ތޮއްޑޫގެ މަގުހެދުމާއެކު އެހެނިހެން މައްސަލަތައް ހައްލުކޮށް ޑޮލަރު އޭޓީއެމްއެއް ޤާއިމްކުރެއްވުމަށް ރައީސް ނިންމަވައިފި

ތޮއްޑޫގެ މަގުހެދުމުގެ މަޝްރޫޢާއެކު އެރަށުގައި ހުރި އެހެނިހެން މައްސަލަތައްވެސް ހައްލުކޮށްދެއްވާ ، ޑޮލަރު އޭޓީއެމްއެއް ޤާއިމްކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިއަދު ވިދާޅުވެއްޖެއެވެ. ރައީސް މުޢިއްޒު މިހެން ވިދާޅުވީ އަރިއަތޮޅު އުތުރުބުރި ތޮއްޑޫ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާއެކު މިއަދު ބޭއްވެވި ބައްދަލުކުރެއްވުމުގައެވެ.

މި ބައްދަލުވުމުގައި ތޮއްޑޫ ކައުންސިލުން ވަނީ ރަށުގައި ދިމާވެފައިވާ އެކި މައްސަލަތައް ފާހަގަކޮށްފައެވެ. މީގެ ތެރޭގައި ޞިއްޙީ ޚިދުމަތް ދިނުމުގައި ހުރި ގޮންޖެހުންތަކާއި، މިހާރަށްވުރެ ފެންވަރު ރަނގަޅު ސިއްޙީ މަރުކަޒެއް ޤާއިމުކުރުމުގެ މުހިންމުކަން ހިމެނެއެވެ. މީގެ އިތުރުން، ތޮއްޑޫ ސްކޫލުގެ ޖާގައިގެ ދަތިކަމާއި، ރަށުގެ އިޤްތިޞާދު ރަނގަޅުކުރުމަށް ފައިނޭންސް ލިބޭނެ އިތުރު އިންތިޒާމުތައް ހަމަޖެއްސުމަށް ކައުންސިލުން އެދިފައިވެއެވެ.

ރައީސުލްޖުމްހޫރިއްޔާ ވަނީ އެމަނިކުފާނު ވަޢުދުވެވަޑައިގެންފައިވާ ކަންކަން ބަޖެޓުގައި ހިމަނުއްވައިގެން ކުރިއަށް ގެންދަވާނެކަމަށް ވިދާޅުވެފައެވެ. އަދި ރަށުގެ މަގު ހެދުމުގެ މަޝްރޫޢުވެސް ކުރިއަށް ގެންދަވާނެކަމަށް އެމަނިކުފާނު ޔަޤީންކަން ދެއްވާފައިވެއެވެ.

މި ބައްދަލުވުމުގައި ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ތޮއްޑޫގެ ތަރައްޤީއަށް ކުރިއަށްގ ކުރިއަށްގެންދާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ހިއްސާކުރައްވާފައެވެ. ބައްދަލުވުމަށްފަހު ރައީސުލްޖުމްހޫރިއްޔާ ވަނީ ތޮއްޑޫ ކައުންސިލްގެ މެހްމާނުން ސޮއިކުރައްވާ ފޮތުގައި ސޮއިކުރައްވާފައެވެ.

މި ދަތުރުފުޅުގައި ރައީސް މުޢިއްޒު ވަނީ ތޮއްޑޫގެ ރައްޔިތުންގެ ކަންބޮޑުވުންތަކަށް ސަމާލުކަން ދެއްވައި، ރަށުގެ ތަރައްޤީއަށް ކުރިއަށް އޮތް ތަނުގައި އިތުރު މަސައްކަތްތަކެއް ކުރައްވާނެކަމުގެ ޔަޤީންކަން ދެއްވާފައެވެ.