވެރި މުނާސަބަތާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެ ގައުމުގެ އިސްވެރިންނަށާއި ރައްޔިތުންނަށް ތަހުނިޔާ ފޮނުއްވައިފިއެވެ.

މި މުނާސަބަތުގައި ރައީސުލްޖުމްހޫރިއްޔާ ފޮނުއްވި މެސެޖުގައި، ދިވެހި ސަރުކާރާއި ރައްޔިތުންގެ ނަމުގައި ސިންގަޕޫރުގެ ރައީސް ތަރުމަން ޝަންމުގަރަތުނަމް އަށާއި، ބޮޑުވަޒީރު ލޯރެންސް ވަންގްގެ އިތުރުން ސިންގަޕޫރުގެ ރައްޔިތުންނަށް އިޚްލާޞްތެރިކަމާއެކު މަރުހަބާ އާއި ހެޔޮއެދުންތައް ވަނީ ރައްދުކުރައްވާފައެވެ.

ރައީސުލްޖުމްހޫރިއްޔާގެ މެސެޖުގައި، ދެ ގައުމުގެ ދެމެދުގައި އޮތް ބަދަހި ރަހުމަތްތެރިކަމުގެ ގުޅުމުގެ މައްޗަށް އަލިއަޅުއްވާލެއްވިއެވެ. މިގޮތުން ދިވެހިރާއްޖެ އާއި ސިންގަޕޫރާ ދެމެދު އޮތީ ދެ ފަރާތުގެ އިތުބާރާއި އިޙްތިރާމްގެ މައްޗަށް ބިނާވެފައިވާ، އަދި ސަރަހައްދީ ސުލްހަވެރިކަމާއި ކުރިއެރުމަށް ދެ ގައުމުން ގެންގުޅޭ ތަސައްވުރުގެ މައްޗަށް ބިނާވެފައިވާ ވަރުގަދަ ގުޅުމެއްކަން އެ މަނިކުފާނު ފާހަގަކުރެއްވިއެވެ.

On the joyous occasion of the National Day of Singapore, I extend warm congratulations and best wishes of the Government and the people of the Maldives to His Excellency @Tharman_S, President of Singapore, His Excellency @LawrenceWongST, Prime Minister of Singapore and the… pic.twitter.com/DTwdbn6xBv

— Dr Mohamed Muizzu (@MMuizzu) August 9, 2026

މީގެ އިތުރުން، ސިންގަޕޫރުގެ ރައްޔިތުންނަށް މެދުނުކެނޑި ލިބެމުންދާ ތަރައްގީ އާއި، އެ ގައުމުގެ އެއްބައިވަންތަކަމާއި ފާގަތިކަމަށް އެދިވަޑައިގެން ރައީސުލްޖުމްހޫރިއްޔާ ވަނީ ހެޔޮ ދުޢާ ފޮނުއްވާފައެވެ.

ސިންގަޕޫރުގެ ގައުމީ ދުވަސް ފާހަގަކުރަނީ ކޮންމެ އަހަރެއްގެވެސް އޮގަސްޓް މަހުގެ 9 ވަނަ ދުވަހުއެވެ. ދިވެހިރާއްޖެ އާއި ސިންގަޕޫރަކީ ސަރަހައްދީ ގޮތުންނާއި ބައިނަލްއަގުވާމީ މައިދާނުގައިވެސް ގާތް ގުޅުމެއް ބާއްވަމުންދާ ދެ ގައުމެވެ.