އއ.ރަސްދޫގައި ގެސްޓުހައުސް ހިންގާ ފަރާތްތަކާ ރައީސް މުޢިއްޒު ބައްދަލުކުރައްވައިފި

އއ.އަތޮޅު ރަސްދޫގައި ގެސްޓުހައުސް ހިންގާ ފަރާތްތަކާ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ބައްދަލުކުރައްްވައިފިއެވެ. 

ރަސްދޫގެ ގެސްޓުހައުސް ހިންގާ ފަރާތްތަކާ އެކު ރައީސް މުޢިއްޒު ބޭއްވި ބައްދަލުވުމުގައި ރަސްދޫއާ ކައިރީގައި އޮތް ފިނޮޅު ގިރަމުންދާތީ އެކަމާ ކަންބޮޑުވުން ފާޅުކޮށްފައިވެއެވެ.

ހަމާއެއާއެކު އީ.އައި.އޭ ހައްދަވައިގެން ތިމާވެއްޓަށް ގެއްލުން ނުވާނެ ގޮތަށް މި ސަރަހައްދު ނެތިދިއުމުން ހިމާޔަތްކޮށްދެއްވުމަށް ގެސްޓުހައުސްގެ ވެރިން ވަނީ އެދިފައެވެ. 

 މީގެ އިތުރުންވެސް ގެސްޓްހައުސް ވިޔަފާރި ފުޅާކުރުމަށް ބޭނުންވާކަންކަން ފާހަގަކުރައްވައި އެރަށުގެ އިޤްތިޞާދު ސަލާމަތްކުރުމަށްޓަކައި ބޭނުންވާ ކަންކަން އެ ބޭފުޅުން ޙިއްޞާކުރެއްވިއެވެ. އަދި  ޑޮލަރު އޭޓީއެމްގެ ޚިދުމަތް ބޭނުންވާކަންވެސް ގެސްޓުހައުސް ވިޔަފާރިވެރިން ވަނީ ބުނެފައެވެ. 

މި ބައްދަލުކުރެއްވުމުގައި ވާހަކަފުޅު ދައްކަވަމުން ރައީސް ޑރ މުޢިއްޒު  ވިދާޅުވީ ރަސްދޫގެ ގެސްޓް ހައުސް ހިންގަވާ ފަރާތްތައް ފާހަގަކުރެއްވި ކަންކަން ކަމާގުޅުން ހުރި އިދާރާތަކާ މަޝްވަރާކުރެއްވުމަށްފަހު އެކަންކަން ބައްލަވާނެކަމަށެވެ.

 އަދި ފިނޮޅު ނެތިދިއުމުގެ މައްސަލައަށް ހައްލު ހޯދުމުގައި ތިމާވެއްޓަށް ގެއްލުން ނުވާނެ ގޮތަށް އެކަން ކުރެވޭނެ ގޮތް ބައްލަވާނެކަމުގައި އެމަނިކުފާނު ވިދާޅުވިއެވެ.

މިބައްދަލުވުން ކުރިއަށް ގެންގޮސްފައިވަނީ ރަސްދޫ ރަށްވެހިގޭގައެވެ.