ދުބާއީގެ އަމީރުގެ ކޮއްކޯފުޅު އަވަހާރަވުމާ ގުޅިގެން ރައީސުލްޖުމްހޫރިއްޔާ ތަޢުޒިޔާ ފޮނުއްވައިފި

ޔުނައިޓެޑް އަރަބް އެމިރޭޓްސް (ޔޫއޭއީ) ގެ ބޮޑުވަޒީރު އަދި ދުބާއީގެ ވެރިޔާ، ޝައިޚް މުޙައްމަދު ބިން ރާޝިދު އަލް މަޚްތޫމްގެ ކޮއްކޯފުޅު، ޝައިޚް އަޙްމަދު ބިން ރާޝިދު އަލް މަޚްތޫމް ނިޔާވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.

ދުބާއީ ޕޮލިސް އެންޑް ޕަބްލިކް ސެކިއުރިޓީގެ ޑެޕިއުޓީ ޗެއާމަންގެ މަޤާމުގައި ހުންނެވި ޝައިޚް އަޙްމަދު ބިން ރާޝިދު އަލް މަޚްތޫމް ނިޔާވީ ހޯމަ ދުވަހުގެ ހެނދުނުގެ ވަގުތެއްގައެވެ. ނިޔާވި އިރު އުމުރުފުޅަކީ 76 އަހަރެވެ. ނަމަވެސް އެމަނިކުފާނު ނިޔާވި ސަބަބެއް ރަސްމީކޮށް ހާމަކޮށްފައެއް ނުވެއެވެ. 

މި ހިތާމަވެރި ޚަބަރާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި ތަޢުޒިޔާގެ މެސެޖުގައި، ދުބާއީގެ ވެރިޔާ ޝައިޚް މުޙައްމަދު ބިން ރާޝިދު އަލް މަޚްތޫމަށާއި، އެމަނިކުފާނުގެ ޢާއިލާއަށް ވަރަށް އިޚްލާޞްތެރިކަމާއެކު ތަޢުޒިޔާ ދަންނަވާފައިވެއެވެ.

I extend my sincere condolences to His Highness ⁠Sheikh Mohammed bin Rashid Al Maktoum @HHShkMohd on the passing of his beloved brother Sheikh Ahmed bin Rashid Al Maktoum.

May Almighty Allah grant him infinite mercy, bless his soul with eternal peace, and admit him into…

— Dr Mohamed Muizzu (@MMuizzu) September 21, 2026

ރައީސުލްޖުމްހޫރިއްޔާގެ މެސެޖުގައި، މާތް ﷲ މައްޔިތާގެ ފުރާނަފުޅަށް ހެޔޮ ރަޙްމަތް ލައްވައި، ސުވަރުގޭގެ ދާއިމީ ނިޢުމަތާއި ޖަންނަތުލް ފިރުދައުސް މިންވަރުކުރެއްވުން އެދި ދުޢާ ދަންނަވާފައިވެއެވެ. އަދި މި ހިތާމައިގެ ވަގުތުގައި ދިވެހި ސަރުކާރާއި ރައްޔިތުން، ޝައިޚް މުޙައްމަދަށާއި އެމަނިކުފާނުގެ ޢާއިލާއަށާއި ޔޫއޭއީގެ އެންމެހައި ރައްޔިތުންނަށް ކެތްތެރިކަން މިންވަރުކުރެއްވުމަށް އެދި ދުޢާކުރާ ކަމަށްވެސް ރައީސް ވިދާޅުވިއެވެ.