ޚަބަރު
ވޭތުވެދިޔަ އަހަރު ދުވަހުގެ ތެރޭގައި 655 ކިލޯގްރާމްގެ މަސްތުވާތަކެތި އަތުލައިގަނެވުނު: ރައީސް މުޢިއްޒު

ރައީސް ޑރ މުޢިއްޒު ރަސްދޫ ރައްޔިތުންނާއި ބައްދަލުކުރެއްވުން.
ވޭތުވެދިޔަ އަހަރު ދުވަހުގެ ތެރޭގައި 655 ކިލޯގްރާމް މަސްތުވާތަކެތި އަތުލައިގަނެވުނު ކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވީ އއ.ރަސްދޫ އަށް ކުރެއްވެވި ދަތުރުފުޅުގައި އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް ޑރ މުޢިއްޒު ވިދާޅުވީ އެކަމެއް ޙައްލުވުމަށް ރައްޔިތުން އިންތިހާއަށް އެދިއެދި ތިބި، އެހެން ނަމަވެސް ކުރީގެ ސަރުކާރުތަކުން ދޫކޮށްލާފައިވާ އެންމެ ބޮޑު އެއް މައްސަލައަކީ ޑްރަގް ނުވަތަ މަސްތުވާތަކެތީގެ މައްސަލަކަމަށެވެ.
އެގޮތުން ޑްރަގްގެ ވަބާގައި ޤައުމު ޖެހި، އެ ކަމުގެ ތެރޭގައި 30، 40 އަހަރު ފާއިތުވެ ގޮސްފައި ވާ ކަމަށާއި، ޙައްލު ވުމުގެ ބަދަލުގައި، މި މައްސަލަ ހައްތަހާ ދިޔައީ ބޮޑުވަމުން ކަމުގައި ރައީސް މުޢިއްޒު ވިދާޅުވިއެވެ.
ޑްރަގްގެ ވަބާގައި ޖެހިފައިވާ ފަރާތްތައް އެކަމުން ދުރުކޮށް، ޒުވާނުންނަކީ މަސްތުގެ ވަބާއިން ސަލާމަތްވެފައިވާ، ބިނާކުރަނިވި ބަޔަކަށް ހެދުމަކީ މިސަރުކާރުން އިސްކަންދޭ ކަމެއް ކަމުގައި ރައީސް މުޢިއްޒު ވިދާޅުވިއެވެ. އަދި މި ކަމަކީ، ކޮންމެ ރަށަކަށްވެސް މުހިންމު ކަމެއް ކަމުގައި އެމަނިކުފާނު ފާހަގަކުރެއްވެވިއެވެ.
ދިވެހިރާއްޖެއަކީ ބޭރު ދުނިޔެއަށް ޤައުމުގެ ރީތި ނަން އިޝްތިހާރުކޮށްގެން ހޯދާ އާމްދަނީއަށް އިންތިހާއަށް ބަރޯސާވެފައިވާ ޤައުމަކަށް ވާއިރު، އެކަން ދެމެހެއްޓެން އޮތީ މި ޤައުމަކީ ސުލްހައާއި ހަމަޖެހުން ޤާއިމުވެފައިވާ، ރައްކާތެރި އަދި އަމާން ޤައުމަކަށް ހެދިގެން ކަމަށް ރައީސްގެ ވާހަކަފުޅުގައި ވިދާޅުވިއެވެ. އަދި މިކަން ހާސިލުވާން އޮތީ މަސްތުގެ ވަބާއިން ދުރަށްޖެހިގެން ކަމުގައިވެސް އެމަނިކުފާނު ވިދާޅުވިއެވެ.
މިކަން ހާސިލް ކުުރުމަށް މިދިޔަ އަހަރެއްހާ ދުވަސް ތެރޭގައި ކަންތައްތަކެއް ކުރެވިފައިވާކަން ރައީސް މުޢިއްޒު ފާހަގަކުރެއްވެވިއެވެ. އެގޮތުން ރާއްޖޭގައި ފެތުރިފައިވާ ޑްރަގްގެ ވިޔަފާރީގެ ތެރޭގައި، ގިނަ ޢަދަދަކަށް، ނުޤަވާއިދުން އުޅޭ ބިދޭސީން ހިމެނޭކަމަށާއި، މިހާރު އޭގެ ތެރެއިން ގިނަ ބަޔަކު ޤައުމުން ޑީޕޯޓްކޮށްފައި ވާނެކަމަށް ރައީސް މުޢިއްޒު ވިދާޅުވިއެވެ.
