ޚަބަރު
ޚިދުމަތް ދެނީ ސިޔާސީގޮތުން ވިސްނައިގެނެއް ނޫން: ރައީސް ޑރ މުޢިއްޒު

ރައީސް ޑރ މުޙައްމަދު މުޢިއްޒު ތޮއްޑޫ ރައްޔިތުންނާއި ބައްދަލުކުރައްވަނީ. ފޮޓޯ: ރައީސް އޮފީސް
ރައްޔިތުންނަށް މިސަރުކާރުން ދޭ ޚިދުމަތްތައް ދެނީ ސިޔާސީގޮތުން ވިސްނައިގެން ނޫން ކަަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ މުޢިއްޒު މިހެން ވިދާޅުވީ މިއަދު އއ.ތޮއްޑު އަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް މުޢިއްޒު ވިދާޅުވީ މީގެކުރިން ފެނިގެން ގޮސްފައި ވަނީ، އެކިއެކި އިންތިޚާބުތަކާ ދިމާކޮށް، ޖަލުތަކުގައި ތިބޭ ކުށްވެރިން، އެއްވެސްވަރެއްގެ ރީހެބިލިޓޭޝަނެއްގެ ތެރެއަށް ނުގޮސް، މަގުމައްޗަށް ދޫކޮށްލާ ތަން ކަމަށެވެ. އަދި އޭގެ ސަބަބުން، އެކި ކަހަލަ ވަރަށް ގިނަ ނުރައްކާތެރި ކަންކަން، އަނިޔާވެރި ކަންކަން މަގުމަތީ ހިނގައި، ހަމަނުޖެހުން އުފެދިފައިވާ ކަން ރައީސް މުޢިއްޒު ފާހަގަކުރެއްވެވިއެވެ.
ރައީސް މުޢިއްޒު ވިދާޅުވީ މިދިޔަ އަހަރުގެ ތެރޭގައި، އަދި މި ނިމޭ އަހަރު، މުޅި އަހަރަށް ބަހާލައިގެން، ކްލެމެންސީގެ ތެރެއިންވިޔަސް، އަދި ޤާނޫނުގައި އޮންނަ ފުރުޞަތުގެ ތެރެއިން ރައީސުލްޖުމްހޫރިއްޔާ ދެއްވާ ލުއިގެ ތެރެއިންވިޔަސް، ޖުމްލަކޮށް، އަދަބު ލުއިކޮށްދީ، ނޫނީވިއްޔާ ދޫކޮށްލާފައި ވަނީ ޖުމްލަ 86 މީހުންކަމަށެވެ.
2023 ގައި ރިޔާސީ އިންތިޚާބާ ދިމާކޮށް އެ އަހަރުގެ ތެރޭގައި 429 މީހުންވޭ ދޫކޮށްލާފައި ވާކަން ރައީސް މުޢިއްޒު ފާހަގަކުރެއްވެވިއެވެ. މީގެއިތުރުންވެސް އެމެޑީޕީގެ ވެރިކަމުގެ ތެރޭގައި ކޮންމެ އިންތިޚާބާކާ ދިމާކޮށް ގިނަ ޢަދަދެއްގެ ކުށްވެރިން ޖަލުން ދޫކޮށްލައިފައިވާކަން ރައީސް މުޢިއްޒު ފާހަގަކުރެއްވެވިއެވެ.
މި އަހަރުވެސް އޮތޭ އިންތިޚާބެއް. މަޖިލިސް އިންތިޚާބު. އަޅުގަނޑުމެން އިންތިޚާބާ ދިމާކޮށް ސިޔާސީ ވިސްނުމެއްގައި، ބަޔަކު މަގުމައްޗަކަށް ދުލެއްނުކޮށްލަން. 2019 ގައި، އޭރުގައި އޮތް މަޖިލިސް އިންތިޚާބާ ދިމާކޮށް، 762 މީހުން ދޫކޮށްލި
ރައީސް މުއިއްޒު ވިދާޅުވިއެވެ.
ރައީސް މުޢިއްޒު ވިދާޅުވީ މިސަރުކާރުން ރައްޔިތުންނަށް ދޭ ޚިދުމަތް ދެނީ، ސިޔާސީގޮތުން ވިސްނައިގެން ނޫންކަމަށެވެ. އަދި ޤައުމަށް ރަނގަޅު، ޤައުމަށް މުހިންމު ކަންކަން، ރައްޔިތުންނަށް ވިސްނައިދީގެން ކޮށްދެނީ ސިޔާސީގޮތުން އަމިއްލަ ފައިދާއެއް ހޯދުމަށް ނޫންކަންވެސް ރައީސް މުޢިއްޒު ވަނީ ވިދާޅުވެފައެވެ.
"އެހެންވީމާ، އަޅުގަނޑުމެން އޭގެ ބަދަލުގައި އެ މީހުންނަށް ކަންތައްތަކެއް ދަސްކޮށްދެނީ. އިހަށްދުވަހު، ކެބިނެޓުން މި ފާސްކުރީ، ޖަލުގައި ތިބޭ މީހުންނަށްވެސް، ރީހެބިލިޓޭޓް ވުމަށް، ނޫނީވިއްޔާ މުޖުތަމަޢަށް ފައިދާހުރި ކަންތައްތަކެއް ކޮށްދިނުމުގެ ޕްރޮގްރާމްތަކެއް ހިންގަން. ސަރުކާރުން ހިންގާ ބައެއް މަޝްރޫޢުތަކުގައި، އޭގެތެރެއިން އަޚްލާޤު ރަނގަޅު މީހުންނަށް އިސްކަންދީގެން ބައިވެރިކުރަން. މިސާލަކަށް، މަގުހެދުމުގެ މަޝްރޫޢު. ނޫނީވިއްޔާ ކޮންމެވެސް މަޝްރޫޢެއްގައި، އޭގެ ތެރެއިން މީހުން ބައިވެރިކޮށްގެން، ކަންކަން ދަސްކޮށްދީގެން، އޭގެތެރެއިންވެސް އިތުރު ލުއިތައް ދީގެން ގޮސް، ދެން ދޫކޮށްލަން" ރަޢީސް މުއިއްޒު ވިދާޅުވިއެވެ.
ރައީސް ވިދާޅުވީ އޭރުން ޖަލުން ނުކުންނައިރު ތިބޭނީ، ކަންތައްތަކެއް ދަސްވެ، މުޖުތަމަޢަށް ކަމެއް ކޮށްދެވޭ ގޮތަށް އަދި އާމްދަނީ ހޯދޭނެ ފުރުޞަތުތަކެއްވެސް ލިބޭގޮތަށް ތައްޔާރުވެފައި ކަމަށެވެ.
ރައީސުލްޖުމްހޫރިއްޔާ މުއިއްޒު ވިދާޅުވީ އެމަނިކުފާނު ބޭނުންވެވަޑައިގަންނަވަނީ މުޖުތަމަޢަށް ހަމަޖެހުން އަންނަންކަމަށެވެ. ސިޔާސީ ވިސްނުމެއް އިސްކޮށް، ބަދަލުހިފަން، ނޫނީވިއްޔާ އެނޫން ވިސްނުމެއްގައި ކަންކަމެއް ނުކުރައްވާނެ ކަމަށް ރައީސް މުއިއްޒު ވިދާޅުވިއެވެ.