ކުރިއަށް އޮތް ދެ އަހަރަކީ ވަޢުދުތައް ފުއްދުމުގެ ޢަމަލީ މަސައްކަތުގެ ދެއަހަރުކަމަށް ރައީސް ވިދާޅުވެއްޖެ

ކުރިއަށް އޮތް ދެއަހަރަކީ ރައްޔިތުންނަށް ވެވަޑައިގެންފައިވާ ވަޢުދުތައް ފުއްދުމުގެ މަސައްކަތް ޢަމަލީގޮތުން ފެންނާނެ ދެއަހަރުކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، އއ.އަތޮޅަށް ކުރައްވާ ދަތުރުފުޅުގެ ތެރެއިން އެއަތޮޅު ތޮއްޑޫއަށް ވަޑައިގެން ދެއްކެވި ވާހަކަފުޅުގައެވެ.

ތޮއްޑޫ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ އެމަނިކުފާނުގެ އެންމެ މުހިންމު އެއް ސިޔާސަތަކީ ރައްޔިތުންނާ ވީހާވެސް ގާތުން ޚިދުމަތް ދިނުންކަމަށެވެ. އަދި ތޮއްޑޫއަކީ މަސައްކަތްތެރި އަދި މުރާލި ރައްޔިތެއް ދިރިއުޅޭ ރަށެއްކަން ފާހަގަކުރައްވައި، ދަނޑުވެރިކަމާއި ފަތުރުވެރިކަން ކުރިއަރަމުން އަންނަ ރަށެއްކަމަށް ވިދާޅުވިއެވެ. މި ސިނާއަތްތައް ކުރިއެރުވުމަށް ސަރުކާރުން އިސްކަންދޭނެކަމަށްވެސް ރައީސް ވިދާޅުވިއެވެ.

ތޮއްޑޫ ކައުންސިލުން ލޯކަލް ކައުންސިލް އޮތޯރިޓީ ކުންފުންޏެއް އުފައްދާފައި އޮތުމާ ގުޅިގެން، ކައުންސިލާ ގުޅިގެން ރައްޔިތުންގެ ފުދުންތެރިކަން އިތުރުކުރަން ބޭނުންވާ މަޝްރޫޢުތައް ހިންގުމަށް ސަރުކާރުން ފުރިހަމަ އެއްބާރުލުން ދެއްވާނެކަމުގެ ޔަޤީންކަން ރައީސް ދެއްވިއެވެ. އަދި އިންވެސްޓްމަންޓްތަކަށް ފުރުޞަތު ފަހިކޮށްދެއްވާނެކަމަށާއި، ސިޔާސީ ވިސްނުމެއް ނުގެންގުޅުއްވާނެކަމަށްވެސް ވިދާޅުވިއެވެ.

ތޮއްޑޫގެ މަގުތަކުގެ ޙާލަތު ވަރަށްބޮޑަށް ގޯސްކަން ފާހަގަކުރައްވަމުން ރައީސް ވިދާޅުވީ ރައްޔިތުން ބޭނުންވާގޮތަށް މަގުތައް އަންނަ އަހަރު ތަރައްޤީކޮށްދެއްވާނެކަމަށެވެ. މިކަމުން ސްކޫލަށް ކުދިން ދިއުމަށާއި އިޤްތިޞާދީ ގޮތުން ކުރިއެރުމަށް ފަސޭހަވާނެކަމަށްވެސް ރައީސް ވިދާޅުވިއެވެ.