މީގެއިތުރުން މިދިޔަ އަހަރު ދުވަހުގެ ތެރޭގައި މަސްތުވާތަކެއްޗާއެކު ހިފާ، ހައްޔަރުކޮށް، ތަޙުޤީޤަށްފަހު ޑީޕޯޓް ކޮށްފައިވާ ބިދޭސީންގެ ޢަދަދު 153 އަށް އަރާ ކަމަށާއި، މިއީ އޭގެ ކުރީ އަހަރާ އަޅާ ބަލާއިރު، 2 ގުނަ އިތުރު ޢަދަދެއް ކަމަށް ރައީސް މުޢިއްޒު ވިދާޅުވިއެވެ. މަސްތުވާތަކެތީގެ ވިޔަފާރިކޮށް، ބޭނުންކުރާ ތަންތަން ބަލައި ފާސްކުރުމުގެ އޮޕަރޭޝަންތައް އިންތިހާއަށް އިތުރު ކުރެވިފައި ވާނެ ކަމަށާއި، މިދިޔަ އަހަރު ދުވަހުގެ ތެރޭގައި އެފަދަ 13435 ތަނެއް ބަލައި ފާސްކޮށް، އެކަމުގައި ޝާމިލުވާ ފަރާތްތަކުގެ މައްސަލަ ބަލާފައިވާކަމުގައި ރައީސް ޑރ މުޢިއްޒު ވިދާޅުވިއެވެ.
ހަމަ މިއާއެކު ވޭތުވެދިޔަ އަހަރު ދުވަހުގެ ތެރޭގައި 655 ކިލޯގްރާމްގެ މަސްތުވާތަކެތި އަތުލައިގަނެވުނު ކަމަށާއި، މިތަކެތި ނައްތާލެވެނީ ނޫސްވެރިންގެ ކުރިމަތީގައިކަން ރައީސް ޑރ މުޢިއްޒު ފާހަގަކުރެއްވިއެވެ.
އަގުގެ ގޮތުން ބަލާނަމަ އަދުގެ ސަރުކާރުން އަތުލައިގަތް މަސްތުވާތަކެތީގެ މިންވަރު 1.3 ބިލިއަން ރުފިޔާއަށް އަރާކަމަށާއި، މިދިޔަ އަހަރުގެ ނޮވެމްބަރުގެ ނިޔަލަށް އަތުލައިގަތް މަސްތުވާތަކެތީގެ އަގަކީ 255 މިލިއަން ރުފިޔާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދުގެ ސަރުކާރުގެ ވިސްނުމަކީ މަސްތުވާތަކެތީގެ މައްސަލައަށް ޙަޤީޤީ ޙައްލެއް ހޯއްދަވައިދެއްވުންކަން ފާހަގަކުރައްވަމުން އެމަނިކުފާނު ވަނީ އެކަމަށް ފުރުޞަތު ފަހިކޮށްދޭނެ ބިލެއްވެސް މިހާރު ރައްޔިތުންގެ މަޖިލީހަށް ހުށަހަޅުއްވާފައިވާކަން ފާހަގަކުރައްވާފައެވެ.
ހަމަމިއާއިއެކު މިކަމުގައި ދާއިމީ ނަތީޖާއެއް ނެރުމަށްޓަކައި ރައްޔިތުންގެ އެއްބާރުލެއްވުމާއި އެހީތެރިކަން ބޭނުންވާނެކަންވެސް ރައީސުލުޖުމްހޫރިއްޔާ ވަނީ ފާހަގަކުރައްވާފައެވެ. އަދި އެކުގައި މަސައްކަތް ކުރެވެމުންދާނަމަ ދެން ފެންނާނީ ޤައުމުގައި ހުރި މިފަދަ ބޮޑެތި މައްސަލަތައް ޙައްލުވާ މަންޒަރު ކަމުގައި ރައީސް މުޢިއްޒު ވިދާޅުވިއެވެ. ޙަޤީޤީ ކުރިއެރުމާއި ތަރައްޤީއަކީ ލޯ ކުރިމަތިން ފެންނަން އޮތް އެއްޗެއް އެކަނި ނޫން ކަމަށާއި، މުޖުތަމަޢުގައި ހުރި މައްސަލަތަކަށް ޙައްލު ލިބުންވެސް އެކަމުގެ ތެރޭގައި ހިމެނޭ ކަމުގައި ރައީސް މުޢިއްޒު ވިދާޅުވިއެވެ.