ރައީސް މުޢިއްޒު ދެއްވީ ތޮއްޑޫގެ ތަރައްޤީއަށް އައު އުންމީދުތަކެއް

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު އަރިއަތޮޅު އުތުރުބުރީ ތޮއްޑޫއަށް ކުރެއްވި ދަތުރުފުޅުގައި، ރަށުގެ ތަރައްޤީއާ ގުޅޭ މުހިންމު މަޝްވަރާތަކެއް ކުރިއަށް ގެންދަވައިފިއެވެ. މި ދަތުރުފުޅުގައި ރައީސް ބައްދަލުކުރެއްވީ ތޮއްޑޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާއެވެ.

މިއަދު ހެނދުނު ތޮއްޑޫ ކައުންސިލް އިދާރާގައި ބޭއްވުނު މި ބައްދަލުވުމުގައި، ތޮއްޑޫ ކައުންސިލުން ވަނީ ރަށުގެ ތަރައްޤީއާ ގުޅޭ މުހިންމު ކަންކަން ފާހަގަކުރައްވާފައެވެ. މީގެ ތެރޭގައި ޞިއްޙީ ޚިދުމަތް ދިނުމުގައި ހުރި ގޮންޖެހުންތަކާއި، ފެންވަރު ރަނގަޅު ޞިއްޙީ މަރުކަޒެއްގެ ބޭނުން ހިމެނެއެވެ. މީގެ އިތުރުން، ސްކޫލުގެ ޖާގައިގެ ދަތިކަމާއި، ރަށުގެ އިޤްތިޞާދު ރަނގަޅުކުރުމަށް ފައިނޭންސް ލިބޭނެ އިތުރު އިންތިޒާމުތަކެއް ހަމަޖެއްސުމަށް ކައުންސިލުން އެދިވަޑައިގެންފައިވެއެވެ.

ރައީސް މުޢިއްޒު މި ބައްދަލުވުމުގައި ވިދާޅުވެފައިވަނީ، އެމަނިކުފާނު ވަޢުދުވެވަޑައިގެންފައިވާ ކަންކަން ބަޖެޓުގައި ހިމަނުއްވައިގެން ކުރިއަށް ގެންދަވާނެ ކަމަށެވެ. އަދި ރަށުގެ މަގު ހެދުމުގެ މަޝްރޫޢުވެސް ކުރިއަށް ގެންދަވާނެކަމުގައި އެމަނިކުފާނު ވިދާޅުވިއެވެ.

ރައީސްގެ އަރިހުގައި ބައިވެރިވެވަޑައިގެންނެވި ވަޒީރުންވެސް ވަނީ ތޮއްޑޫގެ ތަރައްޤީއަށް ކުރިއަށްގެންދާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ހިއްސާކުރައްވާފައެވެ.

ތޮއްޑޫ ކައުންސިލުން ފާހަގަކުރެއްވި ގޮތުގައި، ރައީސަކު ރަށަކަށް ވަޑައިގެން އެ ރަށެއްގެ ރައްޔިތުންނާ މަޝްވަރާކުރައްވައިގެން ތަރައްޤީގެ ކަންކަން ބައްޓަން ކުރެއްވުމަކީ އެރަށަކަށް އެންމެ ރަނގަޅު ގޮތެވެ.

މި ބައްދަލުވުން ނިމުމާއެކު، ރައީސުލްޖުމްހޫރިއްޔާ ވަނީ ތޮއްޑޫ ކައުންސިލްގެ މެހެމާނުން ސޮއިކުރައްވާ ފޮތުގައި ސޮއިކުރައްވާފައެވެ.