ޚަބަރު
ރައީސުލްޖުމްހޫރިއްޔާ އއ.ތޮއްޑޫއަށް ވަޑައިގެންފި

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ތޮއްޑޫ ރައްޔިތުންނާއި ބައްދަލު ކުރައްވަނީ- ފޮޓޯ: ރައީސް އޮފީސް
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލެ އަތޮޅާއި އަރިއަތޮޅު އުތުރުބުރީގެ ރަށްތަކަށް ކުރައްވާ ދެ ދުވަހުގެ ދަތުރުފުޅު މިއަދު ހެނދުނު ފައްޓަވައިފިއެވެ. މި ދަތުރުފުޅުގެ ފުރަތަމަ މަންޒިލަކަށް ވެފައިވަނީ އއ. ތޮއްޑޫއެވެ.
ތޮއްޑޫއަށް ވަޑައިގަތުމާއެކު ރައީސަށް އެ ރަށުން ވަނީ ހޫނު މަރުހަބާއެއް ދަންނަވާފައެވެ. ތޮއްޑޫގައި ރައީސް ބައްދަލުކުރެއްވީ އެ ރަށުގެ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާއެވެ. އަދި އޭގެ ފަހުން ރަށުގެ ރައްޔިތުންނާވެސް ބައްދަލުކުރެއްވިއެވެ.

ތޮއްޑޫ ރައްޔިތުން ރައީސުލްޖުމްހޫރިއްޔާއަށް މަރުޙަބާ ކިއުމަށް ނިކުމެ
މިއަދުގެ ދަތުރުފުޅުގައި ރައީސް ދެން ވަޑައިގަންނަވާނީ އއ. ރަސްދޫއަށާއި އއ. މަތިވެރިއަށެވެ. ރަސްދޫގައި ރައީސް ބައްދަލުކުރައްވާނީ އެ ރަށު ކައުންސިލާއި އަތޮޅު ކައުންސިލްގެ އިތުރުން އުކުޅަހު ކައުންސިލާއެވެ. އަދި މަތިވެރީގައި ބައްދަލުކުރައްވާނީ އެ ރަށުގެ ކައުންސިލާއި ހިމަންދޫ، މާޅޮސް، ފެރިދޫ އަދި ބޮޑުފޮޅުދޫގެ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނާއެވެ.
މާދަމާ ރައީސް ވަޑައިގަންނަވާނީ ކ. އަތޮޅުގެ ގާފަރު، ހުރާ އަދި ހިންމަފުށްޓަށެވެ. މި ރަށްރަށުގައިވެސް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި ރައްޔިތުންނާ ބައްދަލުކުރައްވާނެއެވެ.
ރައީސް މުޢިއްޒުގެ މި ދަތުރުފުޅުގެ މައިގަނޑު މަޤްޞަދަކީ ރަށްރަށުގެ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނާ ބައްދަލުކުރައްވައި، އެ ފަރާތްތަކުގެ ޝަކުވާތައް އަޑުއެއްސެވުމެވެ. މީގެ އިތުރުން ރަށްރަށުގައި ކުރިއަށްގެންދާ މަޝްރޫޢުތަކުގެ މަޢުލޫމާތު ސާފުކުރެއްވުމާއި، ކުރިއަށް ގެންދަން ބޭނުންވާ މަޝްރޫޢުތަކުގެ މަޢުލޫމާތު އޮޅުންފިލުވުމެވެ.